რუსეთის პრეზიდენტის, ვლადიმირ პუტინის განცხადებით, ევროპაში გაზის ბაზარზე არსებული დაძაბულობის მოხსნა “ჩრდილოეთ ნაკად-2”-ის ჩაშვებით არის შესაძლებელი, თუმცა, მისივე თქმით, ამ დრომდე ადმინისტრაციული ბარიერები მოხსნილი არ არის, რადგან გერმანულმა მარეგულირებელმა გადაწყვეტილება ჯერ ვერ მიიღო.

ამის შესახებ მან რუსეთის ენერგეტიკულ კვირეულზე სიტყვით გამოსვლის დროს თქვა.

“ვხედავთ, რომ ადმინისტრაციული ბარიერები არ იხსნება, არის სხვადასხვა საკითხი ევროპაში მესამე ენერგეტიკულ პაკეტთან დაკავშირებით, რომელსაც ეს პროექტიც ექვემდებარება. არის რამდენიმე საკითხი, რომლის დეტალებში არ მსურს აქ შესვლა. არსებობს ადმინისტრაციული ბარიერები, ისინი ჯერ კიდევ არ არის გადალახული და არ მოიხსნა “, – თქვა პუტინმა.

მისივე თქმით, კომპანია “ჩრილოეთ ნაკად -2”-ში მიდის დისკუსიას, მათ შორის, გერმანიის ხელისუფლებასთან.

“გერმანიის მარეგულირებელმა უნდა მიიღოს შესაბამისი გადაწყვეტილება, მათ ჯერ არ მიუღიათ ეს გადაწყვეტილება. რა თქმა უნდა, რომ შეგვეძლოს ამ მარშუტით მიწოდების გაზრდა – 100%-ით, ჩვენ შეგვიძლია, აბსოლუტურად დარწმუნებით ვთქვათ, რომ დაძაბულობა ევროპის ენერგეტიკულ ბაზარზე, რა თქმა უნდა, მნიშვნელოვნად შემცირდებოდა. ეს ასევე გავლენას მოახდენდა ევროპულ, გაზის ფასებზე. ადმინისტრაციული ბარიერები ჯერ კიდევ არ იძლევა ამის შესაძლებლობას “, – თქვა პუტინმა.

ცნობისთვის, ამერიკელი რესპუბლიკელი სენატორი, ტედ კრუზი, რამდენიმე თვეა ეწინააღმდეგება პრეზიდენტ ჯო ბაიდენის ადმინისტრაციის მიერ სენატში წარმოდგენილი ელჩებისა და სახელმწიფო დეპარტამენტის მოხელეების დამტკიცებას. ამ ნაბიჯით იგი ცდილობს, მიაღწიოს თეთრი სახლის მიერ სანქციების დაწესებას გერმანიისა და რუსეთის დამაკავშირებელი გაზსადენის „ჩრდილოეთი ნაკადი 2“-ის წინააღმდეგ. ამერიკელი სენატორის ობსტრუქციის გამო გაყინულია ჯო ბაიდენის მიერ შემოთავაზებული ათობით ელჩის კანდიდატურების დამტკიცება.

როგორც წესი, ორივე პარტიის წარმომადგენელი სენატორების მხრიდან არ ხვდება ხოლმე წინააღმდეგობა პრეზიდენტის ადმინისტრაციის მიერ წარმოდგენილი ელჩების კანდიდატურებს და დაჩქარებული პროცედურის მიხედვით ხდება მათი მხარდაჭერა. მაგრამ რესპუბლიკელი სენატორი ტედ კრუზი ერთადერთი, რომელიც მოითხოვს, რომ თითოეული კანდიდატურის განხილვა პროცედურის სრული დაცვით და მრავალსაათიანი დებატების თანხლებით მოხდეს.

ამ წინააღმდეგობის გამო სენატმა თითქმის 10 თვის განმავლობაში მხოლოდ ორი, მექსიკასა და გაეროში აშშ-ის ელჩი დაამტკიცა.

მანამდე აშშ-ის ტეხასის შტატიდან სენატორმა, ტედ კრუზმა, შეაჩერა ცენტრალური სადაზვერვო სამმართველოს (CIA) უფროსად იულიამ ბერნსის დანიშვნა. სენატორი მოითხოვს ჯო ბაიდენის ადმინისტრაციისგან უფრო მკაცრ სანქციებს გერმანიაში რუსეთის გაზსადენის, „ჩრდილოეთის ნაკადი 2-ის“ მშენებლობის წინააღმდეგ.

წყარო: “რადიო თავისუფლება”, "ენერგონიუსი"