რა ტენდენციები და მოლოდინებია ეროვნულ ვალუტასთან დაკავშირებით, ამის შესახებ რადიო „კომერსანტის“ ეთერში ეკონომისტმა ირაკლი მაკალათიამ ისაუბრა.
„მოთხოვნა/მიწოდება განსაზღვრავს ვალუტის, ისევე როგორც სხვა პროდუქტების ღირებულებას. ჩვენი ვალუტის კურსი განპირობებული იყო საგარეო ფაქტორებით, ქვეყანაში შემოვიდა მიგრანტების დიდი რაოდენობა, რომელთა უმეტესობა რუსეთის მოქალაქე იყო, ლარზე მოთხოვნა გაიზარდა, რამაც ხელი შეუწყო ქართული ვალუტის გამყარებას.
ბოლო 5 წლის ტენდენციას თუ გადავხედავთ ვნახავთ, რომ იანვარ-თებერვალი ხასიათდება ყველაზე მეტად გამყარებით და დოლარის ყველაზე დაბალი კურსი გვაქვს ამ დროს. ამის გამომწვევი მიზეზი ორია, ერთი ის, რომ დაბალი ეკონომიკური აქტივობაა, კომპანიებს შევსებული აქვთ მარაგები, უცხოურ შესყიდვებს არ აკეთებენ და დოლარზე და ევროზე ნაკლები მოთხოვნაა. ეს ეხმარება გამყარებას. მეორე არის ფულის მასა, როდესაც გამყარების ტენდენციაა ეს ნიშნავს, რომ ეროვნულ ბანკს ფულის მასა ამოაქვს ბრუნვიდან და ეს ეხმარება გამყარებას მყისიერად,“ - განაცხადა ირაკლი მაკალათიამ.
კობა გვენეტაძის განცხადებას, რომლის თქმითაც არასწორია მოსაზრება, თითქოს სები ინტერვენციებით ახდენს ლარის კურსზე ზემოქმედებას, არამედ მცურავი კურსის პირობებში ეროვნულ ვალუტაზე ფუნდამენტური ფაქტორები მოქმედებს, ირაკლი მაკალათია არ ეთანხმება. მისი თქმით, ფულის მასის მოცულობა ამ პროცესში მნიშვნელოვანი ფაქტორია, ფულის მასაზე პასუხისმგებელი კი სწორედ ეროვნული ბანკია.
ირაკლი მაკალათიას სამომავლოდ რეფინანსირების განაკვეთის შემცირების მოლოდინი აქვს, ამისთვის კი ინფლაცია ჩვეულებრივ დინამიკაში უნდა გადავიდეს.
როგორც ირაკლი მაკალათია ამბობს სწორი მონეტარული პოლიტიკა და სწრაფი ეკონომიკური ზრდა არის ორი მთავარი ფაქტორი, როგორც ეროვნული ვალუტის, ასევე მთლიანად ქვეყნის მდგომარეობის გაუმჯობესებისთვის.
„ორი მნიშვნელოვანი, პირველი მყისიერი ეს არის სწორი მონეტარული პოლიტიკა, უნდა აკონტროლოს ფულის მასა და არ გამოიწვიოს მისი ზრდა, მეორე ეს არის ეკონომიკური განვითარება, იმპორტდამოკიდებულების შემცირება. ფულის მასისა და წარმოებული პროდუქციის თანაფარდობა ფასების დასტაბილურებას გამოიწვევს. სწრაფი ეკონომიკური განვითარება და სწორი მონეტარული პოლიტიკა ადვილად გადასაწყვეტი საკითხებია, თუმცა ამისთვის პოლიტიკური ნებაა საჭირო, “- აღნიშნა ირაკლი მაკალათიამ.
ლარი
