მაღალი სიკვდილიანობა აშშ-ს უმსხვილესი სარიტუალო სახლების ქსელისა და სასაფლაოების მფლობელი კომპანიისთვის დაბალ შემოსავალს უტოლდება.
Service Corp international-ის აღმასრულებელმა დირექტორმა ტომ რაიანმა Forbes-თან ინტერვიუში საკუთარი ბიზნესის კრიზისზე ისაუბრა, რაც ახალი კორონავირუსის პანდემიამ და მოსახლეობის სრულმა კარანტინმა გამოიწვია. მისი თქმით, საავადმყოფოები გადატვირთულია, თუმცა სატირუალო სახლებში სიწყნარეა.
„სამწუხაროა, რომ ადამიანები მარტოდმარტო ემშვიდობებიან სიცოცხლეს. ოჯახსა და უახლოეს მეგობრებს არ შეუძლიათ დასაფლავებაზე მოსვლა. მარტივი კრემაცია ჩვენს ქვეყანაში 300 დოლარი ღირს, ხოლო დაკრძალვის ცერემონია, ყვავილებით, საფლავის ქვითა და სასახლით კი 20 000 დოლარი ან მეტი. ამიტომაცაა კრემაციის ბუმი ქვეყანაში.“- განმარტავს რაიანი.
ახალი კორონავირუსის შედეგად შტატებში უკვე 40 600 ზე მეტი ადამიანი გარდაიცვალა. სარიტუალო ბიზნესისთვის კი ეს დაღმასვლა აღმოჩნდა. SCI აშშ-სა და კანადის მასშტაბით 1471 სარიტუალო სახლისა და 482 სასაფლაოს მფლობელია. თუ კორონავირუსით გარდაცვლილების რაოდენობა 100 000-ს მიაღწევს კომპანია 12 000 გარდაცვლილის ოჯახს მოემსახურება, რაც 120 000 მილიონამდე შემოსავალს ნიშნავს. ეს კი ვარდნაა იმ კომპანიისთვის, რომელიც წლიურად 3,2 მილიარდს გამოიმუშავებს.
რაიანი აღნიშნავს, რომ პანდემია ბიზნესს ძლიერ დააზარალებს - “ჩვენი შესაძლებლობები მომსახურებაში ძალიან შეზღუდულია. კრემაციამ ბოლო პერიოდში დიდი პოპულარობა შეიძინა. რატომ უნდა გქონდეს დასაფლავების რიტუალი, თუ ვერავინ ვერ მოვა.“ - აღნიშნა ბიზნესმენმა.
იგივე ეხება წინასწარ შერჩეულ დასაფლავების ადგილებსა და საფლავის ქვების გაყიდვებსაც. შტატებში საკუთარი დაკრძალვის დაგეგმვა მიღებული ტენდენციაა. როგორც ანალიტიკოსი რეიმონ ჯეიმსი ამბობს, ხალხი გარდაცვალებაზე ახლა უფრო ფიქრობს, თუმცა არავინაა იმის განწყობაზე, რომ საფლავის ქვა და დასაფლავების ადგილები შეარჩიოს.
ადგილის წინასწარი შესყიდვები სარიტუალო ბიზნესისთვის კრიტიკულად მნიშვნელოვანია, რადგან ამით დიდი შემოსავლის მიღებაა შესაძლებელი და საბრუნავი კაპიტალის უმნიშვნელოვანეს წყაროს წარმოადგენს.
ამასთან, კორპორაცია SCI-ს დამატებითი ხარჯების გაღებაც უწევს . იანვარში სარიტუალო კომპანიამ პერსონალისთვის აუცილებელი აღჭურვილობა - ნიღბები, მაცივრები, სადეზინფექციო საშუალებები, შეიძინა ვირუსით გარდაცვლილი ადამიანების რისკ ზონიდან გადმოსაყვანად. როგორც ტომ რაიანი განმარტავს ეს ბიზნესისთვის ყოველდღიურობა გახდა.
რადგანაც ყველა ბიზნესი არსებულ სიტუაციას ერგება, კომპანია SCI-მ გადაწყვიტა კლიენტებს სტრიმინგ სერვისი შესთავაზოს, მათთვის ვისაც დაკრძალვის რიტუალზე დასწრება არ შეუძლია. ასევე უჩვეულო სიახლეა რადიო მაუწყებლობა სარიტუალო ადგილიდან 200 მილის რადიუსში, რათა ადამიანებმა შეძლონ რიტუალის სიახლოვეს ყოფნაც და მიცვალებულისთვის პატივის მიგება.
Forbes.com
მოამზადა მარიამ მორგოშიამ