,,მსურს გამოვეხმაურო რამდენიმე ბიზნესმენის მიერ პარტია „ლელო საქართველოსთვის“ მიერ შემუშავებული 6 მილიარდ ლარიან ანტიკრიზისული პაკეტის იმ ნაწილის შეფასებას, რომელიც ეხება ბიზნესისთვის 3 მილიარდი მოცულობის საგარანტიო ფონდის შექმნას. პირველ რიგში, მინდა გაზი გავუსვა, რომ „ლელოს“ ყოველ ინიციატივას წინ სდევს ანალიტიკური ჯგუფის მიერ მონაცემების ანალიზი, ასევე, საერთაშორისო გამოცდილებისა და ჩვენი ქვეყნის რეალური საჭიროებების კვლევა. ამ გუნდმა დაწვრილებით შეისწავლა საგარანტიო ფონდის თურქული, იაპონური და აღმოსავლეთ ევროპული მოდელები.

„ლელოს“ იდეა მდგომარეობას იმაში, რომ დღეს, პანდემიის გამო იძულებით გაჩერებულ და კრიზისში მყოფ ბიზნესს, განსაკუთრებით მის მცირე და საშუალო ზომის ნაწილს, სასიცოცხლოდ ესაჭიროება მარტივად ხელმისაწვდომი და იაფი ფინანსური რესურსები, რათა შეინარჩუნოს სამუშაო ადგილები, აღადგინოს და განავითაროს მისი საქმიანობა შეზღუდვების მოხსნის პარალელურად. თუმცა, კრიზისულ პერიოდში, გაზრდილი რისკების გამო, კომერციული ბანკები თავს იკავებენ ბიზნესის დაკრედიტებისგან.

ლელოს მოდელით, უნდა შეიქმნას ბიზნესის მხარდამჭერი სახელმწიფო საგარანტიო ფონდი, რომელიც სიცოცხლისუნარიანი კომპანიებისთვის გასცემს საკრედიტო გარანტიას იმ პირობით, რომ ისინი შეინარჩუნებენ სამუშაო ადგილების მინიმუმ 80%-ს და განავითარებენ ბიზნესს. ფონდის გარანტია კომპანიის სასარგებლოდ გაიცემა ბანკის მიერ გაცემული სესხის ძირის 90%-მდე ოდენობაზე, ხოლო თუ ეს კომპანია ექსპორტითაა დაკავებული, მაშინ ის შეიძლება გავრცელდეს სესხის 100%-ზეც. ასევე, შესაძლებელია რომ პანდემიით გამოწვეული კრიზისის პერიოდში ზოგიერთ გაცემულ სესხზე საპროცენტო განაკვეთი იყოს 0%, თუკი გაცემული სესხის მომსახურების ხარჯის გაყოფაზე ბანკები და ფონდი შეთანხმდებიან.

თუ საგარანტიო ფონდის მოცულობა იქნება 3 მილიარდი ლარი, ის ხელს შეუწყობს ბიზნეს-სესხების მთლიანი პორტფელის 30 მილიარდ ლარამდე გაზრდას, რომელიც დღეს 21 მილიარდ ლარს შეადგენს.

ბიზნესისთვის აღნიშნული საგარანტიო მომსახურება იქნება უფასო, ხოლო კომერციული ბანკები გარანტიის გამოყენების შემთხვევაში საგარანტიო ფონდს გადაუხდიან საკომისიოს, რაც შემდგომში უზრუნველყოფს საგარანტიო ფონდის მდგრადობას. თუმცა, მნიშვნელოვანია, რომ კონკრეტული კომერციული ბანკის მთლიანი სასესხო პორტფელში უმოქმედო სესხების წილი არ უნდა აღემატებოდეს 10%-ს კრიზისის პერიოდში.

ფონდი კრიზისის შემდეგაც გააგრძელებს ფუნქციონირებას და ხელს შეუწყობს ახალი სამუშაო ადგილების შექმნას შემდგომი წლების განმავლობაში. ჩვენი გათვლებით, ლელოს მოდელის განხორციელება ქვეყანაში შემდგომი 4 წლის განმავლობაში 200.000 ახალ სამუშაო ადგილს შექმნის.

ბოლოს, მცდარია მოსაზრება იმის შესახებ, რომ საგარანტიო ფონდი ადრეც შეიქმნა და მან არ იმუშავა. ეკონომიკის სამინისტროს ჰქონდა მხოლოდ იდეა, რომელიც ვერასდროს დანერგა რეალობაში. შესაბამისად, ქართულ კომპანიებს მსგავს სერვისზე წვდომა არასდროს ჰქონიათ’’ - განაცხადა პოლიტიკური გაერთიანება ,,ლელო საქართველოსთვის’’ ერთ-ერთმა ლიდერმა გიგლა მიქაუტაძემ.