ქვეყანაში, უმუშევრობის მნიშვნელოვანი მაჩვენებლის და სარესტორნო ბიზნესის გაფართოების პარალელურად, კვალიფიციური კადრების დეფიციტია. უფრო მეტიც, როგორც რესტორატორმა სოფო გორდაძემ „კომერსანტთან“ საუბარში განაცხადა რეგიონებში კვალიფიციური კადრები საერთოდ აღარ არის და ამას თავისი მიზეზები აქვს.

საკითხი ასე დგას: როგორ შეიძლება გასტრონომია გადარჩეს მზარეულის, მიმტანის, დიასახლისი და ჭურჭლის მრეცხავის გარეშე?

„10 წლის წინ რეგიონებში საკადრო პრობლემები იყო, დღეს კადრი საერთოდ აღარ არსებობს. სარესტორნე ბიზნესში კადრები დეფიციტია. ეს ეხება მზარეულებს, მიმტანებს, დიასახლისებსა და მრეცხავებსაც კი,“ - განაცხადა სოფო გორდაძემ.

სოფო გორდაძის თქმით, სარესტორნო ბიზნესში კადრების დეფიციტს Glovo-ს და Wolt-ის გამოჩენამაც შეუწყო ხელი, რადგან იქ უკეთესი ანაზღაურებაა და რესტორანში დასაქმებას, ბევრი იქ მუშაობას არჩევს.  კადრების დეფიციტის ხელისშემწყობი ფაქტორებია ასევე მზარდი ემიგრაცია და რეგიონების შემთხვევაში - კადრების დედაქალაქში გადინება. რის გამოც სარესტორნო ბიზნესი დიდი გამოწვევის წინაშე დადგა.

„ჩვენი ამოცანა არ არის ის, რომ იაფი მუშა ხელი ვნახოთ, ჩვენი ამოცანაა ვიპოვოთ ადამიანი, ვინც მასზე დაკისრებულ მოვალეობას შეასრულებს. ძალიან სწორია, რომ გადავამზადოთ და კვალიფიციური კადრები გვყავდეს, მაგრამ მერე ვეღარ ვინარჩუნებთ ამ ადამიანებს. იმიტომ, რომ ქვეყნის დატოვება ძალიან ტენდენციური გახდა,“ - აღნიშნა სოფო გორდაძემ

რაც შეეხება პროფესიებს, სოფო გორდაძის თქმით ყველაზე დიდი პრობლემა კვალიფიციური შეფ-მზარეულის პოვნაა.

„არიან შეფები, რომელთაც 1 და 2-წლიანი გამოცდილება აქვთ. ასეთი გამოცდილების შეფს ძალიან რთულია, დიდი ობიექტი ჩააბარო იმიტომ, რომ შეფ-მზარეულობა თავის თავში მოიაზრებს მენიუს კეთებას, კალკულაციის ცოდნას, აღწერების გაკეთებას და მასში მონაწილეობას. რა თქმა უნდა, კვალიფიციური შეფ-მზარეულებიც გვყავს, მაგრამ ისინი დასაქმებულები არიან. ბაზარიც გაიზარდა, ბევრი ახალი კვების ობიექტი გაიხსნა. ამას ტურიზმის განვითარებამაც შეუწყო ხელი. ტურისტი რომ ჩამოდის, გემრიელ კერძებს და კომფორტულ გარემოს ეძებს“, - ამბობს სოფო გორდაძე.

მისი თქმით გამოსავალი „რითეილის“ მიმართულების თვითმომსახურებაზე გადასვლაა, რაც ბენზინგასამართმა სადგურებმა უკვე დაიწყეს.

„დარწმუნებული ვარ 2023 წლის ბოლოს არც ერთ ბენზინგასამართ სადგურს აღარ ეყოლება ოპერატორი და ყველა თვითმომსახურებაზე გადავა იმიტომ, რომ ფიზიკურად კადრები არ არის. სუპერმარკეტებშიც შეიძლება თვითმომსახურების სალაროები გაჩნდეს, რომ მომხმარებელმა პროდუქტის ყიდვა მოლარის და კონსულტანტის გარეშე შეძლოს. სამწუხაროდ, არ ვიცი ეს როგორ შეიძლება მოგვარდეს სარესტორნო ბიზნესში, რადგან კერძს თავად ვერავინ გაიკეთებს და ვერც მაგიდას მოემსახურება. ამის პარალელურად სარესტორნო ბიზნესი ფართოვდება და საკადრო პრობლემებიც ბიზნესი გაფართოების პარალელურად იზრდება,“ - განაცხადა სოფო გორდაძემ.

მოამზადა მაკა ბიბილაშვილმა