ზემო იმერეთი-რაჭის დამაკავშირებელი გზის მშენებლობა დათქმულ ვადებში არ დასრულდება. ინფრასტრუქტურული პროექტი,რომელსაც თბილისიდან ონამდე მანძილი დაახლოებით 75 კმ-ით, ხოლო მგზავრობის დრო თითქმის 2 საათით უნდა შეემცირებინა 2022 წლამდე გადავადდა. კომერსანტის  კითხვაზე რატომ ვერ მოხერხდა დათქმულ ვადებში ინფრასტრუქტურული პროექტის დასრულება, საქართველოს საავტომობილო გზების დეპარტამენტში არ გვპასუხობენ. სახელმწიფო უწყებიდან გამოთხოვილი ინფორმაციით მხოლოდ გზის მშენებლობასთან დაკავშირებული დამატებითი ინფორმაცია ხდება ცნობილი. მათი ინფორმაციით,საჩხერე-რაჭის დამაკავშირებელი საავტომობილო გზის სამშენებლო სამუშაოები უნდა განხორციელდეს 7 ლოტად. დღეის მდგომარეობით კი სამუშაოები აქტიურად 5 ლოტზე მიმდინარეობს:

„1. პირველი ლოტის სამშენებლო სამუშაოებს ახორციელებდა შპს „სამშენებლო კომპანია მამისონი“ სამუშაოები დასრულდა 2019 წელს და ხელშეკრულების ფარგლებში ანაზღაურებულია 4 247 172.08 ლარი.

2. მე-2 ლოტის სამშენებლო სამუშაოებს ახორციელებს შპს „სამშენებლო კომპანია მამისონი“ სახელშეკრულებო ღირებულებით 17 942 033.79 ლარი დღგ-ს ჩათვლით, ხელშეკრულების ფარგლებში ანაზღაურებულია 10 644 342.75 ლარი, ხოლო სამუშაოების დასრულების ვადად განსაზღვრულია 2020 წლის 30 ნოემბერი.

3. მე-3 ლოტის სამშენებლო სამუშაოებს ახორციელებს შპს „ფერი“ სახელშეკრულებო ღირებულებით 20 583 370.00 ლარი დღგ-ს ჩათვლით, ხელშეკრულების ფარგლებში ანაზღაურებულია 5 782 424.24 ლარი, ხოლო სამუშაოების დასრულების ვადად განსაზღვრულია 2021 წლის 25 სექტემბერი.

4. მე-4 ლოტის სამშენებლო სამუშაოებს ახორციელებს შპს „ფერი“ სახელშეკრულებო ღირებულებით 18 951 743.99 ლარი დღგ-ს ჩათვლით, ხელშეკრულების ფარგლებში ანაზღაურებულია 8 913 135.52 ლარი, ხოლო სამუშაოების დასრულების ვადად განსაზღვრულია 2021 წლის 4 ივნისი.

5. მე-5 ლოტის სამშენებლო სამუშაოებს ახორციელებს შპს „NEW ROAD“ სახელშეკრულებო ღირებულებით 18 688 888.00 ლარი დღგ-ს ჩათვლით, ხელშეკრულების ფარგლებში ანაზღაურებულია 1 861 086.15 ლარი, ხოლო სამუშაოების დასრულების ვადად განსაზღვრულია 2021 წლის 15 ივლისი.

6. მე-6 ლოტის სამშენებლო სამუშაოებს ახორციელებს შპს „NEW ROAD“ სახელშეკრულებო ღირებულებით 20 888 888.00 ლარი დღგ-ს ჩათვლით, ხელშეკრულების ფარგლებში ანაზღაურებულია 12 926 776.04 ლარი, ხოლო სამუშაოების დასრულების ვადად განსაზღვრულია 2020 წლის 30 ნოემბერი.

7. მე-7 ლოტის სამშენებლო სამუშაოებისათვის მიმდინარეობს დოკუმენტაციის მომზადება სატენდერო პროცედურების განსახორციელებლად“, - ვკითხულობთ საქართველოს საავტომობილი გზების დეპარტამენტიდან გამოთხოვილ ინფორმაციაში.

ბაჩო ადამია