„იანვრის თვეში საქართველოს ეკონომიკის 11%-იანი კლება, ნებისმიერი ადამიანისთვის ცხადყოფს, რომ ქვეყანა უმძიმეს მდგომარეობაშია. ამას ის ადამიანები ვინც ბიზნესში ვართ ჩართულები და ეკონომიკურ პროცესებს მივყვებით, ოფიციალური გამოქვეყნების გარეშეც ვგრძნობდით“, - ამის შესახებ „კომერსანტს“ გადასახადის გადამხდელთა კავშირის პრეზიდენტმა სანდრო რატიშვილმა განუცხადა.
მისივე განცხადებით, სტატისტიკის მიერ დადასტურებული ეს მონაცემები სერიოზული განგაშის ატეხვის საფუძველს იძლევა.
„განგაშის ატეხვის დროა, რომელიც ერთი შეხედვით ქვეყანაში დაწყებულია, მთავრობას თითქოს ესმის რა მდგომარეობაა და გარკვეული ღონისძიებების გატარების დაპირებებს იძლევიან, მაგრამ რეალობა რაც 11 %-იანი ვარდნის სახით გვაქვს, არის უაღრესად საგანგაშო და ძალინ ცუდი მონაცემი, რასაც რა თქმა უნდა ჩვეულებრივი ღონისძიებებით და ლოდინით, რომ რაღაცა თავისით გამოსწორდება არ ეშველება. ბევრჯერ მითქვამს და კიდევ ერთხელ ვიმეორებ, რომ საჭიროა რადიკალური, ფუნდამენტური და ძალიან ღრმა სისტემური გარდაქმნები, თორემ ქვეყანა უფსკრულისკენ მიდის“, - აღნიშნა სანდრო რატიშვილმა.
რატიშვილის განმარტებით მოლოდინები იმისა, რომ რაღაც უკეთესობისკენ შეიცვლება რა თქმა უნდა თუნდაც გამოცხადებული შემსუბუქებების ფონზე არსებობს, მაგრამ ეს შემსუბუქებებიც ერთი ნაბიჯით წინ როცა მიდის, მეორეთი უკან რჩება, რაც საქართველოს ეკონომიკისთვის წამგებიანია.
„სამწუხაროდ იმ მდგომარეობაში მყოფ ეკონომიკას, რაც საქართველოში გვაქვს ასე ვერ ეშველება. ამიტომ ახლა ჩვენ ძალიან ფუნდამენტური გადაწყვეტილებებისთვის უნდა ვიყოთ მზად და თუ ეს გაკეთდება, მხოლოდ მაშინ გვექნება უკეთესი შედეგი, თუ არადა 11%-იანი კლება გვიჩვენებს, რომ 2021 წლისთვის ეს პროცესები დადებითისკენ ვერ გადაიხრება და ვერც 2022 წელი იქნება განვითარების წელი.
ნახევრად შემსუბუქებებით წინ ვერანაირად წავალთ. საქართველოსთვის ეკონომიკის ორნიშნა ვარდნა კატასტროფის მოლოდინს აჩენს, რაც ეკონომიკურ დეგრადაციას გამოიწვევს“, - განმარტა სანდრო რატიშვილმა.
რატიშვილმა განმარტა, რომ ეს ვარდნა თავისთავად ბიზნესის ვარდნით არის გამოწვეული. მისივე თქმით, თუკი ქვეყანაში რამე ზრდა არის, ამას კერძო ბიზნესი ქმნის და ეს ვარდნა სწორედ კერძო ბიზნესის ვარდნით, დახურვით, შეზღუდვებით და ეკონომიკური აქტივობის ვარდნით არის გამოწვეული, ამ ყველაფრის ერთობლიობა კი იმ ეკონომიკურ კრიზისს ქმნის რაც დღეს სახეზე გვაქვს.
„დღეს სწორედ ბიზნესია კოლაფსში, ზოგი ბიზნესი გაკოტრების პირას არის, ბევრი გაკოტრდა, ბევრი ვეღარ ფუნქციონირებს და არ იქმნება ის დოვლათი და შემოსავალი, რაც ეკონომიკის ზრდას განაპირობებს. შესაბამისად ბიზნესისთვისაც ძალიან ცუდი მოლოდინები ყალიბდება, იმიტომ რომ თუ არ იქნება მოთხოვნა, არ იქნება მიწოდება. თუ არ იქნება მიწოდება ნიშნავს იმას, რომ კომპანიები დაიხურებიან და გაჩერდებიან“, - აღნიშნა სანდრო რატიშვილმა.
თაკო კვაჭანტირაძე