„ჩვენს ქვეყანაში, ნატურალური რძის წარმოებაზე არანაირი სუბსიდირება არ არსებობს. თუ ამ დარგის გადასახადისგან გათავისუფლება მოხდება, ამით სახელმწიფო ფერმერებს განვითარებაში ხელს შეუწყობს. ამას ვითხოვთ დიდი ხანია, მაგრამ ჯერჯერობით შედეგს ვერ მივაღწიეთ,“-ამის შესახებ რძისა და რძის პროდუქტების მწარმოებელთა ასოციაციის აღმასრულებელმა დირექტორმა კახა კონიაშვილმა „კომერსანტთან“ ისაუბრა.
მისი განცხადებით,სახელმწიფო 9 პროდუქტის კურსთა შორის სხვაობას ასუბსიდირებს. ერთ-ერთი პროდუქტი კი რძის ფხვნილია, რომელიც პრიორიტეტულ ნუსხაში შევიდა.
„ეს ფაქტი ცოტა გამიკვირდა კიდეც. რადგან საუბარი იყო იმაზე, რომ მომხმარებელს საბოლოო პროდუქტი არ გაძვირებოდა. შესაბამისად, ეს უნდა ყოფილიყო მომხმარებლისთვის შეღავათი. მესმის, რომ სხვა პროდუქტს მომხმარებელი პირდაპირ ყიდულობს მაღაზიაში და როდესაც რძის ფხვნილზე გვაქვს საუბარი უნდა გავითვალისწინოთ ის ფაქტი, რომ მას მომხმარებელი პირდაპირ მაღაზიაში არ ყიდულობს. ჯერ უნდა გადამუშავდეს და შემდეგ სხვადასხვა პროდუქტის სახით მიეწოდოს მომხმარებელს. ამ შემთხვევაში ჩნდება კითხვა რატომ ვასუბსიდირებთ იმპორტს და არ ვუწყობთ ხელს ადგილობრივ წარმოებას.“-ამბობს კონიაშვილი.
რძისა და რძის პროდუქტების მწარმოებელთა ასოციაციის აღმასრულებელი დირექტორის განმარტებით, გაზაფხული-ზაფხულის პერიოდში ქვეყანაში რძე ჭარბი რაოდენობით მიეწოდება ბაზარს და ამ პირობებში, როდესაც მოთხოვნა მიწოდების სისტემა გართულებულია, ადგილობრივ მწარმოებელს პროდუქტით ბაზრის შევსება შეუძლია. მაქსიმალურად უნდა მოხდეს ადგილობრივი მწარმოებლების ხელშეწყობა და არა იმპორტის წახალისება.მითუმეტეს იმ მიმართულებით, რომლის შემცვლელიც ადგილზე გაგვაჩნია, თან ნატურალურის სახით.
რძის სუბსიდირების საკითხში კონიაშვილი მნიშვნელოვან როლს სახელმწიფოს აკისრებს, რათა ამ კუთხით ქვეყანაში ადგილობრივი წარმოების მოცულობა გაიზარდოს, რაც მისი აზრით, ადგილობრივ წარმოებას წაახალისებს.
„თუ საუბარია იმაზე, რომ რაღაც ფორმით დასუბსიდირდეს რძის წარმოება, ამ საკითხს მივესალმებით. ამაზე ადრეც იყო საუბარი, როდესაც ქართული რძის პროდუქტების დღგ-სგან გათავისუფლების საკითხი დღის წესრიგში იდგა. ეს თემა აღარ არსებობს, მაგრამ რძის სუბსიდირების საკითხი ქვეყანას ძალიან წაადგებოდა. ყურძნის მაგალითმა აჩვენა, რომ დარგი ფეხზე დადგება და ფასებს ბაზარი დაარეგულირებს.
საგანგებო ვითარების დროს ქვეყანაში, როდესაც გამუდმებით მარაგზე საუბრობენ, წლებია იმაზე, ვსაუბრობთ, რომ სახელმწიფომ უნდა უზრუნველყოს სასურსათო უსაფრთხოება. ის ძირითადი პროდუქტები როგორიცაა ხორბალი, რძე, ხორცი ქვეყანაში უნდა იწარმოებოდეს, რომ ფორსმაჟორულ სიტუაციაში ქვეყანამ თავის თავი უზრუნველყოს.“-აცხადებს კონიაშვილი და იმედს გამოთქვამს, რომ ამ მიმართულებით სახელმწიფო სტრატეგიულ გეგმას შეცვლის.
შეგახსენებთ, რომ რძის ფხვნილი იმ 9 პროდუქტიდან ერთ-ერთია, რომელზეც ფასის შენარჩუნების მიზნით, მთავრობამ სახელმწიფო პროგრამა დაამტკიცა. პროგრამის დაფინანსებისთვის კი ბიუჯეტიდან 10 მილიონი ლარი გამოყო. ადგილობრივი მწარმოებლები და მერძევეები სახელმწიფოსგან პროდუქტის სუბსიდირებას ითხოვენ.
ნათია ლომიძე