ევროპის ჩემპიონატი ფეხბურთში, რომელიც 11 ივნისს რომში დაიწყო, უნიკალური ტურნირია - ის რამდენიმე ქვეყანაში მკაცრი რეგულაციების ფონზე მიმდინარეობს. შეხვედრების დიდი უმრავლესობა ნახევრად ცარიელ სტადიონებზე ტარდება.

ევროპის ჩემპიონატის სხვადასხვა ქვეყნებში ჩატარების იდეა უეფას პრეზიდენტმა მიშელ პლანიტიმ  ჯერ კიდევ 2012 წელს გამოთქვა. ეს საკმაოდ რთული ამოცანაა - ლოგისტიკური პრობლემების და განსხვავებული კანონმდებლობის გამო.

2014 წელს პლატინი თავისი პოსტიდან გადადგა და ეს იდეაც წარსულს ჩაბარდა. ყველაფერი შეცვალა პანდემიამ - საბოლოოდ ევრო-2020-ის 12 ქვეყანაში ჩატარება გადაწყდა.

პლატინის ერთ-ერთი მთავარი არგუმენტი ამ მოდელის სასარგებლოდ ფინანსების ეკონომია იყო, და ეს მოსაზრებაც გამართლდა. ექვსმა ქალაქმა, რომელიც ევრო-2020-ს მასპინძლობს - რომმა, სევილიამ. გლაზგომ, ბუდაპეშტმა, ბუქარესტმა, და კოპენჰაგენმა - მომზადებაზე 6 მლნ. ევრომდე დახარჯეს. ეს სახსრები ძირითადად ლოგისტიკას, სტადიონების მოდერნიზებას, ოფიციალური პირების განთავსებას, ფან-ზონების შექმნას, პერსონალის დატრენინგებას, რეკლამას და საორგანიზაციო კომიტეტების საქმიანობას ხმარდება.

რაც შეეხება მოგებას, როგორც წესი, ასეთი მასობრივი ღონისძიებებისგან ძირითადად მოგებულები სასტუმროები, რესტორნები, კვების პროდუქტების მწარმოებლები და გამყიდვლები, მას-მედია და ტოტალიზატორები არიან. თუმცა 2021 წელს ყველაფერი სხვანაირად იქნება.

ევრო-2020 მასპინძელ ქალაქებში ტურისტულ ნაკადს უმნიშვნელოდ გაზრდის. ზოგიერთი ქვეყანა დღესაც დახურულია, ევროკავშირის რამდენიმე ქვეყანას კი ბრიტანეთთან საზღვარი ჯერაც არ გაუხსნია.

თანაც, გულშემატკივრების კვოტა წინა ჩემპიონატების  მხოლოდ  35%-ს შეადგენს, შესაბამისად, ვიზიტორთა რაოდენობაც წინა წლებთან შედარებით ბევრად ნაკლები იქნება.

ევრო-2020-ის ყველაზე ღია ქალაქი ბუდაპეშტი იქნება, რომელიც 4 მატჩს მიიღებს, ხოლო უნგრეთის დედაქალაქის სტადიონი „პუშკაშ არენა“ იქნება ერთადერთი სტადიონი, რომელიც 100%-ით შეივსება. ეს მაჩვენებელი სანქტ-პეტერბურგში 50%, ხოლო სხვა ქალაქებში ამაზე ნაკლები იქნება.

სწორედ ევრო-2020-ის იმედი აქვს ბუდაპეშტის ტურისტულ და სარესტორნო ბიზნესს, რომლის კლიენტთა 70-80% პანდემიამდე უცხოელები იყვნენ. ქვეყნის ხელისუფლება 20 000 ტურისტს ელოდება.

ესპანეთის ქალაქ სევილიაშიც ოპტიმისტური განწყობაა - ანდალუზიის რეგიონის მთავრობის სპორტის მინისტრის ხოსე მარია არაბალას თქმით, 4 მატჩი, რომელიც ქალაქში ჩატარდება, ტურისტულ ბიზნესზე დადებითად აისახება. ქალაქის ხელისუფლების პროგნოზით, მოგება მინიმუმ 215 მლნ ევრო იქნება.

ამ თანხაში შედის  პირდაპირი მოგება - საშუალოდ ყოველ შეხვედრას 16 000 უცხოელი დაესწრება, რომელთაგან თითოეული 3 დღის მანძილზე დღე-ღამეში მინიმუმ 380 ევროს დახარჯავს. დანარჩენ 142 მლნ-ს  ქალაქი უეფასგან შეხვედრების ტრანსლირების უფლებების სანაცვლოდ ელოდება.

წაგებული არც უეფა დარჩება  - 2021 წელს უეფას პროგნოზით შემოსავალი 300 მლნ ევროს მიაღწევს. თითოეული მატჩიდან ევროპის საფეხბურთო ასოციაციის შემოსავალი $43 მლნ იქნება.

წყარო: sportrbc.ru