საქართველოში 12–18 ივლისის კვირაში კიტრის ფასი, მოულოდნელად, პიკურ მაჩვენებლებზე ავიდა. მანამდე, მაისის მიწურულს, ამ ბოსტნეულის ფასი მკვეთრად იყო დავარდნილი. ივლისი – ღია გრუნტის სეზონია და ტრადიციულად, ფასები კლებულობს, მაგრამ გასულ კვირას სხვა ტენდენცია ვიხილეთ. ბაზრის მონაწილეები კიტრის გაძვირების რამდენიმე მიზეზს ასახელებენ.
EastFruit–ის 8 ივლისის მონიტორინგის მონაცემების თანახმად, კიტრის საშუალო ფასმა 1,5 ლარი შეადგინა, რაც ამ პერიოდისთვის რეკორდული მაჩვენებელია. შედარებისთვის, გასული წლის ანალოგიურ პერიოდში კიტრის საბითუმო ფასი 0,3 ლარს შეადგენდა.
გაძვირების ერთ–ერთ მიზეზად გვალვა და ცხელი ამინდი სახელდება, რაც ბოლო კვირების განმავლობაში ქვემო ქართლში ფიქსირდება. ამან ღია გრუნტზე მოსავლიანობა შეამცირა. ქვემო ქართლში მდებარე ხილ–ბოსტნეულის გადამამუშავებელი საწარმოს შპს „მარნეული აგროს“ დირექტორის ვანო ცუკილაშვილის თქმით, წელს კიტრის მოსავალი 14 ჰა ფართობზე აიღო. მისი თქმით, კომპანია ადგილობრივი ფერმერებისგან არ იბარებს კიტრს, ვინაიდან ისინი შესაბამისი ჯიშის კიტრს არ რგავენ და თავად უწევს ნედლეულის მოყვანა.
ცუკილაშვილი აღნიშნავს, რომ მაღალი ფასების მიზეზი გვალვა შეიძლება იყოს, ვინაიდან ამ მიზეზის გამო თავად კომპანიამ დაგეგმილზე 30%–ით ნაკლები მოსავალი მიიღო.
„წვიმა ძალიან მნივშნელოვანია კიტრის კარგი მოსავლის მისაღებად. მხოლოდ მორწყვა საკმარისი არ არის. მშრალ და ცხელ ამინდში მყოლოდ მორწყვა სასურველ შედეგს არ იძლევა“, – ამბობს ვანო ცუკილაშვილი.
გარემოს დაცვისა და სოფლის მეურნეობის სამინისტროს მარნეულის განყოფილების ხელმძღვანელი გერონტი სივსივაძე აღნიშნავს, რომ ადგილობრივ ფერმერებს კიტრისა და სხვა ბოსტნეულის წარმოება სათბურებში გადააქვთ, ვინაიდან ღია გრუნტზე მათი მოყვანა სულ უფრო რთულდება.
გასულ კვირაში ფასები ზრდის კიდევ ერთი მიზეზი, შესაძლოა, მაისის ვარდნაც იყოს, რის შემდეგაც ბევრმა ფერმერმა უარი თქვა კიტრის მოყვანაზე.
2020 წლის მონაცემებით, რომელიც სოფლის მეურნეობის სამინისტრომ გამოაქვეყნა, საქართველოში კიტრის მოსავლიანობით პირველ ადგილს ქვემო ქართლი იკავებს. კიტრის მთელ წარმოებაში ამ რეგიონის წილი შარშან 42%–ს შეადგენდა. მეორე ადგილზეა კახეთი 21%–ით, ხოლო სამეულს იმერეთი 13%–ით კრავს.