ქართული აგროსექტორი ყველაზე მეტად შესაბამისი ცოდნის ნაკლებობას განიცდის. არაერთი საგანმანათლებლო პროგრამის მიუხედავად, კურსდამთავრებულებს საკმარისი ცოდნა არ აქვთ. მხოლოდ თეორიის შესწავლა რეალურ პრობლემებზე ეფექტიან პასუხს ვერ უზრუნველყოფს. ასეთ ვითარებაში, მოკლევადიანი, პრაქტიკულ ცოდნაზე ორიენტირებული კურსები თუ სკოლები ფერმერთა წარმატებაში უდიდეს როლს ასრულებს.

ცოდნის დეფიციტი

„დღეს უნივერსიტეტები და კოლეჯები ცალკე სამყაროა. „იბეჭდებიან“ დიპლომირებული სპეციალისტები. კურსდამთავრებულების ცოდნა კი პრაქტიკაში – თავისი ფერმა რომ მოაწყოს, ან რომელიმე კომპანიაში დასაქმდეს – საკმარისი არ არის. ერთმანეთს აცდენილია ეს ორი მიმართულება“, – ამბობს  ცხოველთა საკვების მწარმოებელი კომპანიის – ნუტრიმაქსის ტექნიკური ჯგუფის დირექტორი რევაზ ლაფაჩი.

ნუტრიმაქსში პანდემიისა და სწორედ რეალურ სივრცეში არსებული გამოწვევების საპასუხოდ გაჩნდა ფერმერთა სკოლის შექმნის იდეა.

სკოლა ფერმერებისა თუ პანდემიის გამო სოფლებში დაბრუნებული ადამიანების მხარდასაჭერად შეიქმნა. ონლაინ და ფიზიკურ სივრცეში ადამიანები შინაური ცხოველების მოვლის შესახებ პრაქტიკულ ინფორმაციას იღებენ, ვიდეოგაკვეთილებს ესწრებიან და სწავლობენ, როგორ მართონ საკუთარი მეურნეობა.

ნუტრიმაქსის ფერმერთა სკოლა ჯერ აკრედიტებულ სასწავლო პროგრამებს არ ფლობს. მთავარი აქცენტი პრაქტიკულ ნაწილს ეთმობა. Facebook–ში შექმნილ სკოლა-ჯგუფს 6 600 წევრი ჰყავს. ისინი ონლაინტრენინგებს ესწრებიან და რჩევებს გამოცდილი სპეციალისტებისგან იღებენ. 

„ადამიანებმა არ იციან, როგორ მოუარონ შინაურ ცხოველებსა და ფრინველებს, როგორ გაზარდონ წიწილა ან ხბო. სკოლა ჩვენი კერძო ინიციატივაა. ჩვენი ჯგუფის წევრებიდან 40-მა ადამიანმა 2-თვიანი კურსიც გაიარა ჩვენს ბაზაზე. ვასწავლიდით, როგორ უნდა იყოს მოწყობილი ფერმა; როგორ უნდა მართავდნენ დაავადებებს. ვესაუბრებოდით კვებასა და მენეჯმენტზე, ასევე ეკონომიკურ ასპექტებზე, რომ გამართლებული იყოს მათი საქმიანობა. ადამიანები, როგორც წესი, არ ითვლიან, რა უჯდებათ 1 კილოგრამი ხორცის ან 1 ლიტრი რძის წარმოება“, – ამბობს რევაზ ლაფაჩი.

სოფლის მეურნეობა ბიზნესია. თუ ფერმერი ამ მიმართულებას ისე არ შეხედავს, როგორც ბიზნესს, და სწორ ეკონომიკურ გათვლებს ვერ გააკეთებს, მისი წამოწყება ზარალიანი გახდება. ფინანსური საკითხების სწორად გაანალიზება ცოდნის დეფიციტში ერთ-ერთი მთავარი კომპონენტია.

რა არის გამოსავალი?

გამოსავალი დუალური განათლება და საგანმანათლებლო პროგრამებში პრაქტიკული სწავლების როლის გაძლიერებაა. ისეთი სივრცეების შექმნა, სადაც მოქმედი თუ მომავალი ფერმერები, თეორიასთან ერთად, კონკრეტული პრობლემების გადაჭრის გზებს შეისწავლიან. ევროპული გამოცდილება ცხადყოფს, რომ პროცესში ბიზნესის მეტი ჩართულობა პროფესიულ სასწავლებლებს კადრების საჭირო უნარებით აღჭურვაში ეხმარება. შედეგად, შრომის ბაზარზე მოთხოვნა-მიწოდების დისბალანსი მცირდება.

ნუტრიმაქსის ტექნიკური ჯგუფის დირექტორი განმარტავს, რომ საქართველოში პრობლემაა, როგორც პროფესიული ტექნიკური სასწავლებლების ნაკლებობა, ასევე მათი კომპეტენცია. ამიტომ ხშირად კადრების კერძო პროექტების დონეზე გადამზადება ხდება.

კომპანია საგანმანათლებლო პროგრამებში ოფიციალურად ჩართვას მომავალი წლიდან გეგმავს. ამბობენ, რომ მომავალი წლიდან საპილოტე რეჟიმში რამდენიმე პროგრამის გაშვება განიხილება. ფერმერთა სკოლის დაფუძნებამ ამ იდეის მიმართ ინტერესი გაზარდა. გაჩნდა შეთავაზებებიც, რომ სასწავლო პროგრამებს სისტემური ხასიათი მიეცეს. 

„გვინდა, რომელიმე კოლეჯთან, ინსტიტუტთან ან კოლეჯების ერთობლიობასთან სასწავლო სილაბუსები და პროექტები შევიმუშაოთ, რეალობასთან უფრო ახლოს მყოფი პროგრამები შევადგინოთ, რათა კადრი, რომელიც დაასრულებს ამ სასწავლებელს, იყოს უკვე დასაქმებული ან თვითდასაქმებული. მისი გამოცდილება და უნარები მისაღები იყოს როგორც კომპანიის, ასევე საკუთარი ბიზნესის წარმოებისთვის“, – ამბობს რევაზ ლაფაჩი.

წყარო: Business Feed