ზამთრის დადგომასთან ერთად მოიმატა ზედა სასუნთქი გზების დაავადებების და გრიპის შემთხვევები. როგორც თურქული მედია წერს ამ დღეებში თურქეთის აფთიაქებში წამლების კრიზისი შეიქმნა.
ბევრი ისეთი აუცილებელი მედიკამენტი, როგორიცაა ტკივილგამაყუჩებლები, სიცხის დამწევი საშუალებები, ანტიბიოტიკები, აფთიაქებში აღარ მოიპოვება. იწურება წამლის რეზერვებიც.
მანისის ფარმაცევტთა პალატის პრეზიდენტის დევრიმ ბალის განცხადებით, თუ გადაუდებელი ზომები არ იქნა მიღებული საზოგადოებრივ ჯანდაცვას დიდი საფრთხე ელის.
დევრიმ ბალის ინფორმაციით, წამლების დეფიციტის გამო აფთიაქებში უკვე იყო მომხმარებელსა და ფარმაცევტს შორის დაპირისპირების შემთხვევები. პრობლემის მოუგვარებლობის შემთხვევაში კი ის ამ ინციდენტების გახშირებას ვარაუდობს.
„თუ გადაუდებელი ზომები არ მიიღება, სიტუაცია გაცილებით გაუარესდება. მოვუწოდებთ ხელისუფლებას, მივიდნენ უახლოეს მორიგე აფთიაქში და დაინახონ ის ქაოსი, რომელშიც ჩვენ ვცხოვრობთ,“- აცხადებს დევრიმ ბალი.
როგორც ზოგიერთი თურქული მედია წერს, მედიკამენტების კრიზისი დაკავშირებულია ანკარას პოლიტიკასთან ფარმაცევტულ სექტორთან დაკავშირებით, რომელიც ძლიერ არის დამოკიდებული იმპორტზე. 2004 წელს ჯანდაცვის სამინისტრომ შეცვალა ფასწარმოქმნის წესები, რათა ფასები შეესაბამებოდეს ლირა/ევროს ფიქსირებულ კურსს. 2018 წლის დასაწყისში, როდესაც ევრო 3 ლირა ღირდა, ოფიციალური კურსი 2,69 ლირა იყო. თუმცა, სავალუტო არეულობის შემდეგ, რომელმაც ბოლო პერიოდში თურქეთი მოიცვა, ევროს საბაზრო ფასი გაიზარდა და დღეს დაახლოებით 5,95 ლირას შეადგენს. უზარმაზარმა უფსკრულმა საბაზრო ფასსა და ფარმაცევტული სექტორის ფიქსირებულ განაკვეთს შორის აიძულა კომპანიები შეეწყვიტათ მიწოდება, რამაც უკიდურესი კრიზისი გამოიწვია. მწარმოებლებისა და საბითუმო მოვაჭრეების ნაწილი წარმოებას და მიწოდებას ფასების ზრდის მოლოდინზე აფუძნებს და ბევრი მედიკამენტი ბაზარზე სწორედ იმის გამო არ არის ხელმისაწვდომი, რომ კომპანიები წამლების გაძვირებას ელოდებიან.
თურქული ოპოზიციის წარმომადგენლები ამბობენ, რომ ანკარას დამოკიდებულებამ კრიზისის მიმართ შეიძლება გამოიწვიოს საერთაშორისო ფარმაცევტული კომპანიების მიერ თურქეთის დატოვება.