რუსეთმა კვიპროსთან ორმაგი დაბეგრვის თავიდან არიდების თაობაზე შეთანხმების დენონსაციის პროცესი დაიწყო - ეს გადაწყვეტილება იმის შემდეგ იქნა მიღებული, რაც მოსკოვი და ნიკოსია ახალ წესებზე ვერ შეთანხმდნენ. ამის შესახებ ინფორმაციას რუსეთის ფინანსთა სამინისტრო ავრცელებს.
„2020 წლის ივლისში ჩვენ კვიპროსთან მოლაპარაკებებს ვაწარმოებდით. ვითხოვდით რუსეთის ფიზიკური თუ იურიდიული პირების მიერკვიპროსში გახსნილი ანგარიშებიდან დარიცხულიდივიდენდების დაბეგრვას რუსეთის სასარგებლოს. სამწუხაროდ, უნდა ვაღიარო რომ ვერ შევთანხმდით“, - განაცხადა რუსეთის ფინანსთა მინისტრის მოადგილემ ალექსეი საზანოვმა.
აპრილში რუსეთი გაცილებით უფრო რადიკალური შემოთავაზებით გამოდიოდა.კერძოდ, მოსკოვი ყველა არსებული შეღავათის გაუქმებას ითხოვდა, რის სანაცვლოდაც კვიპროსის ხელისუფლებამ თავისი პირობები დააყენა.
„ფაქტიურად, კვიპროსმა ჩვენი პოზიციის შერბილება სცადა, რაც შეუძლებელს გახდიდა რუსეთის ინიციატივების შედეგად სასურველი ეფექტის მიღება. კვიპროსი რუსეთიდან დიდი კაპიტალების გადინებას ხელშეწყობას ისევ ცდილობს, რაც ჩვენთვის მიუღებელია“, - განაცხადა მინისტრის მოადგილემ.
მოლაპარაკებებს საბოლოო წერტილი ვლადიმერ პუტინის და მისი კვიპროსელი კოლეგის სატელეფონო საუბრის დროს დაესვა. 2019 წელს რუსეთიდან კვიპროსში 14,4 მლრდ. დოლარი იქნა გატანილი, ხოლო კვიპროსიდან რუსეთმა 8 მლრდ. დოლარის ინვესტიციები მიიღო. შეთანხმების მოქმედების პერიოდში 2018 — 2019 წლებში რუსეთიდან კვიპროსში გატანილ იქნა 3,2 ტრლნ. რუბლი. 24 მარტს რუსეთის პრეზიდენტმა ვლადიმერ პუტინმა სხვადასხვა ქვეყნებთან საგადასახადო შეთანხმებების გადახედვა ფინანსთა სამინისტროს დაავალა. მისი თქმით, რუსეთიდან კაპიტალის გატანა და გადასახადებისგან თავის არიდება უნდა დასრულდეს.
„დამატებითი შემოსავლები მრავალშვილიან ოჯახებს, უმუშევრებს, და დროებით არაშრომისუნარიან მოქალაქეებს უნდა მოხმარდეს“, - განაცხადა მან.
ახალი მიდგომა გულისხმობს, რომ კვიპროსზე რუსეთის რეზიდენტების ანგარიშებზე არაკვიპროსის, არამედ რუსეთის კანონმდებლობა გავრცელდება. ეს კი ნიშნავს, რომ რუსული კაპიტალისთვის კვიპროსულმა ოფშორებმა აზრი დაკარგა.
სადღეისოდ რუსეთს გააჩნია ორმაგი დაბეგრვის თავიდან არიდების 100-მდე შეთანხმება ისეთ პოპულარულ ოფშორებთან, როგორც ვირჯინიის კუნძულები, კაიმანის კუნძულები, სეიშელები, ბერმუდები და ა.შ.
თუმცა, კვიპროსი ამასთან ერთად ე.წ. ტრანზიტული ოფშორია, სადაც დაბალი გადასახადების გამო ცარიელი კომპანიების რეგისტრაცია ხდება, შემდეგ კი მათზე დარიცხული მოგება კლასიკურ ოფშორში გადადის.
ფინანსთა მინისტრის მოადგილის თქმით, ახალ პირობებში ბიზნესების რესტრუქტურირება კვიპროსის მეშვეობით წამგებიანი იქნება, რაც კაპიტალის რუსეთში დაბრუნებას შეუწყობს ხელს.
წყარო rbc.ru
მოამზადა თენგიზ აბლოთიამ
კვიპროსი
