3 ნოემბერს მსოფლიოში წლის უმნიშვნელოვანესი - აშშ-ს პრეზიდენტის არჩევნები ჩატარდება.

ამერიკაში დღეს საკმაოდ დაძაბული ვითარებაა და საზოგადოების პოლარიზების დონე უჩვეულოდ მაღალია - დამანგრეველმა პანდემიამ და საპროტესტო გამოსვლებმა არჩევნებს ამერიკისთვის უჩვეულო ფონი შეუქმნეს.

არსებობს მოვლენათა განვითარების 4 ძირითადი სცენარი.

პირველი   - ტრამპის გამარჯვება, რომელიც ნაკლებად რეალურია თუმცა, ბაზრისთვის ნეიტრალური. ის ხომ პრეზიდენტია 4 წლის მანძილზე და მისი მეორე ვადა უკვე არავითარ მოულოდნელობებს არ მოიტანს.

მეორე - საკამათო შედეგები,  როდესაც სხვაობა ხმებს შორის იმდენად უმნიშვნელო იქნება, რომ ყოველ მხარეს მათი გასაჩივრების შესაძლობლობა ექნება. ეს სცენარი ეკონომიკისთვის ნეგატიურია, რადგანაც დიდ გაურკვევლობას გამოიწვევს.

მესამე - ბაიდენის გამარჯვება იმ პირობებში როდესაც რესპუბლიკელები კონგრესში უმრავლესობას შეინარჩუნებენ.  ეს პოზიტიური სცენარია, რადგანაც ასეთ შემთხვევაში ბაიდენს მოწინაამღდეგე პოლიტიკური ძალა გააწონასწორებს.

მეოთხე სცენარია ბაიდენის და პარალელურად კონგრესის არჩევნებში (რომლებიც ასევე 3 ნოემბერს ტარდება) დემოკრატების გამარჯვება. ის ბაზრისთვის ყველაზე ნეგატიური სცენარია, რადგანაც ეს დაუყოვნებლივ და წინაამღდეგობის გარეშე გადასახადების ზრდას ნიშნავს.

დონალდ ტრამპი ამომრჩევლებთან შეხვედრების დროს უკვე არსებული პოლიტიკის გაგრძელებას აანონსებს. მისი მიდგომები ყველასთვის უკვე კარგადაა ცნობილი და სავარაუდოდ, ამ მხრივ არაფერი შეიცვლება.

„ჩვენ მშვიდობიან პოლიტიკას ახალი იარაღის მეშვეობით კვლავაც გავაგრძელებთ. არავის არ აქვს შეიარაღება, რომელიც ჩვენსას ოდნავ მაინც შეედრება. იმედი მაქვს ამერიკას მისი გამოყენება არასდროს მოუწევს. თუმცა, ჩვენ ძალისმიერი პოზიციიდან  მშვიდობას კვლავაც დავამყარებთ. ეს ყველაფერი სწორედ ამიტომ კეთდება“   - განაცხადა ტრამპმა.

მან ასევე განაცხადა, რომ ირანთან ახალ ბირთვულ ხელშეკრულებას დადებს, რომელიც გრძელვადიან მშვიდობას ხელს მეტად შეუწყობს.

ტრამპმა ასევე ფედერალურ ბიუროს ბაიდენის შვილის წინაამღდეგ გამოძიების დაწყება  და მისი კონკურენტის ოჯახის გასამართლება კორუფციის გამო მოითხოვა.

ტრამპი ასევე ჩინეთთან სავარაუდოდ სავაჭრო ომს გააგრძელებს - ერთ-ერთ ტელეპროგრამაში მან განაცხადა, რომ „ბევრ რამეს უზამს ჩინეთს“ თუმცა, არ დაუზუსტებია კონკრეტულად რას.

უფრო საყურადღებოა ჯო ბაიდენის დაპირებები.

„ჩვენ უნდა მოვახდინოთ მარიხუანის დეკრიმინალიზაცია იმისთვის, რომ ამასთან დაკავშირებული საქმეები ადამიანს კრიმინალურ ისტორიას არ უნდა უქმნიდნენ“  - თვლის დემოკრატი კანდიდატი.

„ჩვენ დღეს უფრო იზოლირებულები ვართ საერთაშორისო არენაზე, ვიდრე ოდესმე. ირანი ბირთვულ იარაღთან უფრო ახლოსაა, ვიდრე ოდესმე იყო. ჩრდილოეთ კორეას მეტი ატომური ბომბი აქვს ვიდრე ოდესმე ჰქონდა. დღეს ჩვენ ნატოელი მოკავშირეები ამბობენ, ჩვენ უკვე ვერ გვენდობიან. მე ვიტყოდი, რომ დღეს ჩვენ გაცილებით ნაკლებად უსაფრთხოდ ვართ, ვიდრე ოდესმე ვიყავით“ - ამბობს ბაიდენი.

ბაიდენი რუსეთს უსაფრთხოების კავშირების დანგრევის მცდელობის მხრივ მთავარ მტრად მიიჩნევს, ის ასევე ლუკაშენკოს წინაამღდეგ სანქციების გამკაცრების მომხრეა.

ბაიდენი ჩინური პროდუქციის მიმართ შემოღებული ტარიფების გაუქმებას არ აპირებს, თუმცა, ტარიფების საკითხების  საკვანძო მოკავშირეებთან - კანადასთან და ევროკავშირთან - განხილვას გეგმავს.

forbes.ru

მოამზადა თენგიზ აბლოთიამ