გასული წელი ლოგისტიკისთვის წარმოუდგენლად წარმატებული აღმოჩნდა, პანდემიით გამოწვეული სამომხმარებლო ბუმის და ენერგოკრიზისის პირობებში თავისუფალი კონტეინერების რაოდენობა მცირდება, ხოლო მათი ქირაობის ფასი იზრდება. ბევრი სხვა პრობლემისგან განსხვავებით, ამ მოვლენას აშკარა და ადვილად დასანახი მიზეზები აქვს. 2020 წლის და 2021 წლის პირველი თვეების საექსპორტო ჩავარდნის შემდეგ, პანდემიის შესუსტების ფონზე, ბაზრებზე ჰიპერაქტიურობა დაიწყო - ვაჭრობა, რომელიც ჩავარდნის კომპენსირებას ახდენს, იზრდება შეუჩერებლად. მსოფლიო სავაჭრო ორგანიზაციის გათვლებით, 2021 წელს გლობალური ვაჭრობა 10,8%-ით გაიზარდა. მაგრამ ვაჭრობის და ექსპორტის ზრდას ტვირთების ტრანსპორტირების საშუალებების სიმეტრიული მატება მოყოლია, ხოლო ინფრასტრუქტურა ამხელა ტვირთბრუნვისთვის მზად არ აღმოჩნდა, შესაბამისად, ფასები ზევით წავიდა. 2021 წლის მაის-სექტემბერში შანჰაი-როტერდამის მარშრუტზე ერთი კონტეინერის მომსახურების ფასი 7 500-დან 14 500 დოლარამდე გაიზარდა. ამის შემდეგ ზრდა შეჩერდა, თუმცა, დღეს სატრანსპორტო კომპანიები ამ რეალობის გრძელვადიან კონტრაქტებში დაფიქსირებას და შენარჩუნებას ცდილობენ. საზღვაო გადაზიდვების გაძვირების ფონზე კლიენტებმა ინტერესი ტრანსპორტირების ალტერნატიული საშუალებებისადმიც გამოიჩინეს, საავტომობილო ტრანსპორტი დიდი პოპულარობით სარგებლობს, იმის მიუხედავად, რომ ის ანტიკოვიდური ზომების წინაშე ძალიან მოწყვლადია.
სტატისტიკა აჩვენებს, რომ ოქტომბერში საავტომობილო გადაზიდვები 9,4%-ით გაიზარდა. საზღვაო გადაზიდვებისადმი სკეპტიციზმის ზრდას სუეცის არხში ავარიის შედეგად გაჩენილმა უზარმაზარმა საცობმაც შეუწყო ხელი. სახმელეთო და სარკინიგზო ტრანსპორტის პოპულარობის ზრდამაც უკვალოდ არ ჩაიარა და ევროპის საზღვრებთან დეკემბრის ბოლო დღეებში მატარებლების და სატვირთო ავტომობილების მრავალკილომეტრიანი რიგები დაფიქსირდა. ეს ყველაფერო 2021 წელს იყო, მაგრამ, სავარაუდოდ 2022 წელს მსოფლიო სავაჭრო ორგანიზაციის პროგნოზით ვითარება უკეთესობისკენ არ შეიცვლება, ამ წელს ექსპორტი კიდევ 4,7%-ით გაიზრდება. მაგრამ ადრე თუ გვიან გადადებული მოთხოვნა დაკმაყოფილდება, სავაჭრო ბუმიც დასრულდება და გადაზიდვებზე მოთხოვნა იკლებს. მაშინ შესაძლოა, რომ დეფიციტის პირობებში დარგი საპირისპირო პრობლემის წინაშე აღმოჩნდეს.
დღეს გასაგებია, მაგრამ ხვალ ვაგონებზე მოთხოვნა შემცირდება და სარკინიგზო კომპანიებს ახალი თავსატეხი გაუჩნდებათ თუ რა უნდა უყონ ამდენ ვაგონს. მთლიანობაში ბაზარი მომავალს ოპტიმისტურად უყურებს და ყველაფრის მიუხედავად, მაღალი ფასები გადაზიდვებზე კიდევ კარგა ხანი შენარჩუნდება. ცალკეულ სეგმენტებში, მაგალითად, ნახშირის ტრანსპორტირებაზე შესაძლებელია ფასების მერყეობა, თუმცა, მთლიანობაში არც საავტომობილო, არც სარკინიგზო, და მით უმეტეს, არც საზღვაო გადაზიდვების მნიშვნელოვანი გაიაფების პირობები ჯერ არ ჩანს და სავარაუდოდ, მინიმუმ რამდენიმე თვე არ გამოჩნდება, რაც იმას ნიშნავს, რომ გადაზიდვების ინდუსტრია ზემოგებაზე მუშაობას განაგრძობს.
წყარო: Kommersant.ru