პროფესიონალ რკინიგზელთა კლუბის პრეზიდენტი, რკინიგზის სფეროს ექსპერტი, დავით გოჩავა საქართველოს რკინიგზაში ფროფესიონალიზმის დეფიციტზე საუბრობს და საკუთარი აზრის გამყარებას გერმანიის მაგალითზე ცდილობს. როგორც ის "კომერსანტს" უხსნის, გერმანულმა კომპანიამ Knorr-Bremse წარმოადგინა შარფენბერგის სისტემის ციფრული ავტოგადასაბმელის (Digital Automatic Coupling - DAC) დიზაინის ვარიანტი ევროპის სარკინიგზო სატვირთო მოძრაობისათვის. პროგრამის European DAC Delivery Programme (EDDP) თანახმად DAC-ავტოგადასაბმელით აღიჭირვება დაახლოებით 500000 სატვირთო ვაგონი და 17000 ლოკომოტივი. ამ ბაზარზე კომპანის Knorr-Bremse მოუწევს კონკურენცია კომპანიებთან Voith, Dellner და Wabtec.
გოჩავას ინფორმაციით, პროგრამა European DAC Delivery Programme (EDDP) მოქმედებს ინიციატივის Shift2Rail ფარგლებში. Shift2Rail Joint Undertaking (S2R JU) - ეს არის სახელმწიფო და კერძო სექტორს შორის პარტნიორობის ახალი ფორმა რკინიგზის სექტორში, რომელიც გვთავაზობს ახალ პლატფორმას თანამშრომლობისათვის და ბიძგს აძლევს ინოვაციების დანერგვას.
დავით გოჩავა "კომერსანტს" უხსნის, რომ რკინიგზის ხელმძღვანელობას ამ ორგანიზაციასთან კავშირების დამყარების აუცილებლობაზე ესაუბრა, თუმცა როგორც აღმოჩნდა, რკინიგზაში Shift2Rail-ის არსებობა და მნიშვნელობა არც კი იცოდნენ. არადა, დავით გოჩავა ამტკიცებს, რომ ეს ის ორგანიზაციაა, რომელთანაც ურთიერთობების გარეშე საქართველოს ტერიტორია, უბრალოდ, სატრანზიტო სივრცე იქნება მხოლოდ, თანაც ქმედუუნარო და არაეფექტიანი.
"როცა რკინიგზის ხელმძღვანელობას ამ ორგანიზაციასთან კავშირების დამყარების და მასთან მუშაობის აწყობის შესახებ ვესაუბრე, - რა არისო Shift2Rail, იკითხეს! არადა ეს ის ორგანიზაციაა, რომელთანაც ურთიერთობების გარეშე საქართველოს ტერიტორია, უბრალოდ, სატრანზიტო სივრცე იქნება მხოლოდ, თანაც ქმედუუნარო და არაეფექტიანი, რადგან ჩავიკეტებით ახალქალაქსა და გარდაბანს, გადრაბანსა და ფოთს, ბათუმსა და სახადლოს შორის, და ვერ მივიღებთ მონაწილეობას საერთაშორისო სარკინიგზო გადაზიდვებში სრულფასოვნად. ფუნდამენტური ცვლილებები რკინიგზაში გარდაუვალია! ამ მიმართულებით პირველი ნაბიჯი უნდა იყოს რკინიგზის სააგენტოს შექმნა!" - განუცხადა "კომერსანტს" გოჩავამ და იქვე აგვიხსნა Shift2Rail Joint Undertaking-ის მნიშვნელობა და წარმომავლობა.
მისი თქმით, Shift2Rail Joint Undertaking-ს დამფუძნებელი წევრები არიან ევროკავშირი და სარკინიგზო სექტორის რვა წარმომადგენელი, მათ შორის სარკინიგზო მოწყობილობების მწარმოებელი კომპანიები Alstom (მსხვილი ფრანგული მანქანათმშენებელი კომპანია, ენერგეტიკული და სარკინიგზო ტრანსპორტის მოწყობილობების მწარმოებელი ერთ-ერთი ლიდერი მსოფლიოში), Ansaldo STS (იტალიური კომპანია, რომელსაც წამყვანი ადგილი უკავია სიგნალიზაციის და ინტეგრირებული სატრანსპორტო სისტემების შექმნაში სამგზავრო და სატვირთო სარკინიგზო გადაზიდვების სექტორში), Bombardier (კანადური მანქანათმშენებელი კომპანია, მსოფლიოში სარკინიგზო ტექნიკის უმსხვილესი მწარმოებელი), Construcciones y Auxiliar de Ferrocarriles (CAF - ესპანური მანქანათმშენებელი კომპანია, რომელიც აწარმოებს მოძრავ შემადგენლობას, უშვებს მატარებლებს მეტროპოლიტენისათვის, რკინიგზისათვის, ტრამვაის, დიდჩქარულ მატარებლებს და ა.შ.), Siemens (გერმანული ტრანსნაციონალური კონცერნი) და Thales (ფრანგული მულტინაციონალური კომპანია), აგრეთვე ინფრასტრუქტურის მმართველი კომპანიები Network Rail (ინგლისის სარკინიგზო ინფრასტრუქტურის მფლობელი და მმართველი კომპანია) და Trafikverket (შვედეთის სატრანსპორტო ადმინისტრაცია).
გოჩავას განმარტებით, დამატებითი წევრების შერჩევა მოხდება წინასწარი გასაუბრების (an open call) გზით. მიზანია სარკინიგზო საწარმოებისა და სარკინიგზო სექტორის სხვა მნიშვნელოვანი სახელმწიფო და კერძო სტეიკჰოლდერების, აგრეთვე სამეცნიერო-კვლევითი ორგანიზაციების, მცირე და საშუალო ბიზნესში დასაქმებული და სექტორის გარეთ მოღვაწე სუბიექტების სრულად წარმოდგენა.
საუბრის დასასრულს გოჩავა საქართველოს რკინიგზაში პროფესიონალი კადრების დეფიციტზე კიდევ ერთხელ აკეთებს აქცენტს და გვეუბნება, რომ ქვეყნის საგანმანათლებლო სისტემა ვერ ზრდის საერთაშორისო ბაზრის მოთხოვნების შესაბამის კონკურენტუნარიან კადრებს. მისი აზრით გამოსავალი შემდეგშია:
"უნდა შეიქმნას საქართველოს რკინიგზაში დამოუკიდებელი ერთეული სარკინიგზო მშენებლობის და ლიანდაგის მოვლა-შენახვის დანაყოფი, რომელიც მონაწილეობას მიიღებს ჩვენს გარშემო სარკინიგზო სექტორში მიმდინარე სამშენებლო პროექტებში და ა.შ. განათლების სამინისტრო ამას ვერ იზამს: ამის მაგალითია სარკინიგზო კოლეჯი... - დიდი რეკლამა კი აქვს, მაგრამ რეალურად ის ვერ ზრდის საერთაშორისო ბაზრის მოთხოვნების შესაბამის კონკურენტუნარიან კადრებს... ყველაფერი კი უნდა დაიწყოს რკინიგზის სააგენტოს შექმნით. ის არის ფუნდამენტური ცვლილებების მასტიმულირებელი," - განუცხადა "კომერსანტს" გოჩავამ.
ავტორი: ბელა გელაშვილი