საქართველოში წამყვანი ღვინის ექსპორტიორი კომპანიების წარმომადგენლები ქართული ღვინის პოპულარიზაციის ხელშეწყობის სახელმწიფო პროგრამის დამტკიცებასთან დაკავშირებით ,,კომერსანტთან“ ამბობენ, რომ საკანონმდებლო ცვლილება მნიშვნელოვნად შეუწყობს ხელს ღვინის ექსპორტს ამერიკისა და ჩინეთის მიმართულებით. 

,,თბილღვინოს“ შემთხვევაში, როგორც კომპანიის დამფუძნებელი ზურაბ მარგველაშვილი ამბობს, ეს არის დამატებითი ფინანსური რესურსი, რომელიც შეიძლება დაიხარჯოს კონკრეტულ ბაზრებზე როგორც ცნობადობის ამაღლების კუთხით, ასევე გაყიდვებზე.

,,პირველ რიგში, ძალიან კარგი ინიციატივაა, რომელიც მეღვინეების მხრიდან სტიმულისა და მოტივაციის ზრდას შეუწყობს ხელს. განსაკუთრებით პოზიტიურია მიდგომა, რომ პროგრამით სარგებლობისთვის გეოგრაფიული არეალი საკმაოდ ვრცელია. შემდეგ უკვე კომპანიაზეა დამოკიდებული, რა მისწრაფება აქვს და კონკრეტულად რომელ ბაზრებზე გეგმავს აქტივობას, როგორ გამოიყენებს შესაძლებლობას, რასაც სახელმწიფო ამ შემთხვევაში იძლევა. ჩვენს შემთხვევაში, ასევე ჩემი კოლეგებისთვისაც, ეს არის დამატებითი ფინანსური რესურსი, რომელსაც ამა თუ იმ ბაზარზე ცნობადობის ამაღლების კუთხით, ასევე გაყიდვებზე გამოვიყენებთ“, - ამბობს მარგველაშვილი.

მისივე ინფორმაციით, ,,თბილღვინოს“ მიერ წარმოებული პროდუქციის უდიდესი ნაწილი – 90% ექსპორტზე 30 ქვეყანაში გადის.

,,მსოფლიოს სხვადასხვა ქვეყანაში 70-ზე მეტი პარტნიორი გვყავს. კომპანიების მთავარი საზრუნავი დღესდღეობით ბაზრის დივერსიფიკაციაა, რა მხრივაც დიდი შედეგი გვაქვს. პანდემიის მიუხედავად, 2020 წელს, პანდემიამდელ 2019 წელთან შედარებით, ექსპორტზე ზრდა გვაქვს“, - დასძენს მარგველაშვილი ,,კომერსანტთან“ საუბარში.

მეღვინეებისთვის დამტკიცებულ სახელმწიფო პროგრამას აფასებს ,,თელავის ღვინის მარნის“ დამფუძნებელი ზურაბ რამაზაშვილი.

,,ძალიან კარგი ინიციატივაა, რაც ყველა მეწარმეს მისცემს საშუალებას, უფრო აქტიურად იმუშაოს ექსპორტზე ამერიკის და ჩინეთის ბაზრების მიმართულებით და გაყიდვების ნამატი ნაწილობრივ იქნას სახელმწიფოს მიერ ანაზღაურებული. ღვინის პოპულარიზაციის მიმართულებით ამას უდიდესი მნიშვნელობა აქვს, რადგან ერთიანად ზრდის სტიმულს. რაც შეეხება მარკეტინგის მიმართულებით ხარჯს, ყველა ქვეყანაში სხვადასხვაა, სპეციფიკიდან გამომდინარე, ამასთან, მუდმივად იცვლება, რის გამოც კონკრეტული ციფრის დასახელება გამიჭირდება, თუ რა თანხის დაზოგვას შევძლებთ ახალი ინიციატივის ფარგლებში“, - აცხადებს რამაზაშვილი.

ცნობისთვის, ქართული ღვინის პოპულარიზაციის ხელშეწყობის სახელმწიფო პროგრამა 9 სექტემბერს დამტკიცდა. მთავრობის შესაბამისი დადგენილება საკანონმდებლო მაცნეშიც გამოქვეყნდა. პროგრამის მიზანია საქართველოს ღვინის საექსპორტო პოტენციალისა და კონკურენტუნარიანობის ზრდა საერთაშორისო ბაზრებზე, ასევე ქართული ღვინის ცნობადობის ზრდა სტრატეგიულ/პრიორიტეტულ ბაზრებზე და საექსპორტო ბაზრების დივერსიფიცირება.

ბენეფიციარებისთვის კალენდარული წლის მანძილზე გასაცემი ანაზღაურების მაქსიმალური ოდენობა განისაზღვრება არა უმეტეს 600 000 ლარით.

პროგრამის ფარგლებში არ დაიანგარიშება საქართველოში რეალიზებული და დსთ-ის ქვეყნებში ექსპორტირებული ღვინის მოცულობა და გაწეული მარკეტინგული ხარჯები.

მარი ჩიტაია