ქართველი ეკონომისტები პოზიტიურად აფასებენ საქართველოს მიმდინარე ეკონომიკურ მდგომარეობას, თუმცა მათი მოლოდინი საქართველოში მომდევნო ექვსი თვის ეკონომიკურ მდგომარეობასთან დაკავშირებით უარყოფითია. ამის შესახებ საუბარია „საქართველოს ეკონომიკური კლიმატის“ ანგარიშში, რომელიც პიემსი კვლევითი ცენტრის (PMC RC) პროდუქტია. აღნიშნულ პროექტში საქართველოდან 60 ექსპერტი მონაწილეობს, კვლევა კი ნოემბერში ჩატარდა.
კვლევის შედეგების მიხედვით, 2022 წლის რეალური მშპ-ს ზრდის პროგნოზი, საშუალოდ 9.5%-ს შეადგენს. ეკონომისტების მოლოდინია, რომ მომდევნო ექვსი თვის განმავლობაში ინფლაცია შემცირდება წინა წლის შესაბამის პერიოდთან შედარებით.
გამოკითხულ ეკონომისტთა თითქმის 90% ფიქრობს, რომ მაღალი ინფლაცია საქართველოს ეკონომიკისთვის ამჟამად ყველაზე მნიშვნელოვან საფრთხეს წარმოადგენს.
გამოკითხულ ეკონომისტთა 94% მიიჩნევს, რომ უფრო მკაცრი ფისკალური პოლიტიკა მაღალი ინფლაციის საწინააღმდეგო სხვა ზომებთან შედარებით ყველაზე ეფექტური იქნება. ასევე, 89%-ს სჯერა უფრო მკაცრი მონეტარული პოლიტიკის ეფექტურობის.
რაც შეეხება საქართველოს მთავრობის 2023 წლის სახელმწიფო ბიუჯეტის პროექტით განსაზღვრულ ძირითად პარამეტრებს: - 78% ფიქრობს, რომ სახელმწიფო ვალის მშპ-სთან შეფარდების 38.8%-ზე განსაზღვრა რაციონალურია. - 70% ფიქრობს რომ ბიუჯეტის დეფიციტის მშპ-სთან ფარდობის 2.9%-ზე განსაზღვრა სწორია. - ნახევარზე ნაკლები (47%) ეთანხმება რომ 18.4 მილიარდი ლარის ოდენობის საგადასახადო შემოსავლები ძალიან მაღალია და უფრო დაბალი უნდა იყოს.
„ქართველი ეკონომისტების გამოკითხვის თანახმად, 2022 წლის მეოთხე კვარტალში ქართველი ეკონომისტები დადებითად აფასებენ საქართველოს მიმდინარე ეკონომიკურ მდგომარეობას. მათი შეფასება გაუმჯობესდა როგორც 2022 წლის მესამე კვარტალთან, ასევე 2021 წლის მეოთხე კვარტალთან შედარებით. თუმცა გამოკითხული ეკონომისტების მოლოდინი საქართველოში მომდევნო ექვსი თვის ეკონომიკურ მდგომარეობასთან დაკავშირებით უარყოფითია. 2022 წლის მეოთხე კვარტალში მომდევნო ექვსი თვის ეკონომიკური მდგომარეობის შესახებ მოლოდინი გაუარესდა იმ პოზიტიურ პროგნოზთან შედარებით, რომელიც ეკონომისტებს მომდევნო ექვსი თვის მიმართ ჰქონდათ როგორც 2022 წლის მესამე კვარტალში, ასევე 2021 წლის მეოთხე კვარტალში.
გარდა არსებული ეკონომიკური მდგომარეობის შეფასებისა და მომდევნო ექვსი თვის მოლოდინის დაფიქსირებისა, გამოკითხულმა ექსპერტებმა გააკეთეს საქართველოს ძირითადი მაკროეკონომიკური ინდიკატორების პროგნოზი. გამოკითხვის შედეგების მიხედვით: რეალური მშპ-ს მოსალოდნელი ზრდის პროგნოზი 2022 წელს საშუალოდ 9.5%-ს შეადგენს. მომდევნო 6 თვის განმავლობაში წინა წლის შესაბამის პერიოდთან შედარებით მოსალოდნელია ინფლაციის კლება. ამჟამად, ქართული ლარი: ნაკლებად არის შეფასებული აშშ დოლარისა და ევროს მიმართ; და უფრო მეტად არის შეფასებული რუსული რუბლისა და თურქული ლირას მიმართ“, აღნიშნულია „საქართველოს ეკონომიკური კლიმატის“ ანგარიშში.
გარდა არსებული ეკონომიკური მდგომარეობის შეფასებისა და მომდევნო ექვსი თვის მოლოდინის დაფიქსირებისა, გამოკითხულმა ექსპერტებმა გააკეთეს საქართველოს ძირითადი მაკროეკონომიკური ინდიკატორების პროგნოზი. გამოკითხვის შედეგების მიხედვით: უახლოეს ექვს თვეში მოსალოდნელია ექსპორტის მოცულობის ზრდა, გასულ ექვს თვესთან შედარებით. უახლოეს ექვს თვეში მოსალოდნელია იმპორტის მოცულობის ზრდა, გასულ ექვს თვესთან შედარებით. მომდევნო ექვს თვეში, გასულ ექვს თვესთან შედარებით, მოსალოდნელია ექსპორტის მოცულობა უფრო ნაკლებად ზრდა, ვიდრე იმპორტისა, რაც გამოიწვევს მოსალოდნელი სავაჭრო ბალანსის გაუარესებას.