კორონავირუსის მართვაში კერძო სადაზღვევო კომპანიები ერთვებიან. აღნიშნულ საკითხზე შეხვედრა ჯანდაცვის მინისტრმა, ეკატერინე ტიკარაძემ სადაზღვევო კომპანიებთან რამდენიმე დღის წინ გამართა.

როგორც სადაზღვევო კომპანია „არდი დაზღვევის“ აღმასრულებელმა დირექტორმა მიხეილ ჯაფარიძემ „კომერსანტთან“ განაცხადა, კომპანია პროცესში ჩასართვად მზად არის, თუმცა სამინისტროსგან დამატებით ინსტრუქტაჟს ელოდებიან.

„ჯანდაცვის სამინისტროში მინისტრთან შეხვედრაზე სადაზღვევო კომპანიების წარმომადგენლები ვიყავით, გაგვაცნეს მონახაზი, რომელიც სადაზღვევო კომპანიებსა და ჯანდაცვის სამინისტროს შორის, დაზღვეული კოვიდინფიცირებულების დისტანციური მართვის თაობაზე, ინფორმაციის გაცვლას უკავშირდებოდა, რომ ყოფილიყო ერთიანი პროტოკოლი და ერთიანი მიდგომა. ცხადია ინიციატივა, ნორმალური და ლოგიკურიც არის. მთავარია, ჩვენ  გვქონდეს ზუსტი პროტოკოლი თუ ვინ რაზეა პასუხისმგებელი, როდის და რა ფორმით ერთვება სადაზღვევო კომპანია, როგორი არის უკუკავშირი (მათ შორის ტექნოლოგიური), რა ფორმატით და რა სიხშირით უნდა მოხდეს ინფორმაციის გაცვლა. სპეციალური დოკუმენტი მზადდება და ეს დეტალები როდესაც გახდება ცნობილი, შემდეგ ჩავერთვებით, ვნახავთ რა სიმძლავრეებია საჭირო ჩვენი მხირდან, რამდენად აუვალთ არსებულ სიმძლავრეებს, თუ საჭირო გახდება დამატება.

ზოგადი მონახაზი გაგვაცნეს, რომელზეც ცხადია ნორმალური განწყობა გვაქვს, მზად ვართ თანამშრომლობისთვის, თუმცა მნიშვნელოვანია, რომ პროტოკოლის სახით დეტალები გვქონდეს. ამ ეტაპზე  ძალიან ზოგადი ინიციატივაა ცნობილი“, - განმარტავს მიხეილ ჯაფარიძე.

როგორც „არდი დაზღვევის“ აღმასრულებელი დირექტორი განმარტავს, სადაზღვევო კომპანიები ვირუსის მართვაში ოჯახის ექიმების ინსტიტუტით ჩაერთვებიან. მისი თქმით, კერძო დაზღვეულების შემთხვევაში პაციენტების განაწილება-მართვას სწორედ ოჯახის ექიმი მოახდენს.

„ზოგადი შინაარსი იყო შემდეგი, რომ კერძო სადაზღვევოში დაზღვეული კოვიდინფიცირებული ადამიანის, დისტაცნიურად ჩვენი ოჯახის ექიმების მხრიდან მართვა მომხდარიყო. ყველაფერი იმ პროტოკოლით და იმ გაიდლაინით, რომელიც ჯანდაცვის სამინისტროს მიერ სხვა არადაზღვეული ადამიანებისთვისაა გაკუთვნილი, ანუ ერთი და იმავე წესებით. ჩვენ ცხადია ამ კუთხით აქტივობას აქამდეც ვახორციელებდით, დაზღვეულებს ვეხმიანებით და ისედაც ვაქცევთ ყურადღებას. თუმცა, საჭიროა გაირკვას, რა პერიოდულობით უნდა შეეხმიანოს პაციენტებს ოჯახის ექიმები, რა კონკრეტული ინსტრუქცია უნდა ჰქონდეთ, როგორი უნდა იყოს უკუკავშირი ჯანდაცვის სამინისტროსგან ტექნოლოგიების კუთხით, ქოლ ცენტრის ზარის ჩაწერა უნდა მოხდეს თუ არა და ა.შ. ყველა ამ დეტალს აქვს მნიშვნელობა, რომლის მიხედვითაც განისაზღვრება სიმძლავრეები, ამიტომ ამ ტექნიკური დოკუმენტის მოლოდინში ვართ, რომ დეტალებს  გავეცნოთ“, - აცხადებს ჯაფარიძე.

მისივე განმარტებით, ამ შემთხვევაში სადაზღვევო კომპანიების ხარჯების ზრდაზე ან სახელმწიფოს მხრიდან რაიმე დაფინანსებაზე საუბარი ნაადრევია.

„როდესაც ჩვენ გვექნება კონკრეტული დოკუმენტი და პროტოკოლი, საწყისი და ბოლო ნაბიჯი თავისი უკუკავშირით, მას შემდეგ ზუსტად შეგვეძლება ვთქვათ ეს მოითხოვს ჩვენი მხრიდან  დამატებით ხარჯებს თუ არსებული ჩვენი ინფრასტრუქტურა მარტივად გაუმკლავდება მას. ჯანდაცვის სამინისტროში დეტალებზე უკვე მუშაობენ და წესით, კვირის ბოლომდე უნდა იყოს“, - ამბობს მიხეილ ჯაფარიძე.