მეტავერსი – ვირტუალური სივრცე, რომელიც ადამიანებს წარმოსახვით სამყაროში მოხვედრის საშუალებას აძლევს, დღესდღეობით საკმაოდ აქტიური განხილვის თემაა.
ეს არის საერთო, ონლაინ 3D სივრცე, სადაც მომხმარებლებს ერთმანეთთან და კომპიუტერის მიერ გენერირებულ ობიექტებთან და ავატარებთან ინტერაქცია შეუძლიათ.
როგორ მოვხვდეთ მეტა სამყაროში და რა მომავალი აქვს მას, ამ საკითხზე “ნავიგატორი” ინფორმატიკის დოქტორს და ხარისხის უზრუნველყოფისა და სტრატეგიული განვითარების სამსახურის უფროსს, პაატა გოგიაშვილს ესაუბრა. როგორც გოგიაშვილი აცხადებს, მეტავერსის გამოყენება შედარებით ახალია.
„ერთი მიმართულება იყო, ზუმი (Zoom), მითი (Meet) და ასეთი პლატფორმები. ხოლო მეორე მიმართულება – თამაშები. მეტავერსის შექმნას ონლაინ თამაშებმა ძალიან შეუწყო ხელი. ამას დიდი ისტორია ჯერჯერობით არ აქვს. ჯერ ტექნოლოგიების განვითარებაა საჭირო, რათა მეტად ხელმისაწვდომი და პრაქტიკული გახდეს.
მეტავერსის გამოყენებას ტერიტორიული ხასიათი არ აქვს, რადგან ეს ონლაინ სივრცეა. შესაბამისად, ყველა ქვეყნიდან თანაბრად არიან ადამიანები.
ამ მეტა სამყაროებში ცდილობენ, რომ რეალური სამყაროს ასლი გააკეთონ. მაგალითად, პარიზის ასლს აკეთებენ და შეგიძლიათ ქალაქის ერთ-ერთ კაფეში მეგობრებს ვირტუალურად შეხვდეთ.
ცხადია, მეტავერსის შექმნელებს, რეალური კომერციული მიზნებიც ამოძრავებთ. საუბარია, რომ გაყიდონ და გააქირაონ სპეციალურად შექმნილი სამუშაო ან გასართობი სივრცეები“, განმარტავს „ნავიგატორთან“ ინფორმატიკის დოქტორი.
პაატა გოგიაშვილი აცხადებს, რომ ამ ეტაპზე საქართველოში მეტავერსს აქტიურად არ იყენებენ.
„საქართველოსთვის ეს საკმაოდ ახალია. ქართველებს გვიყვარს ყოველგვარი მსგავსი სიახლის ატაცება და გამოყენება, რაც ძალიან კარგია. ამ ეტაპზე, საქართველოში მეტავერსს აქტიურად არ იყენებენ. ამას თავისი მიზეზებიც აქვს. როგორც აღინიშნა, მეტავერსში მოსახვედრად შესაბამისი აღჭურვილობა და გარემო შეიძლება დაგვჭირდეს, რაც არამარტო ჩვენთან, არამედ სხვაგანაც ფართოდ ხელმისაწვდომი არ არის.
მეტავერსის მეტად განვითარების შემთხვევაში, მისი აქტიური გამოყენება მომავალში უფრო დაიწყება. ამ ეტაპზე საწყისს სტადიაზე ვართ, როგორც საქართველოში, ასევე სხვაგანაც“, — ამბობს ინფორმატიკის დოქტორი.
მასალა მომზადებულია „ნავიგატორის“ მასალის მიხედვით