„ჩვენ, ორმა ბიზნესმენმა (კახა ოქრიაშვილი, ცეზარ ჩოჩელი) ვიცით ეს საქმე, ვიცით როგორ უნდა შევქმნათ ახალი სამუშაო ადგილები, რომელიც ქვეყანას ყველაზე მეტად სჭირდება. ფაქტია, კარგი ბიზნეს-გარემო რომ ყოფილიყო, ქვეყანაში საწარმოების ბუმი იქნებოდა... გადახედეთ, არის ბუმი?!

„100 ახალი საწარმო“, „იმპორტის ჩანაცვლების პროგრამა“, „მილიონი სამუშაო ადგილი“ - მსგავსი პოლიტიკური ლოზუნგი უკვე 30 წელია გვესმის, მაგრამ სადაა შედეგი?! აიღეთ კალამი და ჩამოწერეთ, რამდენი ახალი ბიზნესმენია საქართველოში, ვინ გამოჩნდა ბოლო რამდენიმე წელიწადში, მხოლოდ ერთი ან ორი. არის თემურ ჭყონია და ჩვენ… თითზე ჩამოსათვლელები ვართ, ვინც წარმოებაში ინვესტიციები განახორციელა“, - განაცხადა „პე-ეს-პე ჯგუფის“ დამფუძნებელმა და მოქმედმა დეპუტატმა კახა ოქრიაშვილმა ახალი პარტიის წარდგენის დროს.

„კომერსანტმა“ ერთ-ერთი მსხვილი ბიზნესმენის კახა ოქრიაშვილის მიერ წამოჭრილი პრობლემის შეფასება „საქართველოს ბიზნეს ასოციაციის“ პრეზიდენტს სოსო ფხაკაძეს სთხოვა. ასოციაციის პრეზიდენტმა ჩვენს შეკითხვას თუ რამდენად ეთანხმება ოქრიაშვილის მოსაზრებას და რა არის იმის მიზეზი, რომ ბოლო წლებში ახალი ბიზნესმენები საქართველოში არ ჩნდებიან და მხოლოდ რამდენიმეა, რომელიც წარმოებაში ინვესტიციებს ახორციელებს - თავი აარიდა და არ ისურვა.