თბილისში მიმდინარე ეკონომიკურ კონფერენციაზე, ეკონომიკური მიმოხილვისას „პიემსი კვლევითი ცენტრის“ დირექტორმა, გიორგი ხიშტოვანმა საქართველოში შემოსულ პირდაპირ უცხოურ ინვესტიციებზე გაამახვილა ყურადღება და აღნიშნა, რომ ქვეყანაში საინვესტიციო პორტფელი საკმაოდ დივერსიფიცირებულია როგორც სექტორების, ასევე ქვეყნების მხრივ. მან ასევე განაცხადა, რომ პირდაპირ უცხოურ ინვესტიციებზე საუბრისას, ძალიან მნიშვნელოვანია მისი შეფარდება მშპ-სთან, ამ მაჩვენებლით კი 2019 წლის მონაცემებით, საქართველო მსოფლიოში მე-10 ადგილს იკავებს.
„ეკონომიკური ტრანსფორმაციის ცენტრის პრეზიდენტი“ რამაზ გერლიანი ამბობს, რომ დივერსიფიცირებული საინვესტიციო პორტფელი განსაკუთრებულს არაფერს ნიშნავს, რადგან მიუხედავად იმისა, რომ ბევრი ქვეყნისგან ვიღებთ ინვესტიციას, მხოლოდ რამდენიმე მათგანია წამყვანი, ასევეა სექტორების თვალსაზრისითაც.
„რაოდენობრივ წილში საქართველოს საინვესტიციო პორტფელი დივერსიფიცირებულია, თუმცა, თუ შევხედავთ ამ ინვესტიციების მოცულობებს, მხოლოდ რამდენიმე მათგანია მსხვილი. ინვესტიციები შემოდის სხვადასხვა ქვეყნებიდან, თუმცა ამ ბევრში ერთი-ორი მსხვილი გამოერევა და საბოლოოდ ის წყვეტს მთლიანობაში თუ რამდენი იქნება საინვესტიციო პორტფელი. ბევრი ქვეყნისგან ვიღებთ ინვესტიციას, მაგრამ რამდენიმეა წამყვანი, ასევეა სექტორების თვალსაზრისითაც. გამორჩეული რამდენიმეა, რომლებიც საბოლოო საინვესტიციო მოცულობას წყვეტენ. მათ შორის, ლიდერი ქვეყნები და სექტორები, რომ გამოვაკლოთ დაახლობით 70%-იან ვარდნას მივიღებთ. დივერსიფიცირება არის რაოდენობრივ ჭრილში, თვითონ ფინანსური ნაწილში ცუდი მდგომარეობაა“, - ამბობს რამაზ გერლიანი.
რამაზ გერლიანი არ ეთანხმება გიორგი ხიშტოვანის განცხადებას რეიტინგებთან დაკავშირებითაც და ამბობს, რომ საერთაშორისო რეიტინგებში ეკონომიკური მაჩვენებლების კუთხით, საკმაოდ ცუდი მდგომარეობა გვაქვს, რაც ინვესტიციების შემოდინებაზე უარყოფითად აისახება.
„ზოგადად, პირდაპირი უცხოური ინვესტიციების თვალსაზრისით საქართველოში საკმაოდ რთული ვითარებაა, იმიტომ რომ რეიტინგების მიხედვით, თითქმის ყველა ეკონომიკურ მაჩვენებლებში, მათ შორის გლობალური თავისუფლების, გლობალური კონკურენტუნარიანობის და საკრედიტო კუთხით, მდგომარეობა უარესდება და ეს გავლენას ინვესტიციებზე ახდენს, რომლებიც საბოლოო ჯამში მათ შემოდინებაზე ცუდად აისახება. ყველა ტიპის რეიტინგში უკუსვლა გვაქვს, რაც ძალიან ცუდია, რადგან რეალურად ინვესტიციები მასზეა დამოკიდებული, რეგულაციური პოლიტიკა და ზოგადად არამყარი პოლიტიკური ვითარება, საინვესტიციო გარემოს გაფუჭებას იწვევს“, - განმარტავს რამაზ გერლიანი.
ახალი ეკონომიკური სკოლის დირექტორი პაატა შეშელიძე მიიჩნევს, რომ ქვეყანაში სახელმწიფო ინტერესების გარეშე ინვესტიციები ძალიან იშვიათად შემოდის და ძირითადად ისეთ სექტორებში ხორციელდება სადაც სახელმწიფოს აქვს ინტერესები.
„პორტფელის დივერსიფიცირება განსაკუთრებულს არაფერს ნიშნავს, მნიშვნელოვანია ის რომ ამ კუთხით მნიშვნელოვანი კლება გვაქვს. პრაქტიკულად სახელმწიფო ინტერესების გარეშე ინვესტიციები ძალიან იშვიათად შემოდის, აუცილებელია მთავრობასთან მოლაპარაკება. ამ მხრივ სახელმწიფოს ჩარევა საკმაოდ მაღალი ხარისხითაა. რთულია საინვესტიციო გადაწყვეტილებების მიღება, ინვესტიციები მოდის ისეთ სექტორებში სადაც მთავრობაა უშუალოდ ჩართული, მაგალითად ენერგეტიკის და ინფრასტრუქტურის მიმართულებით. პირდაპირ უცხოურ ინვესტიციაში მნიშვნელოვანია, თუ რამდენია მათ შორის კერძო და არა ის მთავრობამ გარიგებით რამდენი ჩამოიყვანა, კერძო სექტორში ძალიან ცუდი ვითარებაა და არც თუ ისე ოპტიმისტური მდგომარეობაა“, - აცხადებს პაატა შეშელიძე.
ნინო თამაზაშვილი