ღვინის ექსპორტმა პანდემიამდელ მაჩვენებელს გადააჭარბა. ღვინის ეროვნული სააგენტოს თავმჯდომარე ლევან მეხუზლა ,,ბიზნესპრესნიუსთან“ აცხადებს, რომ წელს ექსპორტზე 100 მლნ ბოთლი ღვინო გავა, რაც დამოუკიდებელი საქართველოს ისტორიაში უპრეცედენტო რაოდენობაა.
მისივე თქმით, რჩება ორი მთავარი გამოწვევა - ბაზრის დივერსიფიცირება და გლობალურ ბაზარზე ღვინოზე დაწეული ფასი.
„2019 წლის მონაცემს ექსპორტის კუთხით უკვე გადავაჭარბეთ და გვაქვს მოლოდინი, რომ წლის ბოლომდე 100 მლნ ბოთლამდე ღვინო გავა საქართველოდან. ეს მოხდება დამოუკიდებელი საქართველოს ისტორიაში პირველად. ეს არის, მათ შორის, ჩვენი მუშაობის შედეგიც. რა თქმა უნდა, კერძო სექტორთან ერთად.
მიუხედავად პანდემიური წლისა, შევძელით, არ გავჩერებულვიყავით და თანამედროვე ტექნოლოგიების, ონლაინ პლატფორმების საშუალებით გაგვეგრძელებინა მუშაობა იქ და იმ დროს, სადაც რეალურად ვერ ვახერხებდით ჩასვლას და კომუნიკაციას. გასულ წელს, რაც მოვახერხეთ, პირველ რიგში ეს იყო მცირე მარნებისთვის ნიმუშების დაგზავნა სრულიად უფასოდ. ასევე, ვატარებდით ონლაინ დეგუსტაციებს. წელს, უკვე ნელნელა აღდგა გარკვეული ღონისძიებები და ნოემბრის ბოლოს ბერლინში გაიმართება ნატურალური ღვინის ფესტივალი, სადაც ჩვენი დახმარებით მარნები გაემგზავრებიან.
საქართველოშიც ორწლიანი პაუზის შემდეგ ღვინის ექსპო ჩატარდა. ასევე, ნოემბრის ბოლოს ჩატარდება მაისში გადადებული ახალი ღვინის ფესტივალი. საბოლოო ჯამში, დადებითი ტენდენციებია, თუმცა რჩება ორი მთავარი გამოწვევა. მთავარი ბაზრის დივერსიფიცირება და ამ მხრივაც მნიშვნელოვანი ნაბიჯებია გადადგმული. რუსეთის ემბარგომდე, 2006 წელს, როცა მაქსიმალური იყო რუსეთში ღვინის ექსპორტი, წილობრივად 80% გადიოდა. დღეს, ეს მაჩვენებელი 60%-ს ჩამოსცდა. ბოლო ათ თვეს რომ დავაკვირდეთ, საერთო ზრდა არის 10.7%, ხოლო რუსეთის მიმართულებით ზრდა 5%, რაც დადებითი მოვლენაა. იზრდება რუსეთის ბაზარი, მაგრამ იზრდება დივერსიფიცირებაც.
მეორე, გლობალური გამოწვევა კი 2020 წლის მეორე ნახევრიდან დადგა, როცა ღვინოზე ფასი დაეცა. საქართველო როგორც მცირე ქვეყანა, ვერ ფლობს ბერკეტებს, რომ ამ მხრივ რამე შეცვალოს. გლობალური თამაშის წესების მიმღები ვართ და ანგარიშს ვუწევთ არსებულ რეალობას. თუმცა, ამ მხრივაც ბოლო 2 თვეში ვითარება დასტაბილურდა და იმედი გვაქვს, ნელნელა ისევ დადებითი მაჩვენებლები და ზრდა გვექნება ამ კუთხითაც“- განაცხადა ,,ბიზნესპრესნიუსთან“ ლევან მეხუზლამ.
ღვინის ეროვნული სააგენტოს ინფორმაციით, მიმდინარე წლის იანვარ-ოქტომბერში საქართველოდან ექსპორტირებული ღვინით მიღებული შემოსავალი 194 მლნ აშშ დოლარს აღწევს, რაც გასული წლის ანალოგიურ მონაცემზე 9%-ით მეტია, 11%-ით არის გაზრდილი ექსპორტირებული ღვინის რაოდენობაც. წელს 10 თვეში ექსპორტზე უკვე 83.8 მლნ ბოთლი ღვინოა გასული.
bpn.ge