გაერო ქვეყნებს ციფრული აქტივების კონტროლის ზომების გამკაცრებისკენ მოუწოდებს, რადგანაც მიაჩნია, რომ კრიპტოვალუტებმა შეიძლება საფრთხე შეუქმნას ქვეყნების ფინანსურ სტაბილურობას.
ორგანიზაცია ქვეყნებს ურჩევს, რომ კრიპტოვალუტების რეგულირებისთვის მკაცრი წესები შეიმუშაონ, რათა შესაძლო რისკები თავიდან აიცილონ.
რა ეტაპზეა საქართველოში კრიპტოვალუტების რეგულაციის პროექტი, რა უნდა შეიცვალოს სამომავლოდ ამ ბიზნესში, აღნიშნულ თემაზე „კომერსანტი“ სებ-ს დაუკავშირდა, სადაც განმარტავენ, რომ ეროვნულმა ბანკის მიერ უკვე შემუშავდა ვირტუალური აქტივის მომსახურების პროვაიდერების საქმიანობის მარეგულირებელი სამართლებრივი ჩარჩოს პირველადი ვერსია, რომელიც გაზიარებულ იქნა სექტორის წარმომადგენლებთან.
„კანონპროექტების განხილვის მიზნით, უახლოეს მომავალში იგეგმება სექტორთან შეხვედრები. საწყის ეტაპზე, კანონპროექტები მოიაზრებს ვირტუალური აქტივის მომსახურების პროვაიდერების რეგულირებასა და ზედამხედველობას შემდეგი მიმართულებებით: სავალდებულო რეგისტრაცია ეროვნულ ბანკში, Fit and Proper შემოწმება და ფულის გათეთრებისა და ტერორიზმის დაფინანსების აღკვეთის ხელშეწყობის მიზნით ზედამხედველობა“, აცხადებენ სებ-ში.
როგორია საერთაშორისო გამოცდილება, რა ეტაპები უნდა გაიაროს და ზოგადად რა პერიოდს მოიცავს პროცესი, რაღა საბოლოო მიზნამდე მივიდეთ?
„ვირტუალური აქტივის მომსახურების პროვაიდერების რეგულირების/ზედამხედველობის სამართლებრივი ჩარჩოს შემუშავების პროცესში აქტიურად ჩართულები არიან ეროვნული ბანკის უცხოელი პარტნიორები, რომლებიც გვიზიარებენ საერთაშორისო გამოცდილებას. ვირტუალური აქტივის მომსახურების პროვაიდერების რეგულირების ჩარჩო გაფართოვდება ეტაპობრივად. როგორც ზემოთ აღინიშნა, საწყის ეტაპზე ზედამხედველობა მოიაზრებს ვირტუალური აქტივის მომსახურების პროვაიდერების რეგისტრაციას, Fit and Proper შემოწმებასა და ფულის გათეთრებისა და ტერორიზმის დაფინანსების აღკვეთის ხელშეწყობის მიზნით ზედამხედველობას. აღსანიშნავია, რომ საკანონმდებლო ცვლილებები ითვალისწინებს გარდამავალ პერიოდს: ვირტუალური აქტივის მომსახურების პროვაიდერებს მიეცემათ დრო ორგანიზაციის საქმიანობის კანონმდებლობასთან შესაბამისობაში მოყვანის მიზნით“, - აცხადებენ სებ-ში.
ქვეყნის ცენტრალურ ბანკში ამბობენ, რომ გამომდინარე იქედან, რომ ვირტუალურ აქტივებთან დაკავშირებული მომსახურება მომატებულ ML/TF რისკებთან არის დაკავშირებული, მათი ბუნებიდან გამომდინარე (ანონიმურობის მაღალ ხარისხი, ტრანზაქციების სისწრაფე, ტრანზაქციების მიკვლევის სირთულე და სხვ.) და მათი მომსახურების გამოყენება შეიძლება ხელსაყრელი იყოს დანაშაულებრივი საქმიანობისთვის, ეროვნული ბანკი აქტიურად მუშაობს შესაბამის საზედამხედველო ჩარჩოზე.
„როგორც აღინიშნა, უკვე შემუშავდა ვირტუალური აქტივის მომსახურების პროვაიდერების რეგულირების/ზედამხედველობის სამართლებრივი ჩარჩოს პირველადი ვერსია, რომლის მიზანია, ეროვნული ბანკის მანდატის ფარგლებში, მოცემული რისკების შემცირება და მართვა. უნდა აღინიშნოს, რომ ვინაიდან ეროვნული ბანკი ჯერ არ წარმოადგენს საზედამხედველო ორგანოს, კონკრეტულად რა რისკებია ამ სექტორში დეტალურ ინფორმაციას ამ ეტაპზე არ ფლობს“, აცხადებენ სებ-ში.