პანდემიის გამო დისტანციურ რეჟიმზე გადასული სწავლება და აბიტურიენტებისთვის მოსამზადებელი რთული რამდენიმე თვე-განათლების ზოგიერთი ექსპერტის მოსაზრებით, საკმარისი საფუძველია იმისთვის, რომ ყველა აბიტურიენტს, ვინც წელს ერთიან ეროვნულ გამოცდებს აბარებს, სწავლება დაუფინანსდეს. განათლების სფეროს სპეციალისტების მიერ მთავრობისა და სამინისტროსთვის შეთავაზებულ რეკომენდაციებს შორის ზემოთხსენებული ინიციატივაც მოხვდა.
არის თუ არა სწავლების სრულად დაფინანსების იდეა მიზანშეწონილი და იზიარებს თუ არა ამ იდეას დარგის ყველა სპეციალისტი, ამასთან დაკავშირებით „კომერსანტთან“ საკუთარი პოზიცია განათლების ექსპერტმა გია მურღულიამ დააფიქსირა, რომელიც მიიჩნევს, რომ საჯაროდ და მითუმეტეს რეკომენდაციის სახით ასეთი პოზიციები მისი კოლეგების მხრიდან რეალობას და არსებულ შესაძლებლობებს უნდა შეესაბამებოდეს. ამასთან, მისივე აზრით, აუცილებელია მსგავსი გადაწყვეტილებებით სხვა არანაკლებ მნიშვნელოვანი დარგი არ დაზარალდეს.
„ბუნებრივია, უფასო განათლება ყველაზე კარგია, რაც შეიძლება გაკეთდეს, მაგრამ მეორეა ის საკითხი, თუ რისი შესაძლებლობა აქვს სახელმწიფოს.ისე, რამდენი რამე გვინდა იყოს უფასო. საერთოდ, რაც უფრო უკეთ ცხოვრობს ადამიანი, მით უკეთესი, მაგრამ სახელმწიფო ყოველთვის უნდა ამოდიოდეს ორი პრინციპიდან - რა არის საზოგადოების ინტერესი და რა შესაძლებლობა აქვს ქვეყანას ამ ინტერესის დაკმაყოფილების - ამ ორის ბალანსით უნდა იყოს მიღებული გადაწყვეტილება.
ისინი, ვინც საჯაროდ აცხადებენ თავიანთ მოსაზრებებს, უნდა ითვალისწინებდნენ რაციონალურ შესაძლებლობებს. დაისვა საკითხი და დავაცადოთ სახელმწიფოს, თუ შეძლებს ამის განხორციელებას და რამდენად იქნება მიზანშეწონილი ამის გაკეთება ისე, რომ სხვა არანაკლებ მნიშვნელოვანი დარგები არ დაზარალდეს.
ცოდნის შეძენას სირთულე ყოველთვის ახლავს, ეს დამოკიდებულია მასწავლებელსა და მოსწავლეზე. თუ სწავლა არ არსებობს იქ სწავლებას დიდი მნიშვნელობა არ აქვს. მონდომების შემთხვევაში, იმ ბარიერის გადალახვა, რომელიც ახლა მაღალი არ არის, ყველა აბიტურიენტს შეეძლება. ისინი, ვინც ვერ აბარებენ ამ გამოცდებს, ჩემი შეფასებით, ადრეც ძალიან ზარმაცობდნენ“. - აღნიშნავს გია მურღულია.
განათლების ექსპერტმა დისტანციური სწავლების მეთოდიც შეაფასა, რომელიც მისი აზრით, არა მხოლოდ მოსაწავლეებისთვის, არამედ მასწავლებლებისთვისაც დიდი გამოწვევაა.
„ონლაინ გაკვეთილები და ახლად შექმილი ტელესკოლა, ძალიან ეხმარება ბავშვებს. აქ საუბარია 16 წუთიან გაკვეთილებზე, რაც მასწავლებელს ახალ ამოცანას აძლევს, რომ ლაკონურად და არსებითად დაინახოს ის მასალა, რაც უნდა გადასცეს მოსწავლეს. ეს ეხმარება მას, რომ ყველაზე მნიშვნელოვანი მომენტები ამა თუ იმ მასალაში ჩამოაყალიბოს სისტემურად და გადასცეს ბავშვებს. ჯერჯერობით ე.წ უკუკავშირი აქ არ არის, თუმცა, ეს კომპონენტი ძალიან მნიშვნელოვანია და არის შესაძლებლობა რომ ამ უკუკავშირზეც ვიფიქროთ.“ - განმარტა ფილოლოგმა.
ცნობისთვის: 2019 წელს ერთიანი ეროვნული გამოცდებისთვის 40 000 ზე მეტი აბიტურიენტი დარეგისტრირდა, 28 000 -ზე მეტი სტუდენტი გახდა. ნებისმიერ აკრედიტებულ უმაღლეს სასწავლებელში მინიმალური წლიური გადასახადი 2250 ლარია. აბიტურიენტების იგივე ან მიახლოებული რაოდენობის შემთხვევაში, სახელმწიფოს მათი პირველი წლის დასაფინანსებლად 60 მილიონ ლარამდე სჭირდება. ჯერჯერობით უცნობია განათლების ექსპერტების რეკომენდაციებს რა გამოხმაურება მოჰყვება შესაბამისი ორგანოებისგან და დაუფინანსდება თუ არა ყველა აბიტურიენტს სწავლება.
მარიამ მორგოშია