კორონავირუსის მეხუთა ტალღის საწყის ეტაპზე, როცა ქვეყანაში აქტიურად მიმდინარეობს მსჯელობა ვაქცინაციის დაბალ ტემპსა და ვირუსთან ბრძოლის წარუმატებლობაზე, ქვეყნის მთავარი ეპიდემიოლოგები აღიარებენ, რომ პროცესს ,,რაღაც“ დააკლდა, რისი გამოსწორებაც შესაძლებელია.  ამ პათოსს უერთდება ბიზნესიც, რომლის რამდენიმე წარმომადგენელი ,,კომერსანტთან“ საუბრობს იმ დანაკარგსა და შეცდომაზე, რაც უშუალოდ სექტორს დააკლდა და რის გამოსწორებასაც  საქართველოს ჯანდაცვის სისტემისგან ყველაზე მეტად ითხოვენ.

ბიზნესმენი  მალხაზ კუნელაური ინფექციონისტებს  მოუწოდებს, საჭიროების შემთხვევაში, კარდაკარ მოიარონ რეგიონების მოსახლეობა და სწორად მიიტანონ ინფორმაცია, რადგან წარუმატებლობის მთავარი ფაქტორი სწორედ არასწორი საინფორმაციო კამპანიაა.

,,პანდემიის მართვას დავაკელით ბევრი რამ, პირველ რიგში ის, რომ საინფორმაციო  კამპანია თავიდანვე უფრო აქტიური შეიძლებოდა ყოფილიყო. წელიწადნახევრის განმავლობაში ჯანდაცვის სფეროს წარმომადგენლები ტელევიზიის ეკრანიდან და საკუთარი კაბინეტებიდან მოუწოდებდნენ საზოგადოებას აცრისკენ. ხედავდნენ, რომ ამას შედეგი არ ჰქონდა, მაგრამ მიდგომა არ შეცვლილა. მეტი წინდახედულობა უნდა გამოეჩინათ. საჭიროებას თუ ხედავდნენ, კარდაკარ ევლოთ, როგორც ამას არჩევნების წინ პოლიტიკური პარტიები აკეთებენ. საველე პირობებში უნდა გაკეთებულიყო პუნქტები რეგიონებსა და სოფლებში, სახლში მისულიყვნენ ადამიანებთან, მათი მოსაზრებები მოესმინათ, არასწორი წარმოდგენები გაეფანტათ, რაც ბევრს ჰქონდა, მეტი ინფორმაცია მიეწოდებინათ და მაქსიმალურად  მოგვეხდინა რეგიონებში მეტი რეკლამა გაეწიათ ვაქცინისთვის. დარწმუნებული ვარ, ხალხი მხოლოდ ტელევიზიებიდან იგებდა, სადაც ისმენდა ნეგატიურ ინფორმაციასაც, რატომ არ უნდა აიცრას ადამიანი და ამ კუთხით დაბნეულობა იყო, ჭორ-მართალი ერთმანეთში აირია. ცხადია, ეს პროცესი გადამდები აღმოჩნდა ბიზნესისთვის, ფაქტობრივად ყველა დარგში შეიქმნა პრობლემა. შეიძლება  შეზღუდვებამდეც მივიდეს საქმე, თუ ეს სიტუაცია დროულად არ გამოსწორდება. ამ დღეში ბიზნესიც და მოსახლეობაც სწორედ ეპიდემიოლოგების მიერ დაშვებული შეცდომების, არასწორი მენეჯმენტის გამო აღმოჩნდა“, - აცხადებს ,,კომერსანტთან“ კუნელაური.

მისი თქმით, მმართველი პარტიის მხრიდან არასწორი ქმედება იყო არჩევნების წინ ვაქცინაციისკენ მომწოდებელი სარეკლამო ბანერების ჩანაცვლება პოლიტიკური რეკლამებით, რამაც ვაქცინაციის როლი მოსახლეობის თვალში კიდევ უფრო დააკნინა.

პანდემიის მეხუთე ტალღისას სწორი და დროული გადაწყვეტილებების მიღებას ელოდება  ინფექციონისტებისგან კომპანია ,,სენტას“ დამფუძნებელი, ბიზნესმენი ზაალ იაკობიძე.

