რეგიონებში გარევაჭრობის წესები იცვლება. ამას ითვალისწინებს კანონპროექტი, რომლის ავტორიც საქართველოს რეგიონული განვითარებისა და ინფრასტრუქტურის სამინისტროა, ინიციატორი კი საქართველოს მთავრობა.
როგორც კანონპროექტშია ნათქვამი, ცვლილებების თანახმად ჯარიმა დგინდება შესაბამისი ნებართვის გარეშე გარე ვაჭრობისათვის და მუნიციპალიტეტებშიც დედაქალაქის მსგავსი რეგულაციები იმოქმედებს, ამასთან გარევაჭრობას პოლიციის ნაცვლად ადგილობრივი მუნიციპალიტეტი გააკონტროლებს.
„ არსებული რეგულაცია რჩება უცვლელი, თუმცა კანონპროექტის თანახმად, ნორმას ემატება სანქციები ამ მუხლით გათვალისწინებული ქმედების განმეორებით ჩადენისთვის, ასევე აღნიშნული ქმედების სატრანსპორტო საშუალების, მასზე მისაბმელის ან ნებისმიერი სხვა მოძრავი საშუალების გამოყენებით ჩადენისთვის. ეს უკანასკნელი ქმედება, რომელსაც თან ახლავს შესაბამისი ორგანოს ან უფლებამოსილი პირის კანონიერი განკარგულებისადმი ან მოთხოვნისადმი დაუმორჩილებლობა, ითვალისწინებს შესაბამის სანქციას.
ასევე, მუხლს ემატება შენიშვნა, რომლითაც განიმარტება დაუმორჩილებლობა ამ ნორმის მიზნებისთვის.
ამასთან დგინდება, რომ ამ მუხლით გათვალისწინებული სამართალდარღვევების არსებობისას, სამართალდამრღვევის იდენტიფიცირების შეუძლებლობის შემთხვევაში, სამართალდარღვევის საგანი კონფისკაციას ექვემდებარება, ხოლო სამართალდარღვევის საგნის კონფისკაციის შედეგად მიღებული ქონების განკარგვის წესის დადგენის უფლებამოსილება ენიჭება მუნიციპალიტეტის წარმომადგენლობით ორგანოს.
უნდა აღინიშნოს ის გარემოება, რომ მუნიციპალიტეტებში (გარდა ქალაქ თბილისის მუნიციპალიტეტისა) შესაბამისი ნებართვის გარეშე გარე ვაჭრობის შემთხვევაში ადმინისტრაციული სამართალდარღვევის საქმეს განიხილავდა საქართველოს შინაგან საქმეთა სამინისტროს შესაბამისი სამსახური, ხოლო ცვლილების შედეგად - მუნიციპალიტეტები,“- ნათქვამია კანონპროექტის განმარტებით ბარათში.
გარევაჭრობა
