„ქვეყანაში მასშტაბური ვაქცინაციის გარეშე, მორიგ ჯერზე ჩაგვკეტავენ“ - “ჰელისკი ჯორჯიას“ დამფუძნებელმა ვატო ასათაშვილმა ეკონომიკის მინისტრის, ნათია თურნავას განცხადებას ტურიზმის გააქტიურებასთან დაკავშირებით, 4 პუნქტიანი რეკომენდაციებით უპასუხა.
საქართველოს ეკონომიკის მინისტრი, ნათია თურნავა ამბობს, რომ თვის ბოლოს საქართველოში ვაქცინირებული ტურისტების პირველი ნაკადი უკვე ჩამოვა. ამის შესახებ მან მთავრობის სხდომის დასრულების შემდეგ ფრენებთან დაკავშირებით არსებული ინფორმაციის მედიისთვის გაცნობის დროს ისაუბრა.
ტურიზმის სფეროს ექსპერტი ვატო ასათაშვილი სოციალურ ქსელში წერს, რომ მმართველმა გუნდმა შეთანხმებულ სამოქმედო გეგმას არ უნდა გადაუხვიოს. „კომერსანტი“ პოსტს უცვლელად გთავაზობთ:
„იმისათვის რომ მდგრადობის რამე კონტური მაინც გამოჩნდეს საჭიროა 4 მიმართულებით მუშაობა:
1. ქვეყანაში მაშტაბური ვაქცინაციის გარეშე “უსაფრთხო ვიზიტორების” მიღების შემთვევაშიც შიდა მობილობა გაიზრდება და ავტომატურად შიდა ინფიცირება მოიმატებს, რის გამოც მორიგ ჯერზე ჩაგვკეტავენ.
2. მცირე და საშუალო ბიზნესის ძირითადი ნაწილი გაჩერებულია და მორიგი გახსნა სადაზღვევო ფინანსური ბალიშის გარეშე წარმოუდგენელია, თუ კონკრეტული ნაბიჯები არ გადაიდგმება, მორიგი შეზღუდვა ტალღა #3; #4; #8... დამანგრეველი ბუმერანგი იქნება მოსახლეობის ყველაზე მოწყვლადი ჯგუფებისთვის.
3. სახმელეთო საზღვრების გახსნა მკაცრი კონტროლის გარეშე განსაკუთრებულად ე.წ. რუსული მაისის პრადნიკებზე ისეთი მძიმე შედეგის მომტანია, მონაგონია 2020ის ბათუმი და “დონას კლასტერი”.
4. ყველაზე მნიშვნელოვანი - თუ არ გვექნება კონკრეტული, დროში გაწერილი სამოქმედო გეგმა, ნაბიჯ-ნაბიჯ ორი, ოთხი, ექვსი კვირის და შემდეგ სამი, ექვსი და ცხრა თვის პერსპექტივით, რამე ეკონომიკურ საქმიანობაზე საუბარი უაზრობაა. ამ სამოქმედო გეგმამ უნდა გააერთიანოს ზემოთ ჩამოთვლილი სამი პუნტქი და კიდევ მრავალი სხვა, და რაც არ უნდა პოლიტიკური ტანგოს ცეკვა გადაწყვიტოს მმართველმა გუნდმა, შეთანხმებულ სამოქმედო გეგმას არ უნდა გადაუხვიოს.
ყველაფერი სხვა, მწვანე კორიდორები, თვითშემოქმედებითი ვაქცინაცია, კომენდანტი საათი, მარკეტინგში ფულის ყრა, ბაქიბუქობა და დაპირებები უკანალის თამაშია,“ - წერს ვატო ასათაშვილი.
საქართველოში მოქმედი რეგულაციების მიხედვით, ქვეყანა საზღვრებს უხსნის ტურისტებს ნებისმიერი ქვეყნიდან, თუ მათ გაკეთებული ექნებათ კორონავირუსზე ვაქცინის ორივე დოზა. ვაქცინაციის პროცესი მსოფლიოს 100-ზე მეტ ქვეყანაში უკვე დაწყებულია.