ეროვნული ვალუტა ბოლო 7 თვის მანძილზე მინიმუმზეა, მიმდინარე კვირის განმავლობაში ლარი დოლართან მიმართებით მკვეთრად გამყარდა. ეროვნული ბანკის მონაცემებით, ლარის ოფიციალურმა გაცვლითმა კურსმა 3 მარტის ვაჭრობის შედეგად 2.7835 ლარი შეადგინა. bloomberg-ის სავაჭრო სისტემაში,15:30 საათისთვის 1 აშშ დოლარი 2.7771 ლარად ივაჭრება.
„კომერსანტი“ დაინტერსდა რა ფაქტორებმა გამოიწვია ლარის კურსის გამყარება. საკითხზე ეკონომიკის ექსპერტი კონსტანტინე მოსიძე საუბრობს:
„ეროვნული ვალუტის გამყარების ერთ-ერთი მიზეზი, რომელიც გასათვალისწინებელია არის ის, რომ ბიზნესმენები, რომლებიც ქვეყნის გარეთ მაგალითად ჩინეთში, თურქეთში და ა.შ. თანხების რიცხავდნენ ,გადარიცხვები აქვთ შეჩერებული. ბევრი ბიზნესმენი ვიცი, რომელმაც კორონავირუსის გამო დიდ წილად თანხები გააჩერა და შესაბამისად, ქვეყნიდან დოლარის გადინება შეჩერებულია. ჩინეთიდან ვისაც ჩამოჰქონდა გარკვეული სახის პროდუქტი, ყველა ადამიანს საქმიანობა შეჩერებული აქვს. აღსანიშნავია ისიც, რომ ლარის მოცულობა არ არის გაზრდილი, რაც თავისთავად მოქმედებს კურსზე“-აცხადებს კონსტანტინე მოსიძე.
„კომერსანტის“ კითხვაზე შენარჩუნდება თუ არა დოლართან მიმართებაში ეროვნული ვალუტის არსებული კურსი კონსტანტინე მოსიძე გვპასუხობს:
„სამომავლოდ კონკრეტულ შეფასებას, ვერ გეტყვით, ეს დამოკიდებულია ბევრ რამეზე, მაგალითად, ისევ და ისევ კორონავიურსზე, რამდენად სწრაფად განაახლებენ ბიზნესმენები საქმიანობას და რამდენად სწრაფად გაუშვებენ დოვლათს ქვეყნის გარეთ. ასევე დამოკიდებულია ლარის მოცულობაზე, როგორ იმოქმედებს ეროვნული ბანკი თუ რამდენ ლარს ჩაუშვებს მიმოქცევაში და ა.შ. კურსის შენარჩუნება რა თქმა უნდა შესაძლებელია, ეს დამოკიდებულია ლარის რაოდენობაზე ეკონომიკაში. ეროვნულ ბანკს ნებისმიერ დროს შეეძლო მოხმარებიდან ამოეღო გარკვეული მასა. რამდენად გააკეთებენ ამას, ამის პროგნოზირება ძალიან რთულია“ — განმარტავს კონსტანტინე მოსიძე.
ბაჩო ადამია