1- ლი დეკემბრიდან ქვეყანაში მწვანე პასპორტები ამოქმედდება, თუმცა საკლუბო სექტორი ვერც ამ რეგულაციებში მოხვდა და მათთვის მუშაობა კვლავ აკრძალულია. კლუბები ერთადერთია, რომლებსაც უკვე 21 თვეა მუშაობის შესაძლებლობა არ ეძლევათ.
კლუბ “ხიდის“ დამფუძნებელი თამუნა აქსანდერი „კომერსანტთან“ ამბობს, რომ მთელი ამ ხნის განმავლობაში, საცდელად, მხოლოდ 2 საპილოტე ღონისძიება ჩაატარეს, პარალელურად მათ ინფექციის გავრცელებაზეც ჩაატარეს კვლევა და კლუბში ინფიცირების შემთხვევა მხოლოდ 0,5% იყო, რაც სხვა სივრცეში ინფიცირების მაჩვენებელზე 20-ჯერ ნაკლებია. აქსანდერი ამბობს, რომ ყველაფრის მიუხედავად 3 დეკემბერს მუშაობას განაახლებს, რადგან ახალ წლამდე დარჩენილი ერთი თვე „ხიდის“ გადარჩენისთვის სასიცოცხლოდ მნიშვნელოვანია.
“როგორც გაირკვა, ამ “მწვანე პასპორტების“ ზონაში ვერ მოვხვდით, აგვისტოდან ჩვენ ორი საპილოტე ღონისძიება გვქონდა, რომელსაც ვირუსის 0.5%-იანი გავრცელება აჩვენა, ანუ სულ 4 კაცზეა საუბარი. ჩვენ როგორც კი გავიგეთ, რომ 1-ლი დეკემბრიდან მწვანე საშვი ძალაში შედის, გვქონდა იმის გათვლა, რომ ჩვენც ვიხსნებოდით, ერთადერთი სექტორი ვართ, ვინც გააკეთა კვლევა და ეს კვლევა დადო, ამიტომ ჩვენ სამი დეკემბრიდან მაინც გავიხსნებით, ჩვენთვის ეს ერთი თვე ძალიან მნიშვნელოვანია, რადგან იანვრის შუა რიცხვებიდან თებერვლის ჩათვლით კლუბისთვის ყოველთვის ცუდი პერიოდია და ეს გადარჩენის ერთადერთი გზაა, ძალიან ცუდ ფინანსურ მდგომარეობაში ვართ და მოთმინების დრო ნამდვილად არ გვაქვს.
ჩვენი ბიზნესი ძალიან დიდია, ასე არ არის, რომ 21 თვე დახურო და არანაირი ხარჯი არ გქონდეს, „ხიდს“ რჩენა უნდა, კომუნალურებს ვიხდით, დაცვას ხელფასს ვუხდით, თანამშრომლები შესანარჩუნებელი გვყავს, ტექნიკური პერსონალი გვყავს, ეს ყველაფერი ძალიან დიდი თანხა გვიჯდება და ყოველთვე ბანკის პროცენტი მემატება, რაც თვეში რამდენიმე ათას ევროს უდრის. ჩვენი სფეროს ასე მიგდება, მაშინ როცა სხვა 2000 კაციანი ივენთები ყველანაირი წესების დარღვევით ტარდება, წარმოუდგენელია. 21 თვეა გაჩერებულები ვართ და ლოდინის დრო უბრალოდ აღარ გვაქვს“, - აღნიშნა თამუნა აქსანდერმა.
აქსანდერი ამბობს, რომ მთავრობას წარმოდგენა არ აქვს, თუ როგორ ტარდება ღონისძიებები კლუბებში, არტისტებთან წინასწარ შეთანხმება, მათი მომზადება და ჩამოყვანაა საჭირო. შესაბამისად საკლუბო ღონისძიებები ისე არ იგეგმება, როგორც ჩვეულებრივი ივენთები, რომლებსაც ჩატარების უფლება უკვე მიეცათ.
რაც შეეხება მთავრობის მხრიდან კომუნიკაციას, აქსანდერი ამბობს, რომ ბარების და კლუბების ასოციაციას მთავრობასთან კომუნიკაცია აქვს, თუმცა, მისივე ვარაუდით, მთავრობა პროცესს წელავს და მუშაობის განახლების უფლებას არ აძლევს.