,,პანდემიური მდგომარეობის გამო კომპანიები ფაქტობრივად ფორსმაჟორულ სიტუაციაში არიან. მათი საქმიანობის არეალი შეზღუდულია,  აქტიურობა იკლებს, რაც საბოლოოდ ბიზნესზეც აისახება.  წარუმატებელი იმუნიზაცია ეკონომიკაზეც, ქვეყანაზეც და ყველაფერზე მოქმედებს ნეგატიურად. ერთგან დაშვებული შეცდომა გადამდებია სხვა სფეროებზეც, თითოეულ ადამიანსა და ქვეყანაზეც აისახება. ჩვენს შემთხვევაში, კადრების მხრივ შეგვექმნა პრობლემა, განსაკუთრებით ლოქდაუნისას, რადგან შეიზღუდა გადაადგილება,  სამსახურში მისვლა დამატებით პრობლემას ქმნიდა და ეს საბოლოოდ ბიზნესგარემოზეც აისახა, არასტაბილურობის განცდაა ქვეყანაში. ამიტომ ჯანდაცვის მესვეურებს მოვუწოდებ, რომ  გონივრული, სწორი და დროული გადაწყვეტილებებია საჭირო, რომელიც წინასწარ არის განსაზღვრული. მედალს 2 მხარე აქვს, არც სრული ჩაკეტვაა გასამართლებელი, მაგრამ ამავე დროს  უამრავი მაგალითია, როგორ ხდება ამ პროცესის წარმატებული მართვა სხვა ქვეყნებში. საქართველო  ერთ-ერთ უარეს მდგომარეობაშია და ეს წარუმატებელი ნაბიჯის შედეგია.  რაღაც რომ დააკლდა და ბევრი რამ უნდა გაკეთებულიყო, არავინ დავობს, თვითონაც აღიარებენ, ამიტომ ყველაფერი უნდა გააკეთონ, რომ დაშვებული შეცდომა ჭკუის სასწავლებელი გახდეს, არ გაიმეორონ“, - აცხადებს ზაალ იაკობიძე.

ლოკდაუნის გამოცხადებას არ გამორიცხავს კომპანია ,,კუმისის“ დამფუძნებელი, ბიზნესმენი ზურაბ უჩუნბეგაშვილი. თუ რა დააკლდა ბიზნესს და ჯანდაცვის სექტორის გადაწყვეტილებები როგორ აისახა სექტორზე, უჩუნბეგაშვილი საკუთარი კომპანიის მაგალითზე საუბრობს.

,,გამყრელიძე ამბობს, რომ შეიძლება, რაღაც ვერ აწარმოეს სწორად, მაგრამ  საერთოდ ვერ გავიგე, რა აწარმოეს! სადაც არ უნდა გაიხედო, ყველგან წარუმატებლობაა, რაც პანდემიის მართვას უკავშირდება. შეცდომა დაუშვეს  თავიდან,  როცა პანდემია გამოცხადდა და ყველაფერი ჩაიკეტა, მით უმეტეს, მაშინ არ იყო ისეთი მძიმე მდგომარეობა, როგორიც ამჟამადაა. იმ ჩაკეტვამ საერთოდ გაგვანადგურა და დღესაც ვერ გამოვდივართ კრიზისიდან. ახლაც, ალბათ ახალ შეზღუდვებს შემოიღებენ, როგორც ეს სხვა ქვეყნებმა გააკეთეს.  ისევ შეცდომას უშვებენ, ჯერ დაფიქრდნენ, რისი გაკეთება შეიძლება და მერე იფიქრონ შეზღუდვებზე.  აქ პირიქითაა, ჯერ იღებენ გადაწყვეტილებას  და შედეგზე მერე ფიქრობენ, რეკომენდაციების შესრულება შეუძლიათ თუ არა, აშკარად საღი აზრის პრობლემაა. ამათ ახლა ლოქდაუნი რომ გამოაცხადონ, ნაწილობრივი იქნება თუ სრული, ბიზნესში ბოლომდე მიიყვანს ნგრევას, მძიმე მდგომარეობაში აღმოვჩნდებით“, - აცხადებს უჩუნბეგაშვილი ,,კომერსანტთან“.

ცნობისთვის, დაავადებათა კონტროლის ეროვნული ცენტრის დირექტორის ამირან გამყრელიძის განცხადებით, საკომუნიკაციო კამპანია კიდევ უფრო ძლიერი და აგრესიული უნდა ყოფილიყო. მან ამავდროულად აღნიშნა, რომ  გვიანი არც ახლაა.

,,როცა მეკითხებიან,  რა დავაკელით, ვაღიარებთ იმას, რომ საკომუნიკაციო კამპანია კიდევ უფრო ძლიერი და კიდევ უფრო აგრესიული უნდა ყოფილიყო. ჩვენ ქართველებს გვაქვს კარგი გამოთქმა: ,,სჯობს გვიან, ვიდრე არასდროს“, ამიტომ როცა გვაკრიტიკებენ, რატომ  არ დაიწყეთ ადრეო, ჩემი პასუხია, რომ ეს უნდა დაიწყო მაშინ, როცა გაქვს შესაბამისი ვაქცინები“, – განაცხადა ამირან გამყრელიძემ.

Stopcov-ზე გამოქვეყნებული მონაცემების თანახმად, ბოლო 24 საათის განმავლობაში საქართველოში კორონავირუსის საწინააღმდეგო აცრა 4 927-მა ადამიანმა გაიკეთა. 

სულ ქვეყანაში კოვიდსაწინააღმდეგო ვაქცინაციის პროცესის დაწყებიდან დღემდე 1 955 943 აცრა გაკეთდა.

შეგახსენებთ, რომ ბოლო 24 საათში საქართველოში კორონავირუსით ინფიცირების  4 337 ახალი შემთხვევა დადასტურდა.

გარდაიცვალა 42 ადამიანი. 

მარი ჩიტაია