RDFG და ევროკავშირის მხარდაჭერილი თეთრიწყაროს ლაგი აგროვებენ თანხას საკვების გარეშე დარჩენილი ბავშვებისა და სკოლის მოსწავლეებისათვის, რომელთაც არ აქვთ საშუალება გაკვეთილებს ელექტრონულად დაესწრონ.
შემოწირული თანხა სრულად (100%-ით) მოხმარდება მოწყვლადი ოჯახების საჭიროებებს.
ახალი კორონავირუსის (COVID-19) გავრცელების შედეგად გამოწვეული კრიზისის დასაძლევად, 2020 წლის 16 აპრილს, ასოციაციამ სამხარეო განვითარება მომავალი საქართველოსთვის (RDFG), ევროკავშირის მხარდაჭერილი თეთიწყაროს ადგილობრივი განვითარების ჯგუფთან (LAG) და ადგილობრივ მთავრობასთან ერთად, დაიწყო თანხის შეგროვება თეთიწყაროში მაცხოვრებელი ყველაზე მოწყვლადი ოჯახებისათვის. შემოწირული თანხით ისინი დაეხმარებიან იმ ადამიანებს, რომლებიც ამ სიტუაციაში ელემენტარული შემოსავლისა და საკვების გარეშე აღმოჩნდნენ; ასევე, იმ ბავშვებს, რომლებსაც შესაბამისი ტექნიკის უქონლობის გამო, არ აქვთ წვდომა ელექტრონულ სასწავლო მასალაზე და შედეგად ჩამორჩებიან სკოლის კურიკულუმით გაწერილ სასწავლო აქტივობებს:
„საქართველოში კორონავირუსის პანდემიის გავრცელების გამო გამოცხადებული საგანგებო მდგომარეობის შედეგად, უამრავმა ადამიანმა დროებით ან სამუდამოდ დაკარგა არსებული სამუშაო ადგილი, შესაბამისად, დარჩა შემოსავლის წყაროს გარეშე. მათი უმეტესობა ოჯახის ერთადერთი მარჩენალი იყო. მათ შორის არიან მრავალშვილიანი ოჯახები, რომელთაც აღარ აქვთ თავის გატანისა და შვილების გამოკვების საშუალება. ისინი გაურკვეველი ვადით უცდიან ხვალინდელ დღეს, რათა შეძლონ ელემენტარული სახსრების მოძიება და ოჯახში ცოტაოდენი საკვებისა და სხვა პირველადი საჭიროების პროდუქტის მიტანა მაინც.
ამასთან, გარე სამყაროსგან მოწყვეტილი აღმოჩნდა უამრავი სკოლის მოსწავლე, რომლებსაც არ აქვთ კომპიუტერები ან სმარტ-ფონები იმისთვის, რომ შეძლონ დისტანციურად დაესწრონ სკოლის გაკვეთილებს. შესაბამისად, ისინი გაურკვეველი ვადით ჩამორჩებიან თანაკლასელებს და სიტუაციის დასტაბილურების შემდეგ, დიდი დრო დასჭირდებათ დაეწიონ თანატოლებს.
თეთრიწყაროს მუნიციპალიტეტის მოსახლეობა, რომელიც კარანტინში მოქცეული მარნეულისა და ბოლნისის მუნიციპალიტეტებთან ძალიან ახლოსაა, ერთ-ერთი ყველაზე მოწყვლადი თემი აღმოჩნდა ამ სიტუაციაში. RDFG-იმ, თეთრიწყაროს ადგილობრივ განვითარების ჯგუფთან (LAG) და ადგილობრივი ხელისუფლების წარმომადგენლებთან ერთად, განსაზღვრა ის სამიზნე ჯგუფები, რომელთაც ზემოხსენებული საჭიროებების დაკმაყოფილება ყველაზე მეტად სჭირდებათ და აგროვებს თანხას მათ დასახმარებლად:
- 35 სოციალურად დაუცველი ოჯახი, რომელთაც ყავთ 3 ან მეტი შვილი მიიღებენ სასურსათო დახმარებას.
- დავეხმარებით მინიმუმ 22 სკოლის მოსწავლეს ელექტრონული სწავლებისთვის საჭირო კომპიუტერითა და ყოველთვიური ინტერნეტ პაკეტით.
ამ ადამიანებს დაუყოვნებლივ სჭირდებათ თითოეული ჩვენგანის დახმარება! მხოლოდ ერთობლივი ძალებითა და სწრაფი ნაბიჯებით შევძლებთ პანდემიით გამოწვეული კრიზისის გადალახვას მტკივნეული დანაკარგების გარეშე და უკეთესი მომავლის შექმნას ჩვენი ქვეყნის მოქალაქებისთვის.
ასევე, თუ ფლობთ რაიმე სახის ნივთებს, განსაკუთრებით კომპიუტერებს, სმარტფონებსა და ტაბლეტებს სკოლის მოსწავლეებისათვის, და გსურთ მათი გადაცემა თეთრიწყაროს მუნიციპალიტეტში მცხოვრები მოწყვლადი ოჯახებისათვის, ჩვენ შეგვიძლია შუამავლის როლი ვითამაშოთ და დაგეხმაროთ ამ პროცესში“.
თუ გსურთ მიიღოთ ინფორმაცია, როგორ ეხმარება RDFG და თეთრიწყაროს ლაგი შემოწირული თანხით თითოეულ ბენეფიციარს, გთხოვთ, მოგვწეროთ მელზე: info@rdfg.ge
მუდმივად განახლებული ინფორმაცია იმ ოჯახების შესახებ, რომელთაც თქვენ მიერ გაღებული თანხით ვეხმარებით, შეგიძლიათ იხილოთ აქ: www.rdfg.ge www.tetritskarolag.ge
(R)