რუსეთის მრეწველობისა და ვაჭრობის სამინისტრომ პარალელური იმპორტის საქონლის სია გამოაქვეყნა. ქვეყანაში მათი შეტანა საავტორო უფლების მფლობელის თანხმობის გარეშე არის შესაძლებელი.

23-გვერდიან სიაში ასობით უცხოური ბრენდის, მათ შორის Land Rover-ის, Apple-ის, Samsung-ის, Bentley და სხვა კომპანიების პროდუქცია და მასალა შედის.

ამასთან, ნებადართულია რუსეთში იარაღისა და საბრძოლო მასალის, გათბობის ქვაბებისა და ბირთვული რეაქტორების, ავეჯის, თეთრეულის, მანქანების, ელექტრონიკის, მათ შორის Xbox-ის, Nintendo-სა და PlayStation-ის სათამაშო კონსოლების, ჭკვიანი საათების, მუსიკალური ინსტრუმენტების, ფოტოაპარატებისა და კინოკამერების შეტანა.

სახმელეთო ტრანსპორტის კატეგორიაში შედის ისეთი ბრენდები, როგორიც არის Land Rover, Jaguar, Bentley, Hummer, Tesla, Mercedes-Benz, Maybach, Lexus, Infiniti, Lamborghini, Ferrari. საავტორო უფლების მფლობელის ნებართვის გარეშე, ასევე, დასაშვებია Toyota, Volkswagen, Skoda, BMW, Renault, Audi, Mini, Nissan ბრენდების მანქანებისა და კომპონენტების იმპორტი.

ელექტრონიკის კატეგორიაში დასახელებულია ისეთი ბრენდები, როგორიც არის Apple, Asus, HP, Sony, Samsung, Intel, Siemens, Iridium, Inmarsat, Western Digital, Cisco, JBL, Bose, Logitech, BenQ და სხვები.

ნებადართულია სათამაშოებისა და სპორტული ინვენტარის პარალელური იმპორტიც.

მრეწველობისა და ვაჭრობის სამინისტროს სიაში შედის კომპანიები, რომლებმაც თებერვლის ბოლოდან დღემდე რუსეთში მიწოდების შეწყვეტის ან რუსული ბაზრიდან გასვლის შესახებ განაცხადეს.

აქამდე პარალელური იმპორტი, რუსეთის ფედერაციის სამოქალაქო კოდექსის 1487-ე მუხლით, აკრძალული იყო, რომლის მიხედვითაც ქვეყანაში საქონლის შეტანა უშუალოდ უფლების მქონე პირის მიერ, ან მისი თანხმობით არის შესაძლებელი. რუსული კანონმდებლობის მიხედვით, „რუხი“ იმპორტი კონტრაბანდულად ითვლება, რაც საქონლის ლეგალურ იმპორტად არის შენიღბული. თუმცა რუსეთის მთავრობა დღეს აცხადებს, რომ ახალი კანონით, ამ სიაში შესული პროდუქციის გაყიდვის შემდეგ მათზე მფლობელის სასაქონლო ნიშნის უფლება ამოწურულად ითვლება.

წყარო: "ბიზნესპრესნიუსი"