2022 წლის 10 თვეში ელექტროენერგიის ექსპორტიდან მიღებულმა შემოსავალმა რეკორდული 84.3 მლნ აშშ დოლარი შეადგინა. როგორც Galt & Taggart-ის მიერ მომზადებულ ანგარიშში წერია, ამავე პერიოდში ელექტროენერგიის იმპორტმა 40.7 მლნ აშშ დოლარი შეადგინა. შედეგად, სავაჭრო ბალანსმა დადებით 43.6 მლნ აშშ დოლარს მიაღწია.

Galt & Taggart-ის სტატისტიკური მაჩვენებლების მიხედვით, ერთი მხრივ, ენერგეტიკულმა კრიზისმა და მსოფლიოში ენერგომატარებლებზე გაზრდილმა ფასებმა გავლენა მოახდინა მთავარ საექსპორტო ქვეყანა თურქეთზე, სადაც ფასები გასამმაგდა. მეორე მხრივ, საქართველოში ელექტროენერგიის ფასები ბევრად ნაკლებად გაიზარდა, ვიდრე ექსპორტის.

„ამის მთავარი მიზეზი არის ელექტროენერგიის მიწოდებაში ჰიდროგენერაციის მაღალი წილი და იმპორტის ფასების შედარებით ზომიერი
ზრდა. იმპორტის მთავარი მომწოდებელი ქვეყნები - რუსეთი და აზერბაიჯანი — მსოფლიო ბაზარზე თავად არიან ფასის მკარნახებლები და საქართველოს შემთხვევაშიც, თავად განსაზღვრავენ მოწოდების ფასს. ყოველივე ზემოთ ხსენებულიდან გამომდინარე, შეგვიძლია ვთქვათ, რომ ქართულმა კომპანიებმა ისარგებლეს მსოფლიო ენერგეტიკული კრიზისით“, აცხადებენ Galt & Taggart-ში.