„საქართველოს მელიორაცია“, ქვემო ქართლში, 1385 ჰექტარ სასოფლო-სამეურნეო მიწის ფართობზე სარწყავი წყლის მიწოდების გასაუმჯობესებლად, ხრამ არხის სარწყავი სისტემის წყალგამანაწილებლის რეაბილიტაციის სამუშაოებს ახორციელებს. როგორც "კომერსანტს" კომპანიაში განუცხადეს, სამუშაოების ფარგლებში, გაიწმინდება და მოწესრიგდება 13 კმ სიგრძის არხი; 2,5 კილომეტრიანი მონაკვეთი რკინაბეტონით მოპირკეთდება; მოეწყობა გამანაწილებელი კვანძები და წყლის ჩამკეტი ფარები;დამონტაჟდება საავტომობილო დ ასაფეხმავლო ხიდები.
პროექტის ღირებულება 2 277 800 ლარია.
"საქართველოს მელიორაციის" შეფასებით, სარწყავი წყლის მიწოდების გაუმჯობესება ადგილობრივ ფერმერებს ხარისხიანი და უხვი მოსავლის მოყვანის საშუალებას მისცემს.
„საქართველოს მელიორაციის” გენერალურმა დირექტორმა, დავით წითლიძემ ქვემო ქართლის რეგიონალური სამსახურის ხელმძღვანელ პირებთან ერთად,ხრამ არხზე მიმდინარე სარეაბილიტაციო სამუშაოები დაათვალიერა და ადგილობრივ ფერმერებს შეხვდა.
„ქვემო ქართლში განსაკუთრებით მაღალია სარწყავ წყალზემოთხოვნა. შესაბამისად, საირიგაციო ინფრასტრუქტურის რეაბილიტაციის მასშტაბური სამუშაოები გვაქვს დაგეგმილი და ეტაპობრივად ვახორციელებთ. ხრამ არხის რეაბილიტაციით, ჩვენშევამცირებთ წყლის დანაკარგს, გავაუმჯობესებთ სარწყავი წყლის მიწოდებასა და მართვას, რასაცადგილობრივი ფერმერების წარმატებული სასოფლო-სამეურნეო საქმიანობისთვის, სავარგულების სტაბილურად მორწყვისთვის, გადამწყვეტი მნიშვნელობა აქვს“, - განაცხადა დავით წითლიძემ.
შეგახსენებთ, "საქართველოს მელიორაცია" სამელიორაციო ინფრასტრუქტურის ობიექტებზე სარეაბილიტაციო სამუშაოებს ატარებს. ამასთანავე კომპანია ირიგაციისა და დრენაჟის სერვისების მიმწოდებელია ქვეყანაში. კომპანიის სტრატეგიული მიზნებია: წყალუზრუნველყოფილი მიწის ფართობის ზრდა; წყალმომხმარებელთა ჩართულობის ზრდა წყალუზრუნველყოფის ეფექტურობის კომპლექსური გაუმჯობესებისათვის; დარგის რეფორმირება სიცოცხლისუნარიანობისა და მდგრადობის მისაღწევად და სხვა.
მელიორაციის დარგის აქტიური დაფინანსება 2013 წლიდან დაიწყო და დიდი მოცულობის აღდგენითი და სარეაბილიტაციო სამუშაოების შედეგად, მნიშვნელოვნად გაიზარდა ქვეყანაში სარწყავი და დრენირებული მიწის ფართობები. ამ პერიოდის განმავლობაში თითქმის 400 მლნ ლარია მიმართული როგორც აღდგენითი, ასევე სარეაბილიტაციო სამუშაოების განსახორციელებლად.
კომპანიის მენეჯმენტის განმარტებით, მიღწეული წარმატებების შედეგად, პრობლემები ადგილებზე მაინც რჩება, ვინაიდან მოსახლეობა სარწყავი წყლით სრულად არ არის უზრუნველყოფილი. მთავრობასთან შეთანხმებით, 2021 წელი წყლის წლად არის გამოცხადებული და მაქსიმალური უნდა გაკეთდეს, რათა მოსახლეობას საშუალება მიეცეს მეტი სავარგული მორწყას და, შესაბამისად, მეტი მოსავალი მიიღოს.
ავტორი: ბელა გელაშვილი