რუსეთის დეფოლტის თემა, როგორც ჩანს, მხოლოდ საგარეო ვალებს ეხება - ამის შესახებ „ბიზნესპარტნიორს“ PMCG კვლევითი ცენტრის ხელმძღვანელმა ლექსო ალექსიშვილმა განუცხადა.
მისი განმარტებით, დეფოლტის საკითხის წამოწევა დიდი ალბათობით რუბლებში გადახდას უკავშირდება.
„როგორც მოგეხსენებათ, რუსეთმა თავის დროზევე - მას შემდეგ რაც სანქციები დაწესდა, განაცხადა, რომ გადაიხდიდა მხოლოდ რუბლში და როგორც ჩანს, ეს საკითხი უკავშირდება მხოლოდ ამ თემას - რომ ისინი იხდიან მხოლოდ რუბლში და მის ყოფილ პარტნიორ მოვალე ქვეყნებს რუბლში გადახდილი საგარეო ვალი არაფერში სჭირდებათ. ამ შემთხვევაში, ამან გამოიწვია დეფოლტის თემის დაყენება და უფრო მეტი განხილვა იქნება საჭირო, რას ნიშნავს ეს, საბოლოო ჯამში ეს ვალი როგორ, რა ვალუტაში გადაიხდება და რა ფორმატი ექნება ამას“ - განმარტავს ლექსო ალექსიშვილი.
Bloomberg-ის ცნობით, რუსეთმა საგარეო ვალზე დეფოლტი განიცადა. 27 ივნისს ამოიწურა ის საშეღავათო პერიოდი, როცა რუსეთს სახელმწიფო ობლიგაციების უცხოელი მფლობელებისთვის დაახლოებით 100 მილიონი აშშ დოლარის პროცენტი უნდა გადაეხადა, რაც ვერ შეძლო. Bloomberg-ის თანახმად, ეს 1918 წლის შემდეგ რუსეთში პირველი დეფოლტია. ქვეყანა დეფოლტის გზაზე მას შემდეგ დადგა, რაც უკრაინაში შეჭრის შემდეგ, მას სანქციები დაუწესეს. მისი სახელმწიფო ვალიდან დაახლოებით 40 მილიარდი დოლარში ან ევროშია დენომინირებული, ნახევარი კი - ქვეყნის ფარგლებს გარეთაა.
დეფოლტი
