ინვესტიცია ნაკლები რისკით

საფონდო ბირჟის ინდექსი სხვადასხვა კომპანიის მონაცემების ერთობლიობაა, უფრო ზუსტად, ის აქციათა კურსის ცვლილებების საშუალო მაჩვენებელს ასახავს. ინდექსი შეიძლება აერთიანებდეს აქციებს, ობლიგაციებს და სხვა აქტივებს, მათ შორის, როგორიცაა, მაგალითად, ოქრო.

ის აჩვენებს აქციების ფასების ზრდის ან კლების შესახებ საერთო სურათს. ასევე, ამ მონაცემების ანალიზით შეგვიძლია გავიგოთ, რა ტენდენციებია ბირჟაზე. შესაბამისად, ინდექსი ინვესტორებსა და დაინტერესებულ პირებს ბაზარზე დაკვირვების საშუალებას აძლევს. საფონდო ინდექსი საშუალებას იძლევა, გქონდეთ წილი ასობით აქციაში. დივერსიფიცირებით კი ამცირებთ რისკს. თუ ერთი კომპანიის მაჩვენებელი გაუარესდა, ეს ინვესტორს დიდ ზიანს არ მიაყენებს, რადგან ის ერთდროულად ბევრი კომპანიის აქციას ფლობს.

საფონდო ინდექსში ფულის დაბანდება, შეიძლება, საუკეთესო არჩევანი იყოს დამწყები ინვესტორისთვის. შესაძლოა, მისმა გადაწყვეტილებამ უფრო გაამართლოს და გამოცდილი ინვესტორის არჩევანსაც აჯობოს. ცალკეულ აქციებში ინვესტირებასთან შედარებით, საფონდო ინდექსებში ფულის დაბანდებას ნაკლებად რისკიანად მიიჩნევენ. სამაგიეროდ, აქციის ყიდვას, რა თქმა უნდა, სწორი არჩევანის შემთხვევაში, უფრო მეტი მოგების მოტანა შეუძლია. თან, საფონდო ინდექსში ფულის დაბანდებას შეუძლია მინიმუმამდე დაიყვანოს ინვესტიციისთვის დახარჯული დრო და ფული. 

ყველა ამ უპირატესობის გამო, გასაკვირი არ არის, რომ ლეგენდარული ინვესტორი უორენ ბაფეტი ინვესტორების უმეტესობას საფონდო ინდექსებში ფულის ჩადებას ურჩევს, განსაკუთრებით Standard & Poor’s 500-ის ინდექსში.

ყველაზე პოპულარული საფონდო ინდექსები

Standard & Poor’s 500 ყველაზე ცნობილი საფონდო ინდექსია, რომელიც თითქმის ყველა სფეროდან და ინდუსტრიიდან 500-მდე უმსხვილეს კომპანიას აერთიანებს. S&P 500 დიდი კაპიტალის აქციებისთვის ყველაზე ცნობილი ბარომეტრია შეერთებულ შტატებში. მათ შორის არიან Microsoft (MSFT), Apple (AAPL), Amazon (AMZN), Tesla (TSLA), Johnson & Johnson (JNJ), Visa (V), Facebook (FB)  და სხვა. S&P 500 მათი აქციების ღირებულებას ზომავს.

Standard & Poor’s 500-ისგან განსხვავებით, კიდევ ერთი ცნობილი ინდექსი Nasdaq მხოლოდ ტექნოლოგიურ კომპანიებს აერთიანებს და აფასებს.

Dow Jones Industrial Average (DJIA) შედგება ამერიკის ყველაზე დიდი და მნიშვნელოვანი 30 კომპანიისგან, რომელთა ფასების შეწონილი სია ხშირად არ იცვლება.

Russell 2000 პატარა კომპანიებს აერთიანებს და მათი აქციების საუკეთესო შეფასებას აჩვენებს.

არის ნაკლებად ცნობილი საფონდო ინდექსებიც, რომლებიც კონკრეტული ქვეყნების ან აქციების დინამიკას აჩვენებს. ზოგიერთი მათგანი კომპანიებს მათი ზრდის პოტენციალის, ღირებულებისა და დივიდენდების მიხედვით აჯგუფებს და აფასებს. ასეთებია: Russell 3000, Nasdaq 100 და სხვა. 

საფონდო ბირჟის ინდექსში შემავალ თითოეულ აქციას თავისი წონა აქვს. მაღალი შეწონილი ფასის აქციები ინდექსის დინამიკაზე მეტ გავლენას ახდენენ, ვიდრე დაბალი წონის აქციები. მაგალითად, S&P 500-ში ყველაზე დიდი წონა აქვს Microsoft-ს (6.4%); შემდეგ – Apple-ს (6.3%); Amazon-ს (3.9%), Tesla-ს (2.3%) და ა.შ.

საფონდო ინდექსებში ინვესტირების უპირატესობა

რა თქმა უნდა, არ არსებობს გარანტია, რომ ინვესტიცია ყოველთვის მომგებიანი იქნება.  გრძელვადიან პერსპექტივაში საფონდო ინდექსებში ინვესტირება უფრო ამართლებს, ვიდრე ობლიგაციები და აქციები. საერთოდ, საფონდო ინდექსი პასიურ ინვესტიციად ითვლება, რადგან ბაზარზე ინვესტიციებს აქტიურად არ ახორციელებს. თავის მხრივ, ობლიგაციები უფრო სტაბილურია, ვიდრე აქციები.

S&P 500, ხანგრძლივი პერიოდით ინვესტირების შემთხვევაში, ყოველწლიურად ინვესტირებული თანხის დაახლოებით 10%-ს აბრუნებს. მაგალითად, 2011 წლიდან 2020 წლამდე S&P 500-ს საშუალოდ 11,6% მოგება მოჰქონდა. უფრო მაღალი სარგებელი გასცა Nasdaq-მა 2011-დან 2020 წლამდე (წლიურად 17.1%).

ინვესტირება ნაკლები ხარჯით

ინდექსებში ინვესტირების კიდევ ერთი უპირატესობა დაბალი საკომისიოებია. დაბალი ხარჯი კი უმეტესად წარმატებულ საინვესტიციო სტრატეგიას წარმოადგენს.

შესაძლებელია ხარჯების კოეფიციენტის წინასწარ დათვლაც. ხარჯების კოეფიციენტი თუ 0,12%-ია, ნიშნავს, რომ ყოველ დაბანდებულ $10 000-ზე ინვესტორი ყოველწლიურად საკომისიოს სახით $12-ს იხდის.

წყარო: businessfeed.ge