„ მთავრობამ კარგად მოფიქრებული ანტიკრიზისული სტიმულირების პაკეტი უნდა შექმნას.  რაც აქამდე გაკეთდა ბიზნესისთვის,  ეს მცირედი ნაწილია და მხოლოდ დროებით დამაიმედებელი.“ - კომპანია „დიო“-ს თანადამფუძნებელი და აღმასრულებელი დირექტორი თამაზ დაუშვილი „კომერსანტთან“ მთავრობის მიერ ეკონომიკური კრიზისის მინიმუმამდე დაყვანის აუცილებლობაზე საუბრობს.

ბიზნესმენმა  ხაზი გაუსვა, რომ კორონავირუსით გამოწვეულ ეკონომიკურ კრიზისთან გამკლავების მაგალითი საქართველომ მსოფლიოს წამყვანი ქვეყნებისგან უნდა აიღოს, ამასთან აღნიშნა, რომ ჩვენი ქვეყნის მწირი რესურსების ფონზე განსაკუთრებით მნიშვნელოვანია გონივრული და მოქნილი გეგმის შემუშავება, რათა აღმასვლის ეტაპი ქვეყანაში სწრაფად დადგეს.

„ზოგადად, სიტუაცია ყველასთვის უჩვეულოა და ეკონომიკური პრობლემები ამ ვირუსის დაძლევის შემდეგ ბუნებრივია მოსალოდნელია. ძალიან მნიშვნელოვანია, რომ მთავრობამ ისეთი ანტიკრიზისული გეგმა შეიმუშავოს, რომელიც ეფექტური იქნება და ზარალს მინიმუმამდე დაიყვანს. ახლა აშკარაა, რომ ეკონომიკურ ზრდაზე საუბარი ზედმეტია და  ვარდნა იქნება არა მხოლოდ საქართველოში, არამედ გლობალურად. ჯერჯერობით მცირედი გაკეთდა - ვგულისხმობ იმ სექტორებისთვის შეღავათებს, რომელსაც პანდემია ყველაზე მეტად ახდენს ნეგატიურ გავლენას, ეს ეხება სასატუმრო და ტურისტულ სექტორს. ამან შეიძლება რაღაც პოზიტირური ფონი შექმნა, მაგრამ რასაც მსოფლიო ლიდერი ქვეყნები, ამერიკა, კანადა, იაპონია, გერმანია, საფრანგეთ  გეგმავენ,  შეუდარებელია ჩვენს ღონისძიებებთან. მეტი უნდა გაკეთდეს, ეკონომიკის სტიმულირების პაკეტი უფრო მასშტაბური უნდა იყოს. აქვე მნიშვნელოვანია კომპლექსურობა - გადასახადების შემცირება, გადავადება, საკრედიტო რესურსების გამოყოფა , პირდაპირი დახმარება მოსახლეობისთვის. წამყვან ქვეყნებს გასაგებია, რომ ამის რესურსი აქვთ, მაგრამ ჩვენთვისაც აშკარაა რა უნდა გაკეთდეს მათი მაგალითის გათვალისწინებით.  მთავარია, როგორ მოახერხებს მთავრობა ამ რესურსების მოძიებას და ეფექტურად  განაწილებას.  ასეთ შემთხვევაში ზარალი ეკონომიკისთვის უფრო ნაკლები იქნება. თუ გამოჩნდება, რომ საქართველომ დაძლია კრიზისი, აღმასვლაც ძალიან სწრაფად დაიწყება“.  - ამბობს თამაზ დაუშვილი.

მარიამ მორგოშია