საქართველოში სამედიცინო პირბადეების დეფიციტის აღმოსაფხვრელად საქართველოს მთავრობამ პირბადეების ადგილობრივი წარმოების პროგრამა დაიწყო. პირველი საწარმო, რომელმაც პირბადეების წარმოება დაიწყო „აჭარა ტექსტილი“ იყო. მიუხედავად იმისა, რომ საქართველოში ერთ-ერთი უმსხვილეს ტექსტილის საწარმოს პირბადეების წარმოებისთვის განკუთვნილი დანადგარები არ ჰქონდა, კომპანია პროგრამაში მაინც ჩაერთო და პირბადებიის წარმოება საკერავი მანქანებით დაიწყო. თავდაპირველად გავრცელდა ინფორმაცია, რომ კომპანია 500 000 პირბადეს ეკონომიკის სამინისტროს უსასყიდლოდ გადასცემდა, თუმცა, დღეს ტექსტილის საწარმოს ფინანსურმა დირექტორმა გია ლომინაძემ „კომერსანტთან“ საუბარში განაცხადა, რომ რიცხვი შეიცვალა და სახელმწიფოს მილიონი მრავალჯერადი მოხმარების პირბადე გადასცა.

„პირბადეების ადგილობრივი წარმოების პროგრამაში ინიციატივის გაჟღერების დღიდან აქტიურად ვართ ჩართულები. პირველ ეტაპზე ვთქვით, რომ სახელმწიფოს უსასყიდლოდ 500 000 პირბადეს მივაწვდიდით, თუმცა, რაოდენობა მილიონამდე გაიზარდა. წარმოებული პირბადეები ეკონომიკის სამინსიტროს უკვე მივაწოდეთ და მათი განაწილება ყველაზე კრიტიკულ წერტილებში მოხდა“, - ამბობს გია ლომინაძემ.

მისი განცხადებით, 12 ფენის მარლისგან დამზადებული მრავალჯერადი პირბადეების წარმოებას კომპანიას დღესაც აგრძელებს. მისი თქმით, სახელმწიფოს შემდეგ პირბადეების შეძენით კერძო პირები დაინტერესდნენ. ტექსტილის საწარმოს ფინანსური დირექტორი ამბობს, რომ ამჯერად არ იცის რა რაოდენობის პირბადეს გადასცემს კომპანია სახელმწიფოს, „აჭარა ტექსტილში“ არც ის იციან შემდეგშიც უსასყიდლოდ ითანამშრომლებენ თუ არა საქართველოს მთავრობასთან.

„პირბადეების წარმოებას დღესაც ვაგრძელებთ, ბევრმა კომპანიამ გამოთქვა სურვილი, რომ შეეძინათ ჩვენს მიერ წარმოებული პროდუქცია და აქედან გამომდინარე პირბადეებს მცირე რაოდენობით, კომერციული დანიშნულებითაც ვაწარმოებთ. ჩვენი საწარმო მზად არის  ეკონომიკის სამინისტროსთან თანამშრომლობა გააგრძელოს, თუმცა, არ არის გადაწყვეტილი რა რაოდენობას შევკერავთ, რამდენიც საჭირო იქნება იმ რაოდენობას ვაწარმოებთ. ჯერ არავინ იცის როგორ განვითარდება მოვლენები, შესაბამისად, კონკრეტულ რაოდენობას ვერ ვასახელებთ. ვერც იმას გეტყვით, უსასყიდლოდ რამდენ პირბადეს გადავცემთ, რადგან პირბადეები კომერციული დანიშნულებითაც უნდა მივაწოდოთ. პროპორცია როგორ იქნება ამ ორ მიმართულებას შორის ამ ეტაპზე უცნობია“,- განმარტავს გია ლომინაძე.

პირბადეების ადგილობრივი წარმოების პროგრამაში „აჭარა ტექსტილის“ მხრიდან პირველ ეტაპზე დაახლოებით, 600 000 ლარის ფინანსური რესურსი იქნება ჩადებული. „კომერსანტის“ კითხვაზე, რა უჯდება კომპანიას ერთი პირბადის შეკერვა, უმსხვილესი ტექსტილის საწარმოს ფინანსურმა დირექტორი ამბობს, რომ 12 ფენის მარლისგან დამზადებული მრავალჯერადი პირბადეების მხოლოდ შეკერვის ღირებულება დაახლოებით 60 თეთრია.

„ჩვენ ამ პირბადეების ვაწარმოებთ ჩვენს ხელთ არსებული დანადგარებით, რომელიც გამოიყენება სხვა მიმართულებით. პირბადეების წარმოებითვის გამოიყენება ავტომატური დანადგარები, რომლებიც დღის განმავლობაში მილიონობით ერთეულ პირბადეს აწარმოებს. ჩვენს შემთვევაში ერთ ადამიანს დღეში მხოლოდ 200 ერთეულის წარმოება შეუძლია, აქედან გამომდინარე ხელით შეკერვა განსაკუთრებით მარლის პირბადის არის გაცილებით რთული და შრომატევადი, შესაბამისად, ღირებულება არის გაცილებით მაღალი. მხოლოდ შეკერვის ფასი  დაახლოებით 60 თეთრია. თუმცა, მას ემატება პირბადის წარმოებისთვის საჭირო სხვა არაპირდაპირი ხარჯი, მათ შორის,  მარლა, რეზინა. საბოლოო თვითღირებულება კი შეიძლება 1,15 ლარი იყოს. ჩვენს შემთხვევაში მასალა უსასყიდლოდ მოგვაწოდა ეკონომიკის სამინისტრომ, რადგან ეს არის დეფიციტური მასალა და მოძიება  გარკვეულ სირთულეებთანაა დაკავშირებული“,- განმარტავს გია ლომინაძე.

შეგახსენებთ, რომ „აჭარა ტექსტილი“ საქართველოს ბაზარზე 2008 წლიდან ფუნქციონირებს და 100%-ით ექსპორტზე ორიენტირებული კომპანიაა. საქართველოში ერთ-ერთი უმსხვილესი ტექსტილის საწარმო წლიურად დაახლოებით 10 000 000 ერთეულ პროდუქტს აწარმოებს. კომპანიას ბათუმში, ქობულეთსა და ფოთში უკვე აქვს სამი სამკერვალო ქარხანა, სადაც დაახლოებით 3 500 ადამიანია დასაქმებული.

ბაჩო ადამია