31 ოქტომბრის საპარლამენტო არჩევნებამდე რამდენიმე დღე რჩება, პოლიტიკური კამპანიები დასკვნით ფაზაში შედის, ასევე, გააქტიურებულია პოლიტიკური შემოწირულობებიც, რომლებმაც სექტემბერ-ოქტომბერში 26,761,929 ლარს მიაღწია. ჯამურად, პირველი სექტემბრიდან 23 ოქტომბრის ჩათვლით 1000-ზე მეტი დონაცია გაიცა. ამ დონორებს შორის წელსაც, ისევე როგორც სხვა არჩევნების დროს, განსაკუთრებულად აქტიურობდნენ მსხვილი ბიზნესის წარმომადგენლები და უშუალოდ პოლიტიკური პარტიების ლიდერებთან დაახლოებული პირები, მათი ოჯახის წევრები და ნათესავები.
ყველაზე მეტი შემოწირულობა მმართველი პოლიტიკური პარტიის - “ქართული ოცნების” სასარგებლოდ განხორციელდა, რომელმაც დონაციების სახით 10,760,907 ლარი მიიღო. ეს მთლიანად პოლიტიკური შემოწირულობების 40%-ია. ამ პერიოდის განმავლობაში ოცნებას 60,000 ლარი 60-ზე მეტმა ადამიანმა შესწირა. მათ შორის პარტიის სასარგებლოდ 60,000 ლარი გადარიცხა კომპანია “ყაზბეგის” დამფუძნებელმა გოგი თოფაძემ, ასევე ახალციხის, ბორჯომის, ადიგენისა და ასპინძის მუნიციპალიტეტების მაჟორიტარობის კანდიდატმა ანტონ ობოლაშვილმა, რომელიც კომპანია “გლობალფარმის” დამფუძნებელია. ქართულ ოცნებას 60,000 ლარი შესწირა ბიძინა ივანიშვილის მიერ დაფუძნებული თანაინვესტირების ფონდის ყოფილმა CEO-მ გიორგი ბაჩიაშვილმაც. მასთან ერთად პარტიის სასარგებლოდ 60,000 ლარი KTW-ს დამფუძნებელმა ზურაბ ჩხაიძემაც გადარიცხა. პარტიის ახალმა წევრმა, ვიქტორ სანიკიძემ კი ოცნებას 60,000 ლარი გადაურიცხა.
პოლიტიკური შემოწირულობებით მეორე ადგილზეა ერთიანი ნაციონალური მოძრაობა, რომელმაც 3,853,964 ლარი მიიღო. პარტიის შემომწირველებს შორის არის “ზედაზენის” დამფუძნებელი ცეზარ ჩოჩელი, მან ერთიან ნაციონალურ მოძრაობას 55,000 ლარი შესწირა. ბოლნისის, დმანისის, თეთრიწყაროსა და წალკის მაჟორიტარობის კანდიდატის, კახა ოქრიაშვილის კომპანიამ “ჯი-ემ-პიმ” ერთიან ნაციონალურ მოძრაობას 120,000 ლარი გადაურიცხა. სამტრედიის, წყალტუბოს, ვანისა და ხონის მაჟორიტარობის კანდიდატმა ნანუკა ჟორჟოლოანმა კი პარტიას 20,000 ლარი შესწირა.
შემოწირულობებით მესამე ადგილზეა პარტია “ლელო საქართველოსთვის”, რომელმაც 3,836,290 ლარის დონაციები მიიღო. მათ შორის 10-ზე მეტი შემოწირულობა 60,000 ლარს შეადგენდა. 2,238,498 ლარით მეოთხე ადგილზეა “სტრატეგია აღმაშენებელი”, მას კი 1,886,805 ლარით “პატრიოტთა ალიანსი” მოსდევს. ევროპული საქართველოს შემოწირულობებმა 1 სექტემბერი-23 ოქტომბრის პერიოდში 1,836,324 ლარი შეადგინა. სხვა ყველა პარტიის შემოსავალი კი 1 მილიონ ლარზე ნაკლები იყო.
ბიემჯი