კორონავირუსის გავრცელების საფრთხის გამო გასული ზამთრის სეზონი მთის კურორტებზე მთლიანად ჩავარდა. გადაიდგა თუ არა ნაბიჯები ზამთრის ტურისტული სეზონის გაუმჯობესების მიზნით და რა გამოწვევების წინაშე იდგა ტურიზმის სექტორი პანდემიის პერიოდში, ამ და სხვა საკითხებზე რადიო „კომერსანტის“ გადაცემაში „კომერსანტის დილა“ Caucasus Travel Services - CTS LLC-ის დამფუძნებელმა საბა კიკნაძემ ისაუბრა. მისი თქმით, ხელისუფლებამ გასული ზამთრის ტურისტული სეზონი უგუნური პოლიტიკით ჩაკლა.
„მოლოდინებს გარკვეულ გეგმებზე და პოლიტიკაზე ვაყრდნობთ და ამ მოლოდინებში არანაირად არ გვქონდა იმის განცდა, რომ სახელმწიფო კოვიდის მართვას ვერ შეძლებდა. ზამთარმა დაგვანახა, რომ სახელმწიფომ ზამთარში მთელი ტურიზმი პრაქტიკულად სრულიად უმიზეზოდ მოგუდა. ტურიზმის მართვა გაცილებით უფრო ეფექტურად შეიძლებოდა და ამის მაგალითები მსოფლიოს სხვადასხვა ქვეყნებში არსებობს.
გაზაფხულზე და ზაფხულში დავინახეთ, რომ კოვიდის მართვის მიმართულებით მთელი მსოფლიოსთვის თითით საჩვენებელი გავხდით და მთელი ქვეყანა საშინელი ტრაგედიით არის მოცული და ომის პირობებზე მძიმე დანაკარგს განვიცდით, ამას დაემატა 5 ივლისს მომხდარი შემთხვევაც, რაც მთელი მსოფლიოსთვის და იმ ქვეყნებისთვის რომლებიც საქართველოში ტურისტებს აგზავნიან, საშინელი მესიჯი იყო. ხუთმა ივლისმა იმ მომენტში პრაქტიკულად ტურისტების დიდი რაოდენობა გაწირა.
ასევე დამატებითი ზიანი მოგვაყენა სხვა ქვეყნების მიერ საქართველოს წითელ ზონაში შეყვანამაც, მოლოდინი გვქონდა, რომ ტურიზმის რეაბილიტაცია 2019 წელთან შედარებით 25-30% -ით მაინც მოხდებოდა, თუმცა ეს სამწუხაროდ არ მოხდა და ოდნავი ნამატი გვაქვს 2020 წელთან შედარებით“, - აღნიშნა საბა კიკნაძემ.
რაც შეეხება უკეთესი პროგნოზის იმედს, საბა კიკნაძე ამბობს, რომ თუ ვაქცინაციის კუთხით საქართველომ გარდამტეხი ეტაპი არ გაიარა, ზამთრის კურორტები კვლავ დაიხურება და ზამთრის სეზონს ნორმალურად ვერ შეხვდება.
„ის ქვეყნები, რომლებიც ტურიზმს აგენერირებენ, გაცილებით რბილ ზომებს იღებენ და მოსახლეობაც პრაქტიკულად ვაქცინირებულია. თუ საქართველომ ვაქცინაციის კუთხით რაღაც გარდამტეხი ეტაპი არ გაიარა, დავიხურებით და ზამთრის სეზონს ნორმალურად ვერ შევხვდებით. პლუს ამას, თუ სახელმწიფო ისევ გააგრძელებს ისტერიულ მენეჯმენტს, საზოგადოების ზედმეტად ჩაბეტონებას, ან ზედმეტად გახსნას, ვერაფერს ვერ ვიზამთ.
პირბადეების ღია სივრცეში სრულიად უსაფუძვლოდ მოხსნა იყო შეცდომა და სუფთად პოლიტიკური მიზნით გაკეთებული, თუ ისევ პოლიტიკური თამაშების მსხვერპლი გავხდით, ცხადია, ზამთრის სეზონს ნორმალურად ვერ შევხვდებით, ყველაფერი საზოგადოების შემეცნებაზე, პოლიტიკაზე და ეკონომიკაზეა დამოკიდებული. შარშან ხელისუფლებამ ზამთრის კურორტები ზედმეტად უგუნური პოლიტიკით ჩაკლა, მთელ მსოფლიოში ზამთრის კურორტების 80% მუშაობდა და ამ ქვეყნებს, როგორც სამხრეთ ამერიკის, ასევე ევროპის, ტურისტული სეზონი არ ჩაუგდიათ“, - აღნიშნა საბა კიკნაძემ.
იმისათვის რომ მდგომარეობა გამოსწორდეს, კიკნაძე ფიქრობს რომ ტურიზმის ინდუსტრია მზად უნდა იყოს როგორც ვაქცინაციისთვის, ასევე გარკვეულწილად შეზღუდულ ფორმატში მუშაობისთვის და მთავრობაც უნდა ენდობოდეს ხალხს.
„ყველა უნდა გაერთიანდეს ამ უბედურების წინააღმდეგ და თუ ეს ასე მოხდება, შეგნების დონე აიწევს და ყველას ინტერესი იქნება ტურიზმის ამუშავება ზამთრის სეზონი იქნება ისეთი როგორც უნდა იყოს. მთაში ადამიანებს სხვა შემოსავალი არ აქვს, წელს ტურიზმს ზარალი პოლიტიკამ მიაყენა, შარშან ეს შეიძლება არასწორი მართვის შედეგი იყო, მაგრამ წელს არასწორი მართვის და პლუს პოლიტიკის შედეგია“, - აღნიშნა საბა კიკნაძემ.
თაკო კვაჭანტირაძე