„აწარმოე საქართველოს“ FDI გრანტის პროგრამა, 2020 წელს ამოქმედდა, თუმცა მიმდინარე წელს მასში ცვლილებები შევიდა და საქართველოში შემომსვლელი ინვესტორების მოთხოვნებიდან გამომდინარე, მოდერნიზაცია განიცადა. რა იყო პროექტის შექმნის იდეა და ვისზე გაიცემა გრანტები, ამ და სხვა თემებზე, რადიო „კომერსანტის“ გადაცემაში, „კომერსანტის დილა“ „აწარმოე საქართველოს“ ინვესტიციების დეპარტამენტის უფროსმა დავით ტავლალაშვილმა ისაუბრა.
მისი თქმით პროექტის შექმნის იდეა ინვესტიციების წახალისება იყო, პროექტი 2020 წელს მაშინ შეიქმნა, როდესაც პანდემია ყველაზე აქტიურ ფაზაში იყო და ინვესტიციებზე საუბარი რთული იყო.
„დღეს როდესაც შემოვიდა სიცხადე და საერთო ბაზარი ნათლად დავინახეთ, კონკურენტუნარიანობის გაზრდის მიზნით ჩვენი პროგრამაც დავხვეწეთ, დღეს გვყავს პირველი ბენეფიციარები, რომელიც ცოტა ხნის წინ ჩაერთნენ კომპანიაში, ეს არის IT კომპანია , გარდა ამისა წლის ბოლომდე გვაქვს რამდენიმე კომპანიასთან მოლაპარაკება, რომლებთანაც გავაფორმებთ ხელშეკრულებებს.
ეს პროგრამა კონკრეტული სექტორების წახალისებისთვისაა, მასში შედის მხოლოდ მაღალტექნოლოგიური და მაღალი ღირებულების შემქმნელი ისეთი სექტორები, როგორიცაა ელექტრო ნაწილები, თვითმფრინავის ნაწილების და ავტო ნაწილების წარმოება, ასევე შედის ლოგისტიკა და თვითმფრინავების შეკეთება, მომსახურება და ბიზნეს სერვისების „აუთორსგინგი“, რაც თავის ნაწილში მოიცავს, ე.წ. PBO სექტორს. ეს სექტორები იმის მიხედვით ავირჩიეთ, რომ ისინი ქვეყანაში ქმნიან ცოდნას და ასაქმებენ ადამიანებს და არის საშუალოზე მაღალი ხელფასები. ამ სექტორების არჩევის მოტივაცია ასევე იყო ქვეყანაში მაღალტექნოლოგიური სექტორების განვითარება, სადაც ხალხი დასაქმდება“, - აღნიშნა დავით ტავლალაშვილმა
რაც შეეხება გრანტის მიღების პირობებს, ტავლალაშვილი ამბობს, რომ გრანტის მისაღებად მთავარი მოთხოვნა არის ის, რომ კომპანიის 50% -ზე მეტი წილის მფლობელი უცხოური კომპანია უნდა იყოს და ჰქონდეს საერთაშორისო გამოცდილება.
„ამის მოთხოვნის მთავარი მზიანი არის ის, რომ გამოცდილი უცხოური კომპანიები მოგვეზიდა, რომელიც შემდეგში დაგვეხმარებიან იმაში, რომ სხვა უცხოური კომპანიებიც მოვიზიდოთ. რაც შეეხება ვალდებულებებს, არც ისე მაღალი ვალდებულებებია. მინიმალური მოთხოვნა, წარმოების ლოგისტიკის და თვითმფრინავების შეკეთების სექტორში 8 მილიონი ლარია და ბიზნეს პროცესებში, აუთსორსინგის მიმართულებით მინიმალური მოთხოვნა არის 2 მლნ ლარი. რაც შეეხება დასაქმებას, წარმოებაში არის 100 ადამიანი დასაქმებული , PBO სექტორში 200 ადამიანი, ლოგისტიკაში და IT კომპანიაში არის 50 ადამიანი დასაქმებული“, - აღნიშნა დავით ტავლალაშვილმა.
რაც შეეხება დაინტერესებას, დავით ტავლალაშვილ ამბობს, რომ გამომდინარე იქიდან, რომ ევროპა ენერგოკრიზისისთვის ემზადება, ასევე მსოფლიო გამოდის პანდემიიდან ისინი დივერსიფიცირებას ცდილობენ და მათ საქართველოზე შეაჩერეს არჩევანი, რადგან საქართველოში, როგორც კანონმდებლობის, ასევე სამუშაო ძალის კუთხით ძალიან კარგი გარემოა.
რაც შეეხება კადრების დეფიციტს, ტავლალაშვილი აღნიშნავს, რომ საქართველოში დეფიციტის პრობლემა იმ სექტორებში დგას, რომელიც საქართველოში ნაკლებად არის განვითარებული.
„აქვე აღვნიშნავ იმ ინიციატივას რომელიც განათლების სამინისტროს , ეკონომიკის სამინისტროს და სავაჭრო სამრეწველო პალატის საერთო ინიციატივით დაიწყო ეს უნარების სააგენტო, რომელიც რეალურად სამუშაო მოთხოვნასა და განათლებას შორის არსებულ GAP - ს ამცირებს. უნარების სააგენტოს სასწავლო პროგრამებს კომპანიები თვითონ შეადგენენ და შესაბამისად მოსწავლეები, რომლებიც ამ სასწავლებელში ისწავლიან , ისწავლიან ზუსტად იმ დარგებს, რაც ბიზნესს სჭირდება“, - აღნიშნა დავით ტავლალაშვილმა.
თაკო კვაჭანტირაძე