„კლუბების და ბარების ასოციაციას მთავრობასთან მოლაპარაკებები აქვს, ჩვენ ვთხოვეთ სახელმწიფოს მოეცათ კლუბის გახსნის ნებართვა, თუნდაც უფრო გართულებული რეგულაციები დაეწესებინათ, ჩვენ ანტიგენზე დაფუძნებული ტესტით მომხმარებლებს არ შემოვუშვებთ, მხოლოდ გატესტილებს და პსრ ტესტის უარყოფითი პასუხით, იმაზეც თანახმა ვიყავით რომ მომხმარებლისთვის 72 ნაცვლად 48 საათის წინ ჩატარებული ტესტის პასუხი მოგვეთხოვა. მაგაზეც წელავენ დროს, ახალი app ხომ არ იქნება დასაწერიო, ამ ახალ აპლიკაციასაც დრო უნდა. მე ვფიქრობ, რომ ცდილობენ დრო გაწელონ და ალბათ უნდათ რომ საერთოდ აღარ გაიხსნას ის ერთადერთი სექტორი, რომელსაც ერთი დღე არ უმუშავია, არანაირ ფინანსურ დახმარებას ადგილი არ ჰქონია, თან რომ გავიხსნებით ისედაც გაღატაკებულ ეკონომიკაში ამდენი არტისტი ჩამოვა რა და როგორ უნდა გადავუხადოთ მითუმეტეს ევროში ამაზე არავინ ფიქრობს, ალბათ ის დონე აწყობთ დღეს რა ივენთებიც ქვეყანაში ტარდება.
ასოციაცია ამბობს, რომ განხილვა იქნება, კარის წესები უნდა გვქონდეს, ჩვენ ისედაც ვიცით ეს წესები, გავაკეთეთ ეს საპილოტე ღონისძიებები, პირველი გაკეთდა აგვისტოში, მეორე გაიწელა არჩევნების გამო და გავაკეთეთ რვა ოქტომბერს და ახლა დეკემბერი მოდის და სამ დეკემბერსაც გავაკეთებთ“, - აღნიშნა თამუნა აქსანდერმა.
კითხვაზე, თუ რა ნაბიჯებს ისურვებდა მთავრობის მხრიდან, თამუნა აქსანდერი ამბობს, მუშაობის ნებართვას და როგორც მთელ მსოფლიოში საკლუბო სექტორს დაეხმარა სახელმწიფო, იმავეს ისურვებდა საქართველოშიც.
„ამ ეტაპზე გვინდა, რომ ნორმალურად გახსნის საშუალება მოგვეცეს და ვალები რაც შპს-ბეს და ბიზნესს დაუგროვდა ცოტა შეღავათი გაგვიწიონ, მთელმა მსოფლიომ დააფინანსა კულტურის ეს სექტორი, ჩვენ ქვეყანაში ერთი საკლუბო სფეროა განვითარებული და ამაზეც ხელი ჩაიქნიეს. უკვე ორი წელია ასე გაყინული და მიგდებული ვართ თითქმის ყველანაირი დახმარების გარეშე, მცირედი დახმარება, რაც მივიღეთ, ჩვენ რომ გადავთვლით ჩვენი ხარჯები იმის 20% -იც არ არის. ძალიან საწყენია, როდესაც ქვეყანაში ამდენი ღონისძიება ტარდება, ზოგი რეგულაციების დარღვევით და არავის აჯარიმებენ, ზუსტად ვიცი რა ხდება, ზოგი ჩაწყობით გადის ფონს, ახალგახსნილ კომპანიას თუ დააჯარიმებენ აუქმებს მერე ამ კომპანიას და ასე. ძალიან არასერიოზული რაც ჩვენ მიმართ ხდება.
ერთადერთი მესიჯი ჩვენ მიმართ რაც სახელმწიფოს მხრიდან იყო რამდენიმე თვის წინ, მერიის ინიციატივით ღამის ეკონომიკის ფონდი შეიქმნა, მაგრამ ეს მიზერია იმასთან შედარებით, რაც ამ 21 თვის განმავლობაში დაგვიგროვდა, ერთი თვის გადასახადსაც ვერ ფარავს.
მგონია რომ არ უნდათ ეს სფერო ძლიერი იყოს და ამდენი მიმდევარი ჰყავდეს და ასეთი ძლიერი იყოს. მე ჩუმად არაფრის გაკეთებას არ ვაპირებ, ჩვენ დავდებთ ღონისძიებებს, იმიტომ რომ რაღაც ღონისძიებები იქნება მაინც და კოვიდიც გავრცელდება და მერე ალბათ ისევ ჩვენ დაგვაბრალებენ. ამ სისტემით კლუბების გახსნა დიდი ხნის წინ უნდა მომხდარიყო, მითუმეტეს როცა სახელმწიფო ვერაფრით ეხმარება სექტორს“, - აღნიშნა თამუნა აქსანდერმა.
თაკო კვაჭანტირაძე