„უჩვეულო დავა მიმდინარეობს ტეხასის ენერგეტიკულ ფირმასა და საქართველოს სახელმწიფო საკუთრებაში არსებულ ნავთობკომპანიას შორის, ბრძოლა, რომელიც აერთიანებს კორპორატიული ინტრიგების, საერთაშორისო სამართლისა და აშშ-ის ეროვნული უსაფრთხოების ელემენტებს. ერთ მხარეს არის საქართველო, აშშ-ის მოკავშირე და ნატოს პარტნიორი, რომელმაც ხელი მოაწერა ნავთობის მოძიების ხელშეკრულებას ტეხასის კომპანიასთან 1990-იანი წლების შუა პერიოდში, საბჭოთა კავშირისგან დამოუკიდებლობის მოპოვებიდან მალევე. მოწინააღმდეგე მხარეა Frontera Resources-ი, ნავთობისა და გაზის კომპანია, რომელიც დააარსა ჰიუსტონის ყოფილმა მერმა და აშშ-ის ენერგეტიკის მდივნის მოადგილემ, ბილ უაითმა. „ფრონტერას“ ფინანსური პრობლემები შეექმნა და გასულ წელს ლონდონის საფონდო ბირჟიდან მოიხსნა, ხოლო საქართველოში მისი საქმიანობა წინააღმდეგობებით ხასიათდება“, - ნათქვამია სარედაქციო სტატიაში.

სტატიის თანახმად, საქართველოს ოფიციალური პირები „ფრონტერას“ საერთაშორისო არტბიტრაჟის განჩინების შეუსრულებლობაში ადანაშაულებენ. კერძოდ, სასამართლომ დაადგინა, რომ ​„ფრონტერამ“ კონტრაქტი არსებითად დაარღვია. ამასთანავე, სასამართლომ „ფრონტერა რისორსიზ ჯორჯია კორპორეიშენს“ და ფრონტერა აშშ-ს მოსარჩელეებისთვის ხარჯებისა და ზარალის ანაზღაურება დააკისრა, რაც ჯამში $6 მილიონს შეადგენს.

„ფრონტერა“ საქართველოს მთავრობისა და ქართველი ხალხის წინააღმდეგ უპრეცედენტო თავდასხმაში ჩაერთო. როგორც ჩანს, „ფრონტერა“ განწყობილია აშშ-სა და საქართველოს ურთიერთობები დააზიანოს”, - განაცხადა საქართველოს ნავთობისა და გაზის კორპორაციის გენერალურმა დირექტორმა, გიორგი ბახტაძემ.

2010 წლისთვის „ფრონტერა“ ცნობილი იყო, როგორც არშემდგარი კომპანია. „ფრონტერას“ მომავალი შემოსავლები დამოკიდებულია საქართველოში მისი ოპერაციების შედეგებზე“, - განაცხადა „ფრონტერამ“ 2015-16 წლების ფინანსურ ანგარიშგებაში.

2018 წლისთვის, „ფრონტერამ“ თავის ბევრ ქართველ დასაქმებულს ანაზღაურება ვერ გადაუხადა, რომლებმაც მომდევნო წელს თბილისში ორი საპროტესტო აქცია გამართეს.

„ფრონტერას“ ურთიერთობა საქართველოს მთავრობასთანაც გაუფუჭდა და 2018 წელს, საქართველოს ნავთობისა და გაზის ორმა სახელმწიფო ორგანიზაციამ სარჩელი შეიტანა საერთაშორისო საარბიტრაჟო სასამართლოში. მათ კომპანია კონტრაქტის დარღვევაში დაადანაშაულეს.

მას შემდეგ, რაც „ფრონტერამ“ კონტრსარჩელით უპასუხა, აპრილში სასამართლომ ერთხმად გამოიტანა გადაწყვეტილება საქართველოს სასარგებლოდ და გამოაცხადა, რომ „ფრონტერამ“ არსებითად დაარღვია კონტრაქტი.

საერთაშორისო არბიტრაჟი უფრო და უფრო მიმზიდველი ვარიანტია სამართლებრივი დავების გადაწყვეტის მიზნით და „ფრონტერას“ მხრიდან უარის თქმა საქართველოს სასარგებლოდ გამოტანილი გადაწყვეტილების შესრულებაზე ეწინააღმდეგება სამართლის ექსპერტების მოსაზრებებს, რომლებიც ამბობენ, რომ ეს გადაწყვეტილება უნდა შესრულდეს, რადგან ნეიტრალური და სავალდებულოა“, - წერია სტატიაში.