რძის ფხვნილი იმ 9 პროდუქტიდან ერთ-ერთია, რომელზეც ფასის შენარჩუნების მიზნით, მთავრობამ სახელმწიფო პროგრამა დაამტკიცა. პროგრამის დაფინანსებისთვის კი ბიუჯეტიდან 10 მილიონი ლარი გამოყო. რატომ მოხვდა ჩამონათვალში რძის ფხვნილი, მაშინ როდესაც ქართველი ფერმერები მუშაობას აჩერებენ და საწარმოებს ხურავენ , რადგან ნატურალური რძისა და მისგან დამზადებული პროდუქტის რეალიზაციას ვერ ახერხებენ პასუხის გაცემა უჭირს ქართული რძისპროდუქტების კომპანია „ცეზარის“ ხელმძღვანელ ცეზარ კახაძეს.
მისი თქმით, რძის ფხვნილის სუბსიდირება არასწორად მიმართული თანხაა, რომელიც ქვეყნიდან გაედინება და ადგილობრივი პროდუქტის რეალიზაციასაც უშლის ხელს.
“ჩამონათვალში სურსათის სუბსიდირების დროს მოხვედრილია რძის ფხვნილი, რომელიც მოიაზრება ნატურალური რძის პროდუქტის კონკურენტად. თუმცა, დღეის მდგომარეობით, ნატურალური რძისა და მისგან დამზადებული პროდუქტის ფასს, მკვეთრად გადაუსწრო რძის ფხვნილისგან დამზადებულმა პროდუქტმა. მთავრობა კი ამას ასუბსიდირებს. არადა, შესაძლებელია, რომ ნატურალურ რძეზე გააკეთოს იგივე და ამით მეწარმესაც დაეხმარონ.რძის ფხვნილის სუბსიდირება წყალში გადაყრილი ფულია და ფერმერს აზარალებს.
ახლა სჯობს, რომ ამ პერიოდში ქართველ ფერმერს დაეხმარონ. ამ ნაბიჯით მხოლოდ ერთი და ორი ადამიანი არ მოითბობს ხელს და ქვეყნიდანაც არ გავა ის ფული, რაც რძის ფხვნილში დაიხარჯება.” -ამბობს ცეზარ კახაძე.
მთავრობის გადაწყვეტილებას არ ეთანხმება „ყველის მწარმოებელთა ასოციაციის“ თავმჯდომარე ანა მიქაძე-ჩიკვაიძე და ამბობს, რომ ნატურალურ რძეს, რომლის მარაგიც ქვეყანაში არსებობს, საგრძნობლად გადაუსწრო რძის ფხვნილით დამზადებულმა პროდუქტმა, რომელსაც მთავრობა ასუბსიდირებს.
„რატომ მოხვდა იმ 9 პროდუქტის ჩამონათვალში რძის ფხვნილი არ ვიცი, ძალიან გამიკვირდა, როდესაც ქართველი ფერმერი საწარმოს ხურავს იმიტომ, რომ პროდუქტის რეალიზაციას ვერ ახერხებს, ამ დროს ჩვენ ვასუბსიდირებთ პროდუქტს, რომელიც ნატურალური არ არის და ამით ხელს ვუშლით მეწარმის მუშაობას . არადა ახლა სჭირდებათ დახმარება და ხელშეწყობა ქართველ ფერმერებს, მოსახლეობასაც ურჩევნია ნატურალური პროდუქტი მიიღოს, ვიდრე მის შემცვლელში ორმაგი თანხა გადაიხადოს.”-ამბობს ანა მიქაძე.
შეგახსენებთ, რომ პროგრამის მიზანია 9 პროდუქტზე ( რძის ფხვნილი, ბრინჯი, მაკარონის ნაწარმი, წიწიბურა, მზესუმზირის ზეთი, შაქარი, ხორბალი, ხორბლის ფქვილი და ლობიო) სავალუტო კურსის ცვალებადობით გამოწვეული ფასის ზრდის შეჩერება სუბსიდირების გზით და, ასევე, ქვეყანაში ამ პროდუქტების საჭირო მარაგების შექმნის სტიმულირება.
კორონავირუსის გავრცელების პრევენციის მიზნით რესტორნების, სასტუმროებისა და პატარა საცხობების დახურვამ ყველზე მოთხოვნა მნიშვნელოვნად შეამცირა. შემცირებული მოთხოვნის ფონზე ყველის პატარა საწარმოები დახურვის საფრთხის წინაშე დგანან. ქვეყანაში კი რძის მარაგი, რომლის რეალიზაციასაც ფერმერი ვერ ახერხებს, შესაძლოა უვარგისი გახდეს.
ნათია ლომიძე