ის, რომ ადგილობრივ ბაზარზე ქართული ჩაის წილი დაბალია, ამაში მთავარი „დამნაშავე“ იმპორტირებული ჩაიზე არსებული დემპინგური ფასებია - მიიჩნევს საქართველოს ჩაის მწარმოებელთა ასოციაციის ხელმძღვანელი თენგიზ სვანაძე. მისი თქმით, ძირითადად დემპინგური ფასებით ჩაი შემოდის აზერბაიჯანიდან.
„აზერბაიჯანი თავის პროდუქციას პრაქტიკულად არ აწარმოებს. მას მესამე ქვეყნიდან შემოაქვს ჩაი, აფასოებს და შემდეგ ყიდის ჩვენთან, რუსეთში და სხვა. აზერბაიჯანი თავად 500-დან 1000 ტონამდე ჩაის აწარმოებს, ხოლო 17-18 ათასი ტონა მისი შიდა მოხმარებაა. პლუს ამას აწარმოებს ექსპორტს, - განმარტავს „კომერსანტთან“ თენგიზ სვანაძე. მისი თქმით, დღეს ქართულ ჩაის ადგილობრივი ბაზრის 25%-ი უკავია, ხოლო 75%-ი იმპორტია.
„ქვეყანაში მუშაობს ჩაის პლანტაციების სახელმწიფო პროგრამა აქედან გამომდინარე უფრო მეტი პლანტაცია შედის ექსპლუატაციაში. ამ პროგრამის ქვეშ უკვე განხორციელდა 1000 ჰა მდე ჩაის პლანტაციის რეაბილიტაცია. შესაბამისად ბოლო პერიოდში უფრო მეტი პლანტაცია შევიდა ექსპლუატაციაში და უფრო მეტი ფოთოლი იკრიფება. ნედლეულის დეფიციტი არის. არსებობენ საწარმოები რომლებიც ძალიან ხარისხიან პროდუქციას ამუშავებენ. სხვაგვარად აზრი არ აქვს წარმოებას, რადგანაც უხარისხო ჩაი დღეს აღარ იყიდება.
ჩაის რეალიზაციას რაც შეეხება, ქართული ჩაის დიდი ნაწილი იყიდება ადგილობრივ ბაზარზე და არსებული პრაქტიკით მისი წილი მზარდია.
2000-იანი წლების დასაწყისში ქართულ ჩაის ადგილობრივი ბაზრის 5-6%-ი ეკავა, ხოლო დღეს მისი წილი 25%-მდეა. ესეც კი ძალიან ცოტა მაჩვენებელია, მაგრამ ტენდენცია მზარდია და ვიმედოვნებთ, რომ შიდა ბაზარზე მისი წილი კიდევ უფრო გაიზრდება.
ადგილობრივ ბაზარზე საქართველოში წარმოებული ჩაის წილის ზრდა უკავშირდება, როგორც ხარისხის გაუმჯობესებას ასევე რაოდენობრივ ზრდასაც, - ამბობს საქართველოს ჩაის მწარმოებელთა ასოციაციის ხელმძღვანელი.
რაც შეეხება პროდუქციის ფასს ბოლო პერიოდში ქართული ჩაის ფასმა 10-15%-ით მოიმატა. როგორც საქართველოს ჩაის მწარმოებელთა ასოციაციის ხელმძღვანელი ამბობს, ჩაის ზოგადად მაღალი თვითღირებულება აქვს, თუმცა მზარდი ინფლაციის ფონზე ჩაის ფასი საკმაოდაა გაძვირებული.
„ზოგადად ჩაის თვითღირებულება მაღალია. თუ გინდა ხარისხიანი პროდუქცია აწარმოო ხარისხიანი პროდუქცია უნდა მოკრიფო. ხარისხიანი პროდუქციის დაკრეფა კი მარტივი არის. თუ ადრე მისი ფასი 10-20 თეთრი იყო, ხარისხიანი ჩაის ფოთლის ღირებულება დღეს 2 ლარია, არის შემთხვევები როდესაც 5 ლარსაც იხდიან.
ერთი კგ ჩაის წარმოებას კი სჭირდება 4 კგ ჩაის ფოთოლი. მარტო ნედლეულში, რომ ჩაის ფოთოლი ჯდება 8 ლარი, პლუს ამას გადამუშავება და დაფასოების ხარჯები. ჩაი ზოგადად ძვირი იყო, მაგრამ ინფლაციის პირობებში მისი ფასი კიდევ უფრო გაიზარდა და ვერ უწევს კონკურენციას უცხოეთიდან შემოტანილ ნაკლებად ხარისხიან პროდუქციას“, ამბობს თენგიზ სვანიძე.