პირველ ოქტომბერს, 12:00 საათზე, თბილისის მერი, კახა კალაძე მერის მოადგილე ანდრია ბასილაიასთან და კულტურის, განათლების, სპორტისა და ახალგაზრდულ საქმეთა საქალაქო სამსახურის უფროს ირაკლი გვილავასთან ერთად, რეაბილიტირებულ სპორტულ ცენტრ „იმედს“ დაათვალიერებს. ინფორმაციას თბილისის მერია ავრცელებს.
„საფეხბურთო ცენტრის რეაბილიტაცია თბილისის მერიის ინიციატივით განხორციელდა. პროექტის ფარგლებში, აღნიშნული შენობა და მოედანი სრულად განახლდა; შეიცვალა შენობის სახურავი, კედლები და ფასადი. ასევე, დაიგო მოედნის საფარი, დამონტაჟდა განათების სისტემა და დამცავი ბადეები; სრულად განახლდა საცურაო აუზის სისტემა; მოეწყო ახალი გასახდელები და საშხაპე ოთახები. შესაბამისად, ცურვის შემსწავლელ ჯგუფებსა და საფეხბურთო სკოლას საშუალება ექნება, მოსწავლეები თანამედროვე გარემოში მიიღოს.
სპორტული ცენტრების მშენებლობისა და რეაბილიტაციის პროგრამის მიზანი ჯანსაღი ცხოვრების პოპულარიზაცია, სპორტულ ცხოვრებაში ახალგაზრდების ჩართვა, ყველა რაიონში სპორტული ცენტრების მშენებლობა და სპორტის სხვადასხვა სახეობაზე ხელმისაწვდომობის გაზრდაა.
სპორტული ცენტრის რეაბილიტაცია 2019 წლის ნოემბერში დაიწყო. პროექტის ბიუჯეტი 499 449 ლარს შეადგენს“ – ნათქვამია ინფორმაციაში.