„კორონავირუსი ელექტროსადგურების მშენებლობაზე გავლენას ვერ მოახდენს იმიტომ, რომ ელექტროენერგიის მოხმარების ის რადიკალური შემცირება, რომელიც ამ თვეებში გვაქვს, ბუნებრივია პანდემიის გავლის შემდგომ შეიცვლება, მოხმარება ისევ გაიზრდება და ქვეყანა ელექტროენერგიის დეფიციტში ისევ შევა“, - ამის შესახებ „კომერსანტს“ საქართველოს ტექნიკური უნივერსიტეტის ენერგეტიკის ფაკულტეტის დეკანმა გია არაბიძემ განუცხადა. ენერგეტიკოსი აცხადებს, რომ კორონავირუსი სტრატეგიული მნიშვნელობის ინფრასტრუქტურული პროექტების მშენებლობაზე მნიშვნელოვან გავლენას ვერ მოახდენს:

„არ მგონია კორონავირუსის ფაქტორმა, რაიმე სერიოზული გავლენა მოახდინოს იმ სტრატეგიულ მშენებლობაზე, რომელიც დაგეგმილია. საუბარი მაქვს გარდაბანში მესამე თბოსადგურის მშენებლობაზე, რიონის კასკადზე და ასე შემდეგ. კორონავირუსის დამარცხების შემდეგ გარკვეული პროექტების გადაფასება მოხდება, არა სტრატეგიული მნიშვნელობით, არამედ კონკრეტული ღონისძიებიდან გამომდინარე, რადგან გარკვეული პროექტებზე გაცემული იყო PPA (გარანტირებული შესყიდვის ხელშეკრულებები)მაგალითად ნამახვანი ჰესის შემთვევაში, ახლა კი გარემოებები შეიცვალა. სწორედ ამიტომ, ალბათ პროექტები კიდევ ერთხელ გადაიხედება, ზოგიერთ სადგურზე მაინც“-, განაცხადა გია არაბიძემ.

ენერგეტიკოსი ამბობს, რომ კორონავირუსის პანდემიის გავლის შემდეგ, ნებისმიერი ქვეყანა ყველაფერს ნულიდან დაიწყებს, აქედან გამომდინარე ქვეყანაში ინვესტორების შემოსვლის კუთხით გარკვეული პრობლემები შეიქმნება, რადგან გია არაბიძის თქმით, ის ქვეყნები რომლებიც ინვესტიციას საქართველოში დებდნენ პოსტ პანდემიურ სიტუაციაში ინვესტიციებს თავიანთ ქვეყნებში განახორციელებენ.

„ეკონომიკის ზრდის პროცესისთვის ინფრასტრუქტურული პროექტები ეს არის ერთ- ერთი სწრაფი და რეალური საშუალება მაგრამ, ამ ინფრასტრუქტურულ პროექტს ხომ აუცილებლად სჭირდება ელექტროენერგია? სხვაგვარად ვერ იქნება. უბრალოდ, ჩვენ პრობლემები გვაქვს შემდეგი სახით- როდესაც მეტ-ნაკლებად სტაბილური იყო ეკონომიკა და გარკვეულწილად მცირედი ზრდა გქონდა ელექტროენერგიის მოხმარების ზრდაც იყო, რა დროსაც 2 მილიარდნახევარი კვტ/საათის ელექტროენერგიის შემოტანა გჭირდებოდა. ახლა ამ 2 მილიარდნახევარი ელექტროენერგიის შემოტანა ხვალ და ზეგ არა, თუმცა, გარკვეული პერიოდის შემდეგ აუცილებლად დაგჭირდება, შედეგად, სტრატეგიული მნიშვნელობის მშენებლობები არ შენელდება. რასაკვირველია, პანდემიის დასრულების შემდეგ ინვესტიციების შემოდინება შემცირდება, ერთბაშად ვერ დავიწყებთ სადგურების მშენებლობას, მაგრამ ამ სადგურის მშენებლობის გეგმებს შორს ვერ გადავდებთ, ძალიან ახლოს უნდა გვქონდეს მაგიდასთან, რომ შეგვეძლოს მისი სწრაფად დაწყება და გააქტიურება“, - განმარტავს გია არაბიძე.

ენერგეტიკოსი იმ ქმედით ნაბიჯებზე საუბრობს, რომელიც საქართველოს მთავრობამ უნდა გადადგას იმისთვის, რომ ელექტროსადგურების მშენებლობები დროში არ გაჭიანურდეს და სწრაფი ეკონომიკური ზრდის ტემპით წავიდეს. გია არაბიძე აცხადებს, რომ გარანტირებული შესყიდვის ხელშეკრულებები და გარემოს დაცვის საკითხები ის მიმართულებებია, რომელზეც ხელისუფლებამ ყურადღება უნდა გაამახვილოს.

„პირველ რიგში, კიდევ ერთხელ უნდა გადავხედოთ PPA საკითხებს. იყო დრო ძალიან დიდ დათმობებზე მივდიოდით, რათა ინვესტორები ქვეყანაში შემოსულიყვნენ, რის შემდეგაც გარკვეული პერიოდი სერიოზულად ინვესტირდა ენერგეტიკის დარგი. შემდეგ გარკვეული პერიოდი ისეთი სიმძლავრეები გვქონდა, აღარ იყო საჭირო ელექტროსადგურების მშენებლობები, თუმცა დღეს საჭიროება ისევ დგას. ამიტომ PPA- ს საკითხს კიდევ ერთხელ უნდა დაუბრუნდეს ქვეყანა და მოიძებნოს ისეთი ოპტიმალური ვარიანტი, რომ გარე ინვესტორები დაინტერესდნენ და შემოვიდნენ.

აუცილებელია სახელმწიფომ კიდევ ერთხელ გადახედოს ენერგეტიკულ სექტორში არსებულ პრობლემებს, განსაკუთრებით გარემოს დაცვის საკითხებს. ახლა ჩვენ გვაქვს დრო, სანამ უშუალოდ ნიჩაბს დავკრავდეთ და მშენებლობას დავიწყებდეთ, კიდევ ერთხელ გავიაროთ გარემოს დაცვის ღონისძიებები და კიდევ ერთხელ ვაჩვენოთ მოსახლეობას, რომ ეს სასიცოცხლოდ აუცილებელია.

მესამე და ყველაზე მნიშვნელოვანი ჩემი აზრით, არის ის რომ  ქვეყნის ეკონომიკის ზრდასთან ერთად სახელმწიფომ აუცილებლად უნდა იზრუნოს ენერგეტიკული სექტორის განვითარებაზე. არ შეიძლება ყურადღების მოდუნება იმიტომ, რომ ჩვენისთანა პატარა ეკონომიკა ცუდიც არის და კარგიც, როგორც სწრაფად იცის პატარა ეკონომიკის ქვეყნებმა წაქცევა, ისე სწრაფად ხდება მათი ფეხზე წამოდგომა, ამიტომ ორი სამი მსხვილი პროექტი რომ შემოვიდეს საქართველოში, როგორიც არის მაგალითად, ღრმაწყლოვანი პორტები, ჩვენი ეკონომიკა უცებ დადგება ფეხზე,  ფეხზე დამდგარ ეკონომიკას კი დენი სჭირდება. აი, ჩვენს მთავრობას მხედველობაში მუშაობის დროს  ეს იდეოლოგია უნდა ჰქონდეს“, - განმარტავს გია არაბიძე.

ბაჩო ადამია