რეგიონის ქვეყნების მიხედვით, საზოგადოებრივი ტრანსპორტით მგზავრობა ყველაზე იაფი საქართველოშია.  50 თეთრზე დაბალი ტარიფი  რეგიონის არც ერთ ქვეყანაში არ მოქმედებს.  ამასთან, გაცილებით მაღალია ხარჯი, რაც სახელმწიფოს თითო მგზავრის გადაყვანა უჯდება — საშუალოდ 2.7 ლარი.

1-ლი თებერვლიდან, თუკი რეგიონის ქვეყნებში ეს მოცემულობა დარჩება, საქართველო ტარიფის სიდიდით თურქეთს თითქმის  გაუთანაბრდება და მესამე ადგილს დაიკავებს აზერბაიჯანისა და სომხეთის შემდეგ.

მეზობელ  ქვეყნებში საზოგადოებრივი ტრანსპორტით გადაადგილების მაჩვენებლები დღეის მდგომარეობით ლარში  ასე გამოიყურება:   

— აზერბაიჯანი 0,56 ლარი;

— სომხეთი - 0.62 ლარი;

— თურქეთი - 1.2 ლარი;

— რუსეთი - 1.27.

რაც შეეხება მსოფლიოში ყველაზე ძვირ ტარიფს, ნორვეგიაშია, სადაც საზოგადოებრივი ტრანსპორტით გადაადგილებს 13,44 ლარი ღირს, შვეიცარია ამ კრიტერიუმის მიხედვით მეორე ადგილზეა - 11.71 ლარით, მესამე ადგილზეა ისლანდია, სადაც მგზავრობის ტარიფი 11.40 ლარს შეადგენს, დანიაში 11.25 ლარი, ხოლო შვედეთში ეს მაჩვენებელი 11.15 ლარის დონეზეა.

ლუქსემბურგი ერთადერთია მსოფლიოში, სადაც მგზავრობა უფასია.

გარდა ამისა, ყველაზე იაფი ტარიფი დღესდღეობით სირიაშია - ქართულ ვალუტაში 0.31 ლარს შეადგენს, მეორე ადგილზეა მოლდავა - 0.34 ლარი, უზბეკეთი - 0.43 ლარი, ხოლო შრი-ლანკაში ეს მაჩვენებელი 0.49 ლარს შეადგენს.

მონაცემები NUMBEO.COM-ის მიხედვით მომზადდა.

დღეს, როცა საზოგადოებრივი ტრანსპორტის გაძვირებასთან დაკავშირებით საზოგადოებაში დიდი აჟიოტაში და ვნებათაღელვაა, სპეციალისტები აცხადებენ, რომ სხვა გამოსავალი არ არის, რადგან საფასო ცვლილების გარეშე დარგი ვერ განვითარდება.

გაეროს პროექტების ექსპერტი  გელა კვაშილავა არ გამორიცხავს, რომ მიდგომა შეიძლება შეიცვალოს, თუმცა ფასები ნებისმიერ შემთხვევაში მოიმატებს.

,,მთავრობის მხრიდან საზოგადოებრივი ტრანსპორტირების დაფინანსება ყველგან ხდება, თუმცა ეს სუბსიდირება 50%-ზე მეტი არ უნდა იყოს, როგორც სხვა ქვეყნების გამოცდილება აჩვენებს. ჩემი აზრით, ტარიფები უნდა იყოს დაბალი, მაგრამ არა იმ დონეზე იაფი, რომ ოპერაციული ხარჯის ნაწილი არ დაფაროს. ამასთან, თბილისში მომხმარებლების 53%  სარგებლობს შეღავათებით და ეს მიდგომა უნდა შენარჩუნდეს. თუმცა თუკი გამოიკვეთება მომხმარებლების ახალი წრე, ბილეთების ფასის კორექტირებაც შეიძლება მოხდეს. ზოგადად, აბონიმენტების სისტემა უკეთესია, ვიდრე მგზავრი გავლილი მანძილის მიხედვით იხდის, როგორც ბევრ ქვეყანაში ხდება“, - აცხადებს ,,კომერსანტთან“ გელა კვაშილავა.

შეგახსენებთ, რომ  2022 წლის თებერვლიდან თბილისში საზოგადოებრივი ტრანსპორტით ერთჯერადი გადაადგილდება ძვირდება, თუმცა შემოდის აბონემენტების სისტემა. 

როგორც მერმა კახა კალაძემ თბილისის მთავრობის სხდომაზე განმარტა, დედაქალაქში საზოგადოებრივი ტრანსპორტისთვის ერთსაათიანი, ერთდღიანი, ერთკვირიანი, ერთთვიანი, სამთვიანი და ერთწლიანი ულიმიტო აბონემენტების სისტემა 2022 წლის თებერვლიდან ამოქმედდება. 

კალაძის ცნობით, ერთდღიანი აბონემენტი 3 ლარი ეღირება, ერთკვირიანი – 20 ლარი, ერთთვიანი – 40 ლარი, სამთვიანი – 100 ლარი და ერთწლიანი ბარათი – 250 ლარი.

ულიმიტო აბონემენტების გარდა, თბილისში ნებისმიერი საზოგადოებრივი ტრანსპორტის ღირებულება გახდება 1 ლარი, მომხმარებლებს კი მისი გამოყენება ულიმიტოდ 90 წუთის განმავლობაში შეეძლებათ როგორც მეტროში, ასევე ავტობუსსა და მიკროავტობუსში.

მარი ჩიტაია