საქართველოს მთავრობამ სამუშაო სივრცეში უსაფრთხოებისა და ჯანმრთელობის დაცვის მინიმალური მოთხოვნების შესახებ ტექნიკური რეგლამენტი დაამტკიცა. რა პირობები უნდა იყოს დახურულ სამუშაო სივრცეში, ვის ეხება ახალი რეგულაციები და რამდენად მომზადებულია ამისთვის ბიზნესი?

როგორც, საქართველოს ბიზნეს ასოციაციის იურიდიულმა დირექტორმა ნიკა ნანუაშვილმა ტელეკომპანია „ბიემჯის“ ეთერში განაცხადა, დადგენილების პროექტი კერძო სექტორთან გავლილია და კონსულტაციები პროექტთან დაკავშირებით მთავრობასა და კერძო სექტორს შორის დაახლოებით წელიწადზე მეტ ხანს გრძელდებოდა. ამ დროის განმავლობაში რამდენიმე სამუშაო ვერსია მომზადდა, თუმცა დღეს არსებული რეგლამენტი პირვანდლისგან მნიშვნელოვნად განსხვავდება. სრულად არის გათვალისწინებული ის შენიშვნები, რაც ბიზნესს ჰქონდა.

„ამ დადგენილების მიღება ერთის მხრივ  გამოწვეული იყო ევროკავშირთან ასოცირების პროცესში აღებული ვალდებულებებით, მეორეს მხრივ კი, შრომის საერთაშორისო კონვენციებით გათვალისწინებული ვალდებულებებით. მთავრობის დადგენილება, რაიმე ისეთ სპეციფიკურ ან რთულად შესასრულებელ ვალდებულებებს ბიზნესის 99%-ს არ უწესებს. 

ეს მოთხოვნები ვრცელდება ყველა ბიზნესზე, იმ სამუშაო ადგილებზე, რომლებიც განთავსებულია ექსპლუატაჩიაში მიღებულ შენობებში. თუმცა, დადგენილების პროექტი ითვალისწინებს ერთ მნიშვნელოვან გამონაკლისს - ეს მოთხოვნები რა გავრცელდება იმ შენობებზე, რომელიც დიდი ხნის აშენებულია და დადგენილების შესასრულებლად, საჭირო იქნებოდა შენობის რეკონსტრუქცია, ან კაპიტალური რემონტი. ეს კომპრომისიც მიღწუელ იქნა, რათა ბიზნესს დიდი დანახარჯი არ ჰქონოდა. შესაბამისად, სხვა შემთხვევებში, არ უნდა წარმოვიდგინოთ, რომ რამე მნიშვნელოვან დანახარჯის გაღება მოუწევს ბიზნესს“, - აღნიშნა ნიკა ნანუაშვილმა.

ნიკა ნანუაშვილის თქმით, აქ საუბარია საბაზისო, მინიმალურ მოთხოვნებზე, მაგალითად სამუშაო სივრცეს უნდა ჰქონდეს ფანჯარა, ან უნდა ჰქონდეს ხელოვნური ვენტილაცია, უნდა ჰქონდეს სინათლის წყარო,  თუ ეს არ არის ბუნებრივი განათება უნდა იყოს გარკვეული მინიმალური სტანდარტის განათება სამუშაო ოთახში, შენობა უზრუნველყოფილი უნდა იყოს სასმელი წყლით, თუ ეს  არ იქნება სასმელი წყლის ქსელი, უნდა იყოს წყლის დისპენსერები ან  სხვა ფიზიკური მატარებლები.