კორონავირუსის გამო მსოფლიოში კრიზისია, ეს კრიზისი აისახა საქართველოზეც, კონკრეტულად ბიზნეს სექტორში. ბიზნესის არაერთი წარმომადგენელი ამბობს, რომ მათ თანამშრომლებისთვის ხელფასის გადახდა უჭირთ.

„კომერსანტი“  დაინტრესდა რა მდგომარეობაა ტექნიკის ბაზარზე და „ტექნო ბუმის“ დამფუძებელს ანზორ ქოქოლაძეს დაუკავშირდა.

ბიზნესმენის თქმით ქვეყანაში ეკონომიკის გაჩერება, ყველა კომპანიაზე ნეგატიურად აისახა, მათ შორის იმ კომპანიებზეც, რომლებსაც მუშაობა ამ პერიოდის განმავლობაში არ შეუჩერებიათ.

„გაჩერებული ეკონომიკა არა მარტო ჩემს კომპანიაზე აისახა ნეგატიურად, არამედ ყველა სექტორში გამოიწვია უარყოფითი ძვრები.  კონპანია  რომელიც გაჩერებულია და მას შემოსავლის შემცირებასთან ერთად ეზრდება ხარჯი, საკმაოდ რთულ მდგომარეობაშია. მათ შორის ჩემი კომპანიაც.  ერთი მაღაზიის დაკეტვა უკვე მომიწია და ვცდილობთ ის თანამშრომლები სხვა მააღაზიებში გადავანაწილოთ. ამ პერიოდში ძალიან რთულია ყველაფერი უცვლელად შეინარჩუნო, უბრალოდ წარმოუდგენელია.“-აცხადებს ანზორ ქოქოლაძე.

„ტექნო ბუმის“ დამფუძნებელი ანტიკრიზისულ გეგმასაც აფასებს და აცხადებს, რომ გეგმა პირველი ეტაპია, რათა ქვეყნის ეკონომიკა სრულად არ ჩამოიშალოს, თუმცა იმედოვნებს, რომ კორონავირუსის შემდეგ მთავრობა კონკრეტულ ნაბიჯს გადადგამს ბიზნესის ხელშესაწყობად.

„მთავრობის მიერ წარდგენილი ანტიკრიზისული გეგმა არის სოციალური ხასიათის მატარებელი და ერთი ნაბიჯი იმისკენ,  რომ არ ჩამოიშალოს ქვეყნის ეკონომიკა.  ალბათ  დამატებითი ნაბიჯი იქნება საჭირო, კონკრეტულად საგარანტიო ნაწილში. სასურველი იქნებოდა მეტი მხარდაჭერა ბიზნეს სექტორს  და იმედია, მეორე ამ საკითხზე იქნება ორიენტირებული.“-ამბობს ანზორ ქოქოლაძე.

ნათია ლომიძე