5- ვარსკვლავიანი სასტუმრო მწვანე კონცხზე, მარიოტის უმაღლესი კლასის ბრენდის „Luxury Collection თავისუფლების მოედანთან, სასტუმრო და გოლფ კლუბი თაბორის მთაზე, 5 - ვარკვლავიანი სასტუმრო განმუხურში, „თანაინვესტირების ფონდმა“ ბიძინა ივანიშვილის თითქმის ყველა პროექტის გახნის თარიღი გადავადდა. „კომერსანტი“ დაინტერესდა რამ განაპირობა მრავალმილიონიანი პროექტების გახსნის თარიღების ცვლილება.
„თანაინვესტირების ფონდის“ აღმასრულებელი დირექტორი, ცოტნე ებრალიძე აცხადებს, რომ რამდენიმე სასტუმროს გახსნის თარიღის ცვლილება, განპირობებულია იმ ფაქტით, რომ უცხოელი ტურისტების ნაკადმა საგრძნობლად იკლო რაც მისი თქმით, პირველ რიგში სასტუმრო ინდუსტრიაზე აისახა. ცოტნე ებრალიძეს იმედი აქვს, რომ საერთაშორისო ავიარეისები 2021 წელს ამოქმედდება და ტურიზმის სექტორი კვლავ გააგრძელებს ზრდას.
„სასტუმროების მშენებლობის დასრულება, რომელთა გახსნაც 2020 წელს იგეგმებოდა, დროში გადავადდა, ვინაიდან დღეს საერთაშორისო ტურიზმი დაკეტილია და მოთხოვნა ბაზარზე არ არის. გახსნა კი ნიშნავს კადრების აყვანას, საბრუნავი საშუალებების შეძენას და ა.შ. რაც მნიშვნელოვან ფინანსურ ვალდებულებებთანაა დაკავშირებული და ამიტომ, სანამ მდგომარეობა არ დასტაბილურდება და ავიარეისები არ აღდგება, ამ პროცესის დაწყება ჩვენი მხრიდან გაუმართლებელი ნაბიჯი იქნება. როგორც კი მდგომარეობა დასტაბილურებას დაიწყებს და ავიარეისების აღდგენის ნიშნები იქნება, ჩვენ გახსნისათვის მზადებას დავიწყებთ და ეს პროცესი 4-6 თვეზე მეტს არ წაიღებს, უბრალოდ პირველ რიგში მდგომარეობის გამოსწორება უნდა დავინახოთ, რომ ზემოთ აღნიშნული დამატებითი ფინანსური ვალდებულებების აღება გამართლებული იყოს“, - განმარტავს ცოტნე ებრალიძე.
ცოტნე ებრალიძე „კომერსანტთან“ აცხადებს, რომ პანდემიასთან დაკავშრებული მდგომარეობის გაუმჯობესებასთან ერთად, „თანაინვესტირების ფონდი“ 2021 წელს მიზნად ისახავს, თავისუფლების მოედანზე, მარიოტის უმაღლესი კლასის ბრენდის „Luxury Collection“ სასტუმროს გახსნას, ხოლო აქსის თაუერსში სასტუმრო „პულმანი“-ს და საფეხმავლო ქუჩის გახსნას, რომელიც ჭავჭავაძის გამზირს აბულაძის ქუჩასთან დააკავშირებს და მომხმარებლს მრავალფეროვან კაფეებსა და რესტორნებს შესთავაზებს. მისივე თქმით, 2021 წელსვე იგეგმება სიღნაღში სასტუმროს მშენებლობის დასრულებაც, ხოლო ენერგეტიკის მიმართულებით ებრალიძის განმარტებით, 2021 წლის ბოლოსთვის - მტკვარი ჰესზე ძირითადი სამუშაოების დასრულება. ებრალიძე იმ პროექტებზე საუბრობს, რომელიც ფონდმა 2020 წელს სოფლის მეურნეობის, უძრავი ქონების, მრეწველობის და ენერგეტიკის მიმართულებით განახორციელა:
„როგორც მოგეხსენებათ სოფლის მეურნეობის მიმართულებით ჩვენ გვაქვს სამი პროექტი, კერძოდ: „საქართველოს სათბურის კორპორაცია“, „გეოაგრო“ და „ქართული აგრო სახლი“. უძრავი ქონების მიმართულებით საქართველოს თანაინვესტირების ფონდის პროექტების ნუსხაში წარმოდგენილია 2 პროექტი: „ აქსის თაუერსი“ და „გალერია თბილისი“, მრეწველობის მიმართულებით ფონდი წარმოდგენილია 1 პროექტის სახით, კერძოდ: „ჰაიდელბერგ ცემენტით“, ხოლო ენერგეტიკის მიმართულებით ჩვენ ვახორციელებთ სამ მსხვილ პროექტს, კერძოდ: „მტკვარი ჰესი“, „ონი 1“ და „ლენტეხი ჰესი“. ამასთანავე, როგორც მოგეხსენებათ, საქართველოს ტურიზმის განვითარების ფონდი 10-მდე პროექტს ახორციელებს, რომლებიც განვითარების სხვადასხვა ეტაპზეა. 2020 წელს ჩვენი მიზანი იყო აქტიურად გაგრძელებულიყო ყველა ის სამუშაო, რაც დაგეგმილი იყო თითოეულ პროექტთან მიმართებაში“, - განაცხადა ცოტნე ებრალიძემ.
ცოტნე ებრალიძემ საქართველოს უმსხვილესი საინვესტიციო ფონდის წლევანდელი მუშაობის შედეგები შეაფასა და განაცხადა, რომ „თანაინვესტირების ფონდმა“ 2020 წელს მნიშვნელოვანი ინვესტიციები განახორციელა.
„მსოფლიოში არსებული პანდემიიდან გამომდინარე, რა თქმა უნდა 2020 წელი ყველა სექტორისთვის გამოწვევა იყო. ჩვენც შევეცადეთ მაქსიმალურად მოვრგებოდით არსებულ ვითარებას და გვემოქმედა შესაბამისი რეგულაციების თანახმად. შედეგად, კი შეგვიძლია განვაცხადოთ, რომ როგორც საქართველოს თანაინვეტირების, ასევე ტურიზმის განვითარების ფონდმა მნიშვნელოვანი ინვესტიციები განახორციელა შემდეგი სექტორებში : ენერგეტიკა და ინფრასტრუქტურა, ტურიზმი და უძრავი ქონება, სოფლის მეურნეობა და ლოჯისტიკა, წარმოება. ჯამურად,, 2020 წელს 18-მდე პროექტში 60 მლნ აშშ დოლარამდე ინვესტიცია განახორციელდა“, - განუცხადა კომერსანტს ცოტნე ებრალიძემ.
ბაჩო ადამია